Спецоперациянь ветеранць азондсь

Саранскяень 27№ школань ученикнень шири сашендсь СВО-нь ветеранць Андрей Кокорев.
Андрей ёт шабакс профессиональнайста занцесь пря дзюдоса и самбоса, сон Мордовиянь чемпион. Школать аделамда меле тонафнесь Саранскяень промышленно-экономическяй колледжса. Сяльде тертьфоль армияв, служась ракетнай войскаса. Мрдамдонза меле, 2022 кизонь октябрьста, Андрей мобилизацияс коре сявфоль спецоперацияв. Сон служась Краснолиманскяй направленияса разведкань отделениянь командиркс. Тунда стакаста ранендафоль, поладомс службанц ашель кода.
«Мон, кода тинь, тонафнень тя школаса,—мярьгсь стирнятненди-цёранятненди ветеранць Кокорев.—Озафолень колмоце рядса вов тя партать ваксса. Тинь учителенте—Наталья Владимировна Терлецкая—тонафнемань моньге, тонафтомань смелшити и Родинать кельгоманцты. Кирдезе ширезень, мзярда азонь мяль занцемс пря спортса».
Сон шарфтсь мяль сянди, што спортсь лезни арамс сяда виикс. Васедемас Андрей каннезень спортивнай казнензон, конатнень шабатне ванондозь оцю мяльса. Стане жа спецоперациянь ветеранць спасибась стирнятненди-цёранятненди сёрматнень инкса, конатнень синь сёрматкшнесазь фронту. «Нят аф аньцек кагод лангс тяштьф валхт, а валдонь и лямбонь сюролдат, конат лезнихть боецненди кирнемс фронтса стакатнень-сталмотнень. Содамок сянь, што кудса синь учендсазь и шабатне кирнесазь ширеснон, боецнень эвондакшнихть вийсна и кемамасна».
Сонць Андрей каннезе мяштень зепсонза Большеберезниковскяй районцта ветеце классонь тонафнить Алёнать сёрманц, кона сась фронту марса гуманитарнай лезксть мархта. Эсонза стирнясь арьсесь боецти кемоши, шумбраши и марясь гордость службанц инкса.
Васедемать колга лятфнембяленди ученикне казезь ветеранти эсь рисункаснон. Сон арьсесь шабатненди верондамс эстеест, ванфтомс тядяснон-аляснон и кельгомс эсь странаснон.
«Ков сяда лама тяфтама васедемада кармай ётафневома, тов сяда лама кемамада сянди, што цёрокшеньке касыхть шачема-касома масторонь достойнай ванфтыкс. Синь няйсазь, кинь эзда эряви сявомс кепотькс»,—мярьгсь Наталья Терлецкая.