Специальнай военнай операциянь ветеранти—спортивнай форма

Старошайговскяй райононь эряйсь Евгений Лошкарев мобилизовандафоль 2022 кизонь октябрьста. Служась водителькс сапёрнай ротаса Луганскяй направленияса. 2023 кизонь февральста повсь миномётнай ляцендема алу Кременнойть маласа. Няфтьф мужестванкса казьф Мужествань орденца.
«Защитники Отечества» государственнай фондть филиалонц социальнай координатороц Валентина Щипанова лезни Евгениенди тонаткшнемс мирнай эряфти. Сонь лезксонц вельде ветеранть квартираса ладясть «Ёню куд» система, а тяни сон получась следж-хоккейса прянь занцеманди экипировка: нуртт, клюшкат, шлем, маска, нагрудник, перчаткат, шортат, налакотникт и стак тов. Сембоц—15 позиция. Евгений кармай тренировандама Ледовай дворецса, аноклама «Кубок защитников Отечества» Всероссийскяй пялькстоматненди.
«Евгений Лошкарев Мордовияса СВО-нь васенце ветеранць, кона получась следж-хоккейса прянь занцеманкса экипировка. Кеман, што сонь вельденза саты результатт тяни ни спортивнай фронтса. А минь тисаськ семботь, штоба кирдемс ширенц. Минь марятама гордость аралаеньконь инкса и сяда товга лезттама теест тонаткшнемс мирнай эряфти и ётафнемс эряфс эсь потенциалснон»,—мярьгсь Мордовия Республикать эзга «Защитники Отечества» государственнай фондть филиалонц руководителец Алексей Герасименко.
«Защитники Отечества» госфондсь пуроптф Россиянь Президентть Владимир Путинонь Указонц коряс. Сонь фкя инь васенце целец—СВО-нь ветераттнень и геройхнень семьянь членцнон персональнай сопровождениясна. Фондонь специалисттне и социальнай координаторхне лезнихть аралайхненди аф аньцек медицинскяй и социальнай реабилитациять, но и одукс тонафнемать и трудоустройствать мархта, макссихть юридическяй ширень кирдема. Фондть филиалонза работайхть Россиянь сембе региоттнень эса.