Цаплинонь бульвароц—Саранск ошень инь мазы ульцятнень, бульвархнень и проспекттнень ёткста фкясь. Ащи сон республиканьконь столицанц северо-западнай пялькссонза, конанди мярьктяма Светотехстрой. Якамок Цаплинонь бульваронц эзга, фалу васьфтят ломатть: кит сашендыхть сей идьснон или ялгаснон мархта, лиятне аф эрязста, рабочай шить шумордамдонза меле, якайхть-аськоляйхть ськамост или ащекшнихть озада мазы скомнятнень лангса: морафнихть книгат, сотцихть кроссвортт. Куттнень эзда фкять стенанц лангса рисовандаф сонцень Павел Цаплинонь портретоц. Сон оцю, занцесы марнек стенать. А кие ульсь Павел Цаплин? Саранск ошень эряйхненди и сонь инжиензонды ули кода морафтомс Советскяй Союзонь Геройть биографиянц бульварса ладяф стенттнень лангста. А минь, Историческяй мялямонь кизоня, азонттама колганза и республиканьконь столицанц мазы тя вастонц квалма, газетаньконь морафтыензонды.
Цаплинонь бульвароц ащи шабракс А.Луссонь ульцянц мархта, полаткшнемок Веселовскяень и Пушкинонь ульцяснон. Лем бульварти максфоль 1983 кизонь 15 ноябрьста ошень Советть решениянц мархта Советскяй Союзонь Геройть Павел Алексеевич Цаплинонь честьс.
Великай Отечественнай войнаса Сяськомать 40 кизонь топодеманц карша Цаплинонь бульварсонза ладяфоль Т-34 танка. Тифоль тя Мордовия Республикань тылонь ся труженикнень лемс, конат кочкасть 36 миллионть малава цалковай «Мордовский колхозник» танковай колоннать строяманкса.
Цаплинонь бульваронцты кунара ашезь тиендев ремонт. Несколька кизода инголе сафоль мяльс петемс-мазоптемс сонь «Жильё и городская среда» национальнай проектть «Формирование комфортной городской среды» федеральнай проектонц коряс. Саранск ошень Пролетарскяй районть общественнай инь оцю вастонзон ёткста фкять ошень эряйхне кочказь кода благоустройствань объект рейтинговай вайгялень максомать вельде.
2023 кизонь тунда кярьмотьфоль бульварть капитальнайста петеманцты. Тифоль пяк лама. Полафтфтольхть валдоптомань систематне, тифтольхть ялга якамань од кинят, ладяфтольхть идень и спортивнай площадкат, тяни тяса пяк лама ваймама, ётка пингонь ётафтома вастта.
Бульварса ладяфоль информационнай зона, кона пачфни Советскяй Союзонь Геройть Павел Цаплинонь эряфонь кинц колга. Пара ся, што общественнай тя вастсь ащи шуфттнень и кусторкснень ёткса, сяс тундаста сявомок и пцтай сёксеть самс сон вайси сянгярять потмос.
Тяда башка, Веселовскяень ульцяса 27№ кудть стенанц мазопнесы танкистть Павел Цаплинонь портретоц, мезсь нинге и нинге весть лятфни странаньконь героензон подвигснон колга.
Газетаньконь тячиень номерсонза азонттама и сонцень Павел Цаплинонь колга.
Мордвинць Павел Алексеевич—тяниень Татарстанца васенце шачфсь, конанди максфоль Советскяй Союзонь Героень лем. Лиссь тя фашизмать мархта тюремань васенце фронтса—Испанияса войнать пингста.
Шачсь Павел Цаплин 1906 кизонь 23 декабрьста Самарскяй губерниянь Бугульминскяй уездонь Мордовское Афонькино велеса (тяни сувси Татарстан Республикань Черемшанскяй районти) крестьянскяй семьяса. Получась средняй образования.
Рабоче-крестьянскяй Якстерь Армияв Павел Алексеевич сувась эсь мяленц коряс 1923 кизоня. Кизонь ётазь аделазе 17-це Тульскяй пехотнай школать. Служась 1-це Казанскяй стрелковай дивизиянь комендантскяй ротань взводонь командиркс, меле командироль 2-це Ульяновскяй стрелковай полконь взводти. 1932 кизоня Павел Цаплин шумордазень Ленинградскяй бронетанковай курснень. Служась Калугаса.
1936 кизонь октябрьста капитанць Павел Цаплин эсь мяльс коре молихнень мархта прважафоль Испанияв, коса мольсь Гражданскяй война. Васень пингть Павел Алексеевич тонафнезень испанскяй танкисттнень-республиканецнень танковай школаса Арчена ошть маласа. Но меле, фронтса тефнень аф кода молемаснон инкса, 1936 кизонь декабрьста капитанць Цаплин путфоль бронетанковай бригадаса танковай ротань командиркс. Бойса няфтезе прянц Валенсиять ала. Тюремать пингста стакаста ранендафоль механиксь-водительсь Фролов, мезьда меле танкась лоткась. Фашисттне ёрасть сявомс экипажть пленц, но танкисттне пулемётонь толса тапазь синь сембе врьгятемаснон. 8 частта меле фашисттне потасть, юмафтомок шавфста пцтай 60 ломань.
1937 кизоня Павел Цаплинонь ротац ётафтфоль Мадридть алу и примась участия Харама ляйть лангса тюрематнень эса, коса советскяй танкисттне лама тисть фашистскяй войскатнень потафтомаснон инкса. Тюрематнень эзда фкять пингста капитанть Цаплинонь танкац тапафоль. Павел Алексеевич ранендафоль, но коль вятезе инголи ротать. Ляцендемок марнек боезапасонц, сязезе эсь танканц и мрдась частезонза. Ранатне теенза няевсть аф пяк стакакс, сяс капитанць атказась госпитализациять эзда. Несколька шида меле сонь ушедсь столбняк. Павел Цаплинонь эстокиге пачфтезь Арчена ошень госпитали, но эряфонц араламс ашезь удала. Калмазь капитанть Цаплинонь ошень воинскяй калмотненди.
Советскяй Союзонь Героень лемсь теенза максфоль 1937 кизонь 27 июньцта (куломдонза меле).
Мяленьке максомс тяфтама кизефкс газетаньконь морафтыензонды. Содаф кодама ломанень колга, кона занясь башка васта республиканьконь историческяй мялямсонза, мяленте лувомс «Мокшень правдаса»? Пачфтеда тянь колга тейнек!
Татьяна Альшина.