Ня шитнень «Мокшень правдать» редакцияс сашендсь инжикс мокшалясь Пьянзов В.Б. Сон сась аф шавонь кятть, кандозень стихонь колма сборниконзон. Фкясь мокшекс и лемдезе «Шачем шире—кельгом веле», кафттне рузкс: «Ода жизни» и «Оглянись вокруг», конатнень казезень редакциять коллективонцты.
Тячи лувиеньконь содафтсаськ стихонь сёрмады тя ломанть мархта.
Шачсь В.Б.Пьянзов Рузаевскяй райононь Перхляй велеса сокаень-видиень семьяса—родителенза работасть «Подлесный» совхозса. Эсь шачема шинц колга Виктор Борисович азонды тяфта: «Шачень 1963 кизонь ветеце январьста. Тядязе, Анастасия Семёновна, ульсь Шкаенди верондай ломанькс. Сон и корхтай, што Шкайда инголи аш кода шачемс, сяс и сёрматфтозь монь шачема шизень Роштувада меле, 10-це январенди».
Инжиеньконь аляц, Борис Емельянович, нинге шабакс ушедсь работама совхозса, васенда комбайнёронди лездыкс, сяльде комбайнёркс. Мярьгихть, зиянць пильгалда лиси. Паксяса работамста крьвязсь розь паксясь. Кемготува кизоса цёрокшсь, аф арьсемок эсь колганза, ушедсь толть матома. Ся зиянца сон лядсь кядь сурфтома, сянкса аралафоль совхозонь паксясь.
Виктор Борисовиченди родителенза фалу ульсть примеркс. Сон «ветеса» аделазе Перхляень средняй школать. Сяльде тяфта жа цебярьста—Рузаевкань 8-це техническяй училищать, получась специальность—радиоаппаратурань 3-це разрядонь монтажник. Армияса служась Дальняй Востокса связень башка ротаса ЗАС-станциянь начальникокс, сержантонь званияса. Лац служаманкса казьфоль «Отличник ВВС» мяштьса канневи знакса.
Армияда меле тонафнесь Н.П.Огарёвонь лемса МГУ-нь электроннай техникань факультетса, конань аделамда меле получась электроннай техникань инженеронь специальность. Но тянь лангса алясь ашезь лотка. Сон нинге аделазе Нижегородскяй юридическяй институтть. Юристокс лац покодеманкса казьф кафта медальса и мяштьса канневи лия знакса.
Рьванц, Елизавета Емельяновнань мархта касфтсть кафта итть, конат музь эряфса эсь вастснон и казсть теест ниле унокт.
Ужяленди, Виктор Борисовичень рьвац тяни аш шиса, но сон фалу ащи сонь седисонза и ёньцонза.
—Кельгома рьвязе ульсь васенце кулхцондызе. Сонь пяк тушендсть мялезонза монь стихоне,—азонды алясь.
—А кода ушедоть стихонь сёрмадома?—кизефнеса сонь.
—Тя ульсь нинге школаса тонафнемста,—отвечась корхни ялгазе.—Стихоне ульсть велезень, перьфпяльть мазышинц колга. Сяльде венемонь лия тематнендивок.
И видекс В.Б.Пьянзов тяшти семботь колга, мезе няи: ломаттнень, велеть, перьфпяльть ваймонц тарксеманц, кельгомать колга. Шарфни мяль и пеетькшнемань-сингорямань темати. Стихонза лувовихть тёждяста, сяс мес сёрматфт ару мокшень кяльса, рифмац ладяф—моркс морави.
Кизефксозень лангс, мезе максы теенза стихонь сёрмадомась, Виктор Борисович эстокиге отвечась:
—Максы вий эрямс. Ёран кадомс эсь мельган китькскя, лятфнембяль.
Инжиеньконь лама ялгадонза, мокшень ломаньда, лия масторса. Интернет вельде синь содафтыхть творчестванц мархта. И азондсазь эсь мяльснон. А тя максы стихонь сёрмадыти пацят, вдь сонь валоц маряви-кулеви ичкозе—ширесовок.
2012 кизоста сявомок В.Б.Пьянзовонь стихонза печатлавихть «Мокша» и «Якстерь тяштеня» журналхнень эса. Тячиень номерса «Мокшень правдаське» содафтсыне лувихнень Пьянзовонь стихонзон мархта.
Любовь МАРКИНА.
Шабакс пингстонь айгор
Тя кунара мархтон ульсь,
Нинге школав ашень яка.
Аннемань ки лангонь пульсь,
Вастсон ащекшень мон сяка.
Учсине, монь вакскан лийсь
Ляйнять шири айгорсь вармакс,
Няевсь эсонза од вийсь.
Ардсь, и модась нльне тарнась.
Копонц пиндолфнезе шись,
Бта валфоль сон зрняса.
Инголенза кели кись
Цифтордсь раса путьконяса.
И вов тяфта кизоньберьф
Ванонкшнень тя айгорть лангс мон,
Стаки шарондонь ляйть перьф,
Прашендсь стака канксне лангстон.
Мялезон пяк пара ульсь,
Сембе кальдявсь эздон ётнесь.
И идькс пингонь кистон пульсь
Тяни онненди монь ётни.
Сирелгодонь
Ялгат, касыхть кизоне.
Стакалгоды канксозе.
Шамсь кунара пизозе.
Аф сотови карксозе.
Тердявсть отькорь пильгоне.
Лац аф няихть сельмоне.
Кадомазь, кинь кельгине.
Кудсон кельме, сетьмоня.
Лядсь монь мархтон катозе,
Сонга тряма-андома.
Пингсь пульнязень матозе.
Эсь крёзозе кандома.
Шкабаваскяй, простямак,
Ванфтк монь грешнай ваймозень.
Седи лангстон пеженди
Аноклайне каймозень.
Кизонь шобдава
Ёндолкс ётась кизонь весь.
Зарясь лиссь и шобдась солась.
Нинге удось веле песь,
Но шись кошардсь: «Стяда, нолат!»
Велесь сргозсь. Велесь стясь.
Моразевсть атёкшне пяк ни.
Нльне кашкомсь ётксост фкясь,
А лиятне кукарекнайхть.
Постуфсь стаданц лугав лихтсь.
Шабась ляйняв мацихть пани.
Бабась кудса вайня пихтсь,
Авась шабанц эса ванни.
Алятне кеподсть од куд.
Эчке тумот алга марасть.
Сталмосна—тёжяньшка пуд,
Кеподемста марса арасть.
Кие паксяса тев мусь.
Кие кочки перень сёрот.
Кие пангс ни вири тусь.
Аш мзярда морсемс морот.
Велеряйти кизонь шись
Питни, тялоньберьф тряй-анды,
Ливозьса сатневи кшись,
Эрь шись сонцень тевонц канды.
Якан шачема ширьге
Тячи менельсь сенем, мани,
Шись эсь валда моронц морай.
Лямбе кожфкя вармась пани,
Мезь исяк ульсь, азомс ёран.
Нюрьгсть пря вельхксса равжа туцят,
Ёндолсь няфнезе толгяленц.
Шкайть лемонц эсь пачкан кунцень,
Изень шашта вастста, пелень.
Пиземсь мольсь аф лама пинге,
Сельмоведец шудесь ару.
Коськста ашезь када киньге,
Мяльсон сяка ульсь пяк пара.
Куду сань мон кепотьф мяльса,
Пиземсь ваймозень монь штазе.
Лувонь книга мокшень кяльса,
Стихне сувсесть седис, прязон.
Шачем вели срхкан, молян
Вири пангс и луга лангста.
Кочкан кенярдема, воляс
Мяндян мяльнень, ваймоть андса.
Учса кельгомать
Ётак эряздоня, пинге!
Мезе ащат келуть ала?
Аяш кельгомазе нинге.
Соньфтомонза кизось—тяла.
Аяш эрьгя учемс саманц.
Сединязе пайгокс шави.
Мяльсон няемс валда шаманц.
И мзярс тейнь учемс сави?
Вармась кяжда уфай алга.
Ковнясь шары менельть прява.
Марявсь мора куттнень фталда.
Сай монь кельгомазе. Нява!
Келуть вармати аф синнемс,
Туцятне пря вельхксса шаштыхть.
Тячи павазсь ули минне,
Учемань пингсь вов ни машты.
Вазня
Вазнясь сотнефоль лугаса
Кизонь мани пси шиня.
Вазняняти пароль тяса,
Порендсь пиже тишеня.
Аньцек сетявста аф ламос
Ащесь ямбарсь луга лангса.
Аеркс пуропт вжнайхть, прамошт,
Пупсихть, бта оржа цянгса.
Пулонц лиеньфтьсы сон локшекс,
Панци эсост копонц лангста.
Прянянц веляфни атёкшекс,
Ранги-парай лугать лангса.
Веронь потяйхне вазть «сивозь».
Эздост кяшемс аяш васта.
Ронгонц эса валы ливозсь,
Сави ворьгодемс ни тяста.
Шавф крхкаста тумонь кольясь.
Нарде пиксть аф сязьсак курок.
Аньцек мянема вдь воляс.
—Пря аф максан, кяжи пуропт!
Пулонц кеподезе стяда.
Врьгятсь шири, мезель вийсь,
Пикссь изь сязев, кргав кадовсь,
Менель тёкшти кольясь лийсь.
Вазнясь пачкодсь эшксти, карду,
Кеняртьф мяльса тов сувась.
Азороц аф няфти парда,
Пирьфса пинесь пяк увась.
«Кельмонь тапаф»
Санясь серес пяк ни ёмлаль,
«Кельмонь тапаф» мярьгольхть тянкса.
Мезе азомс, цёрась нолаль,
Ваймосель най пянаклангса.
Но пяк оржаль Санять кялец,
Сембонь обжамс валнят мушендсь.
Кда конак сашендсь пялост,
Сельмоведьса ломанць тушендсь.
«Кельмонь тапафть» мяльс пяк пароль,
Сяс эсь прянянц ёнюкс лувсь сон.
Рахаль, нльне ронгоц тароль.
Аньцек сяльде пинекс сувсь сон.
Лисендсь кудста ялга ёткс
(Тяса учендсть Санять эса),
Кайсесть ладняс кафцьке бокс,
Марявсь цёрась велеть песа.
И мзяршкас тяда меле
Кургонц сёлгондозе. Якафтсь
Сетьмоняста. Корхнесь велесь:
«Кургти соткс сотсь «Кельмонь тапафсь»
Ётнесь пяк аф лама пинге,
Сон уставсезе эсь «моронц»:
«Кельмонь тапафть» пикссезь нинге,
Но аф кадсы «моронц» цёрась.