Спецоперациянь ветераттнень семьясна ульсть походса

Сурскяй рубежень васттнень эзга кафта шинь походть аноклазь и ётафтозь региональнай Гражданско-патриотическяй центрась и «Защитники Отечества» фондть филиалоц. Эсонза примасть участия специальнай военнай операциянь ветераттнень семьясна.
Пуромома вастокс арась Большеберезниковскяй районть территорияса МЧС-нь ошкясь. Тяста марса опытнай инструкторхнень мархта СВО-нь ветераттне и синь шабасна срхкасть кафта шинь походс историческяй васт-
тнень эзга. 80-да лама кизода тяда инголе тяса эвондась Сурскяй рубежсь—оборонительнай участкась, конань тиезь тястонь эряйхне ляйть трваса. Укреплениясь арьсефоль немецкяй войскатнень кирдеманкса. Сурскяй рубежть кувалмоц 380-да лама вайгяльбе, конатнень эзда 80 вайгяльбесь таргавсь Мордовиять эзга.
Ветераттне и синь шабасна ульсть музейса, коса ванфтовихть военнай кизонь экспонаттне—киркатне, каймотне, рубежень труженикнень щамсна. Стане жа тясот советскяй и немецкяй солдаттнень фронтовой паршисна: фляшкат, жетотт и кядьгот, конатнень музейти максозь поисковикне.
Ветераттненди и синь шабаснонды удалась эсь сельмоса няемс васттнень, коса тиендевсь историясь. Синь ялга ётасть народть трудовой славань киганза и лоткасть удома Николаевка велеса. Лагерсь мусь васта вирьса святой Живоначальнай Троицать лихтибрянц ваксса. Тяса инструкторхне ётафтсть сюлмонь сотнемать и походнай ужинонь пидемать коряс мастер-класс.
Походть марстонь кувалмоц ульсь 17 вайгяльбе. «Тя путешествиясь аф аньцек арась возможностекс маласькодомс историяти, но ётафтомс пингть ялга ёткса и семьянь келеса, кеняртькшнемок перьфпяльть мазышинцты»,—мярьгсь «Защитники Отечества» фондть филиалонц руководителенц заместителец Екатерина Глазунова.
Спецоперациянь ветеранць Михаил Ледяйкин ульсь тя путешествияса цёранц Прохоронь и стиренц Василисать мархта. Сон виденцясь, што васенцеда няезень ня васттнень. «Сембось пяк лац арьсеф-ёрафтф, коллективсь кочкавсь пяк цебярь. А нинге тейнек удалась погодать мархта. Тяфтама мероприятиятне пяк важнайхть ветераттненди—синь пуропнихть марс и лезнихть маладомс историяти».
Стирнянцты тя походсь арась васенцекс эряфсонза. Сембода пяк мялезонза тусь ётафтомс веть палаткаса и нюрьсемс гамакса. «Обязательна молян тага!»—мярьгсь Василиса.