Зубово-Полянскяй райононь Бзновка (Новые Выселки) велень школаса работайхть ёню, асу, эсь тевонь содай учительхть. Кота кизода инголе синь ёткозост сувась физкультурань учительсь Андрей Александрович Дергачёв. Цёрась эстокиге мусь яння работас коре ялганзон и тонафнихнень седис. Кизоста кизос учениконза сявондьсазь васенце васттнень ламоц пялькстоматнень эса, конат ётнихть Зубово-Полянскяй районца и лия вастса.
Спортти Андрей Александровичень семьяса шарфневи оцю мяль. Тядяц, Любовь Петровна Дергачёва, вятсь физкультурань урокт школаса. Аляц, Александр Тимофеевич, одкс пингстокиге няфнесь цебярь результатт каратэса, армейскяй рукопашнай тюремаса. Сяс идьснонга, Андреень и Еленать, касфтозь спортти кельгомаса. Зубова Полянав секцияс-коза ашель кода арнемс, Александр Тимофеевич вете кизоса цёранц тонафнезе сонць кудса. Сяда тов Андрей Дергачёв кочказе сянь, мезсь тусь мялезонза: налхксь футболса, якась ласькондемать коряс пялькстомас. Ня маштомошитне кондястсть теенза сяда тов лисемс Президентскяй пялькстоматненди, коса сон Ново-Выселскяй школань командать мархта сявозе васенце вастть васенда Зубово-Полянскяй районца, сяльде—Атюрьеваса, а меле и марнек республикаса. Тяда меле ульсть Мордовиять эзда Всероссийскяй Президентскяй состязанияса Краснодарскяй краень Анапа ошса. 21 шиста Ново-Выселскяй школань командась, конанди вятисель Любовь Петровна Дергачёва, варчсезень виензон спортонь эрь кодама видса.
Школаса тонафнеманц шумордамда меле Андрей Дергачёв поступась Зубово-Полянскяй педагогическяй колледжу, тонафнесь «Физическяй культурань учитель» специальностьс коре. Шумордамдонза меле тусь армияв. Мзярда мрдась армияста, цёрать тердезь работама родной школазонза. Тядяц, Любовь Петровна, арась завучекс, сяс эрявсь вешемс физкультурань учитель.
«Аф эстокиге максонь согласия самс школав работама, ёрань тумс Москуву военнайкс. Кафтошка ков лацкас арьсень и лядонь школав. Тяни кота кизот работан, вестевок ашень каенда»,—мярьгсь Андрей Александрович.
«Мезсь инь стакась школаса работамста?» кизефксть лангс мокшень цёрась отвечась ламос апак арьсек: «Кда лац тонафнеть тонць и семботь маштсак, кодамовок сталма аш. Кальдяв ся, што школатнень эса аш кода анокламс шабатнень спортонь ламоц виттнень коряс. Тянди эряви цебярь инвентарь».
Физкультурань урокта башка, А.А.Дергачёв вяти шахматонь, футболонь кружокт. Аф кунара «Футбол в школу» пялькстомаса Ново-Выселскяй школань командась сявозе васенце вастть марнек районца. Мини-футболса, кона ётафтовсь мартста, 2007-2008 кизотнень шачф од футболисттне стане жа сатозь васенце вастть. Президентскяй пялькстомасовок стирнятне и цёранятне няфтсть цебярь результатт. Лиякс аш кода, кда няят учительцень эса кепотькс, ёрат улемс лацонза. Андрей Александрович сонцьке налхки учениконзон мархта настольнай теннисса, волейболса, ласьконди, тялонда арни соксса.
Андрей Александрович Дергачёв—Ново-Выселскяй велень футбольнай командать капитаноц. Кочксесыне эсь велень и мала велетнень эзда футболса налхкихнень, сявондьсыне районнай пялькстомас или мянь шабра региону—Пензенскяй области. Тяниень пингть цёратне аноклайхть футболонь пялькстомати, кона ётай велесост Тройцяста. Тя пялькстоматнень синцень историясна. Эрь кизоня ётафнесыне Андреень аляц Александр Тимофеевич ялганзон мархта. Анокласазь футбольнай паксять, тердихть командат лия велетнень эзда, кочкайхть ярмак, штоба сяльде явомс сяськи командатнень ёткса. Командада аф кржа, ётай кизоня ульсь кемонть малава: Зубово-Полянскяй, Торбеевскяй райоттнень эзда, Пензенскяй областень Спасск ошста. Футболонь эрь кизонь пялькстоматнень лемнесазь шавф ялгаснонды.
О. Белкина.