Пензенскяй областень Бессоновскяй районца ули Кижеватово мокшень веле, кона инголи каннесь Селикса, Рождественское лепт. Ламонцне, арьсян, содасазь, што Кижеватовакс сон арась тоса шачф мордвинть, Советскяй Союзонь Геройть, Брестскяй крепостть аралаенц Андрей Митрофанович Кижеватовонь вельде.
Тейне, кода журналистонди, несколькаксть удалась улемс Кижеватоваса, тя велень школаса, васьфнемс тостонь эряйхнень мархта. И сембе синь (да аф аньцек синь, а сембе мокшетне) маряйхть оцю гордость Великай Отечественнай войнань васенце шитнень Брестскяй крепостть аралаенц, 9-це пограничнай заставать начальниконц, мордвинть Андрей Митрофанович Кижеватовонь инкса, кона шачсь тя велеса.
Ульсь тя 1907 кизонь 18(31) августста, Селиксаса. Кой-кона источникнень эса пачфневи, што Андрей Митрофановичень аляц-крестьянинць мокшель.
А.М.Кижеватов служась Якстерь Армияса, шумордазе 7-це башка артиллерийскяй дивизиононь младшай начсоставонь школать. 1930 кизоня арась Белорусскяй пограничнай округонь коннай башка дивизиононь орудиянь командиркс. 1932 кизоста сявомок служась сверхсрочна, 1938 кизонь майти арась пограничнай заставань начальниконь помощникокс.
1939 кизоня теенза максфоль младшай лейтенантонь звания, аф лама пингонь ётазь путфоль Брестса пограничнай заставань начальниконь тевонь тиендикс, а 1940 кизоня 17 июльста—17-це Брестскяй погранотрядонь 9-це погранзаставань начальникокс, кона Брестскяй крепостьсоль. Аф лама пингонь ётазь Андрей Митрофанович арась лейтенантокс.
Великай Отечественнай войнать васенце шистонза сон оцюняль заставать араламстонза, эста васенцеда ранендафоль. Аф ваномок тянь лангс, ашезень када солдаттнень и пуроптозе 333-це стрелковай полкть казарманзон и Тереспольскяй ортатнень араламаснон. Уликс даннайхнень коряс, шавовсь Андрей Митрофанович 29 июньцта.
1942 кизонь сёксенда Малоритскяй райононь Великорита велеса немецне ляцезь А.М.Кижеватовонь марнек семьянц: тядянц, рьванц и идензон—15 кизоса Нюрать, 11 кизоса Ванянь и кафта кизоса Галять.
Советскяй Союзонь Героень лемсь Андрей Митрофановиченди максфоль куломдонза меле—1965 кизоня.
А.М.Кижеватовонь лемонц каннесы Кижеватово велень школань Боевой славань музейсь. Сонь фкя залоц марнек лемтьф Великай Отечественнай войнати и Советскяй Союзонь Геройти Андрей Митрофанович Кижеватовонди.
Оцю лезкс музейть козякофтомаса макссихть школаса тонафнихне, учительхне, школаса работайхне и велень эряйхне. Пуроптф аф кржа материал Андрей Митрофановичень, Великай Отечественнай войнань участникнень, сятнень, кит служасть А.М.Кижеватовонь лемса заставаса, локальнай войнатнень (Афганскяй, Чеченскяй) участникснон колга.
Тя музейсь арась призёркс «Инь цебярь музейсь (музейнай экспозициясь)» конкурсса, Победань Музейть экспертнай комиссиянц заседаниянц итогонзон коряс сон сувафтфоль «Победань школьнай музейсь» лама пингонь программать участниконзон ёткс и теенза максфоль Победань Музейть партнёронц статусоц.
Музеи сидеста сашендыхть инжихть Пензаста, Пензенскяй областьста, лия ошнень и региоттнень эзда.
Шачема ширеса А.М.Кижеватовонь мяляфтсазь. Аф кржа тя тевса тиенди Пензенскяй областень Мокшэрзянь автономиясь.
Тяддень майть кучкаста автономиять мяленц коряс ся населённай пункттнень школаснон эса, коса компактнайста эряйхть мокшэрзятне, ётафтовсть А.М.Кижеватовонди лемтьф класснай частт. «Тяса монь заставазе, и мон сонь командироцан!» слайд-шоуть и Советскяй Союзонь Геройть биографическяй даннаенза тя тевонди сявфтольхть школьнай музейста.
Пензенскяй областень Никольск ошень 2№ школань 5-11 класса тонафнихне оцю мяль шарфтсть А.М.Кижеватовонь подвигонцты.
Малосердобинскяй райононь Новодёмкинскяй школаса 5-8 класса тонафнихненди ётафтфоль «Синь лемсна максфт заставатненди: Андрей Кижеватов» класснай част.
А.М.Кижеватовонди лемтьф васедемат ульсть Захаркино, Армиёво, Наскафтым, Вачелай и лия велетнень эса.
Июньцта ёмла ваныень Пензенскяй театрась няфтсь «Кижеватов (историянь страницат)» спектакль, кона лемтьфоль Советскяй Союзонь Геройти А.М.Кижеватовонди.
Геройть биографическяй даннаензонды консультантокс арась А.М.Кижеватовонь лемса Боевой славань музейть руководителец, Мокшэрзянь автономиять активистоц П.Г.Самушкин.
А.М.Кижеватовонь лемса заставать, «Сязьф тяште» стелать, Брестскяй крепостть Кижеватово велеса содасазь аф аньцек азондоматнень, фотографиятнень и видеоматериалхнень коряс. Пяк лама киза школась кирди соткст Белоруссиянь Брест ошть мархта. Тоза аф весть якасть Кижеватовань школаса тонафнихне. Андрей Митрофановичень лемоц сёрматф гранитонь плитати, мемориальнай кевти.
Брестскяй крепостть стенанза тянемс мяляфтсазь Великай Отечественнай войнань васенце шитнень и аралайснон эзда фкять—мордвинть (ламоц источникнень эса сон азондови мокшалякс) Андрей Митрофанович Кижеватовонь. Советскяй Союзонь Геройть колга мялямсь кармай эряма фалу! Колганза ули кода азондомс пяк лама.
Т.АЛЬШИНА.