2 февральсь—Россиянь воинскяй славань дата. Тя шиня, 1943 кизоня, советскяй войскатне тапазь немецко-фашистскяй захватчикнень Сталинградскяй тюремаса.
Сталинградскяй тюремась арась переломнайкс Великай Отечественнай войнаса. Тюремать васенце пялец—Сталинградскяй стратегическяй оборонительнай операциясь—мольфтевсь 1942 кизонь 17 июльста сявомок 18 ноябрти молемс.
Немецко-фашистскяй командованиясь 1942 кизоня кизонда ёрась тапамс советскяй войскатнень странать лямбе ширесонза, фатямс Кавказть нефтань, Донть и Кубанть велень хозяйствань ширде козя районцнон, лихтемс стройста странать центральнай пяльксонц Кавказть мархта сотксонь кирди коммуникациянзон и тиемс сембе условиятнень тяса войнать шумордаманкса.
Но советскяй войскатне стясть врагть каршес, ашесть макса теенза пря и ниле ковда меле ётасть контрнаступленияс Сталинградть ала. Тюремать омбоце пяльксоц—Сталинградскяй наступательнай операциясь—ушедсь 1942 кизонь 19 ноябрьста.
Тюрематне мольсть эрь кварталть, эрь кудть инкса, Сталинградонь центральнай вокзалсь ётнесь кядьста кядьс кемголмувоксть. Ошть оборонанц пингста шавфоль и ранендафоль 700 тёжяньда лама советскяй солдат и офицер. Но тя операциять пингста советскяй войскатненди удалась кружамс и машфтомс немецкяй армиятнень инь оцю вийснон. Сталинградскяй тюремать пингста врагсь юмафтсь миллион пяле мархта ломань—виензон, конат ульсть советско-германскяй фронтса, нилеце пяльксснон. 1943 кизонь 31 январьста тя тюремаса немецкяй войскатнень командующайсна Фридрих Паулюс максозе прянц пленц.
1943 кизонь 2 февральсь арась Сталинградскяй тюремань шумордамань шикс.
1945 кизонь 1 майста Верховнай Главнокомандующайть приказонц коряс, Сталинградти максфоль «Ош-герой» почётнай лем. 1942 кизонь 22 декабрьста тевс сувафтфоль «Сталинградть оборонанц инкса» медальсь, конань мархта казьфоль 707 тёжяньда лама участник. 1965 кизонь 8 майста ошсь-геройсь казьфоль Ленинонь орденонц мархта и «Якстерь Тяште» медальса.
Сталинградскяй тюремань геройхнень колга мялямть ванфтоманкса Волгоградса улихть памятнай и историческяй вастт. Но инь содафсь эздост—«Родинась-тядясь терди!» монументсь ащи Мамаев курганца.