Старошайговскяй районць аськоляй касомань-вииямань киге

Старошайговскяй районць—велень хозяйствань район. Тяса аш завотт, фабрикат, промышленнай предприятият, кодамот улихть республикань лия райоттнень эса. Но ся, мезсь касфневи тястонь паксятнень лангса и ферматнень эса, кепси мяль. Районць аф весть лисендсь сяськикс республикань муниципальнай райоттнень ёткса, сявондезень васенце и омбоце васттнень сёронь оцю урожаень касфтомаса, лофцонь и сиволень мимаса. Тяддевок пцтай сембе хозяйстватне кизоть васенце пяленц аделсесазь оцю сатфкс мархта. Эрь шиня райононь ферматнень эзда приёмнай пункту прважсеви сядоть малава тонна лофца, маластонь пингть пяшкодевихть кота ковонь платтне и сиволень мимаса.

Оцю сатфксонь сатоманкса районца тевс нолявихть работамань сембе форматне, метоттне. Кда оцю предприятиятнень эса сяда лама мяль шарфневи од технологиятнень лангс, рамсеви тяниень пингонь техника, паксяв усксеви сатомшка минеральнай удобрения, то крестьянскяй (фермерскяй) хозяйстватнень эса аф юкснесазь и ингольдень пингонь тевонь вятемать. Главнайсь, сембе вийхне водендафт сянкса, штоба сяда лама получамс сёра, лофца, сиволь.
—Тяфта тевти малаткшнемась няфтезе, мезьса мртци тейнек семботь эсь пингстонза тиендемац, паксянь-фермань тефнень лангс оцю мялень шарфнемась,—азонды «Агрофирма «Новотроицкая» ООО-ть директороц В.А.Спирин.—Кепотьксонди, эрь шиня «Новомилк» перерабатывающай предприятияв минь прважсетяма комсь кафтувонь тонна лофца. Тя предприятиясь сувси эсь холдингозонк, сяс вельф сатфкссь—марстонь.
Мзяра киза ни мельцек кеняртьфни эсь сатфксонзон мархта «Богдановское» ООО-нь коллективсь. Тяса маштыхть оцю урожаень касфнема, и шиста шис, ковста ковс касонды лофцонь-сиволень получамась. Коллективса покодихть лама нациянь ломатть, сембонь ёткса ули фкя-фкянь мархта ладяма, шарьхкодема, кажнайсь эсь тевонц тиендьсы оцю ответственностень марязь.
—Ётайхненди-потайхненди ширесонк васта аш,—азонды хозяйствань директорсь С.С.Якомаскин.—Дисциплинась—васенце вастса, сонь эздонза ащихть хозяйствать сяда тов виияфтомац, экономикать кемокстамац. Сярятькстсь, кепотьксонди, ломанць, вастозонза лиси покоди ялгац. Но, кда работама кие-бди ашезь лисе копорямада меле, тяфтапненди минь коллективсонк васта аш.
Хозяйстваса кочксихть козя урожайхть, кизоста кизос пяшкотькшневихть платтне лофцонь и сиволень мишендемаса. Ётай кизотнень коряс касомась лувондови аф процентса, а ламонь-крда. И тянкса оцю работа тиенди сонць хозяйствань вятись Степан Якомаскин. Вожиятне эсь тевонь кельги, афкуксонь азоронь кядьсот. Сон семботь кирдьсы контроль ала, эрь шинц ушеткшнесы механизаторхнень и фермаса покодихнень мархта васедемаста. Максси теест советт, азонды шнамань валхт оцю сатфксонь сатоманкса. И ломаттне тянь сявондьсазь мяльс, тевснон тиендьсазь лац, эсь пингстонза.
Старошайговскяй районца оцю мяль шарфневи ёмла и средняй бизнесть касфтоманцты-виияфтоманцты. Тяса кунара ни ноляйхть колбаса и колбаснай изделият, панчсевихть аф оцю пекарнят, касфнихть люкшя, полба. Тя тевса оцю путксоц предпринимательть А.И.Фроловонь. Сон рамси од оборудования, панчси цехт и ня площаттнень макссесыне арендас сятненди, кинь ули мялец нолямс эрявикс продукция. Индивидуальнай предпринимательть, мокшавать Ольга Пьяныхть колбаснай изделиянза шнафт нльне «Зрнянь сёксе» Всероссийскяй велень хозяйствань продукциянь выставкаса, теенза максфт медальхть.
Сире Шайгавса мекольдень пингть вятевихть строительнай работат. Тяса стройсевихть эрямань од кутт, культурань объектт, кит, «Городская среда» национальнай проектть вельде петневихть и кирдевихть арушиса ёмла и оцю ульцятне. Мяль вельде кемокснихть од договорхт инвесторхне, аф лядондыхть ширеса и меценаттне. Лама объект районца панчф пара ломаттнень участияснон вельде. И тага весть лятфтасаськ Степан Степанович Якомаскинонь лемонц. Тя сон макссь ярмакт Сире Теризморга велеса Народнай писательти Илья Девинонди памятниконь панжемс и Богдановка велеса Культурань кудть петемс. Тяда инголе нолдась миллиотт цалковай Сире Шайгав велеса войнаса шавфнень лемс памятниконь панжемс. И видекс, лятфтасайть валхнень—мирсь кирди цебярь ломань вельде, синь—Шкайть цёранза, стиренза! Тяфтама ломаттнень цебярь тевснон вельде велень цёранятне и стирнятне тонафнихть тяниень пингонь школаса, якайхть Культурань центрав, спортивнай площадкатнень эса налхксихть футболса, волейболса, хоккейса. Тянди водендафт и районнай администрацияса покодихнень вийсна, коса комсь киза ни оцюнякс Г.А.Мухин, кона лемдезе сембе эряфонц кельгома райононцты. Кда сембе вастова улель тяфта, эста ламось кеняртьфтель!
Н.Лобанов.
Фототне авторть.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

ПЕТРОФНЕНЬ СЕМЬЯСНА—ИНЬ ОЦЮСЬ АРГАСА

Атюрьевскяй райононь Арга велесь кирди Петрофнень вельде. Тячи тяса...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...