Стройсевихть кутт, эвондакшнихть од ульцят

Ковылкинскяй райононь Мокшень Коламас велеть историяц ушедсь XVII векста. Учёнайть И.К.Инжеватовонь топономическяй словарьсонза сёрматф, што тя велети васенце юронь нолдайкс ульсь мокшень алясь Коломас.
Ётнихть кизотне, а велесь стаки эряй, полафни, мазомкшни. Тяса ули мезень лангс каямс сельме, кеняртькшнемс тястонь эряйхнень инкса. Велеса стройсевихть од кутт. Молодёжнай ульцять лемоц корхтай сянь колга, што тяса эряйхть од ломатть, конат покодихть «Коломасовское» ООО-са, школаса, идень садса, Культурань кудса, лия вастса.
—Веленьке полафни цебярь шири,—азозе Мокшень Коламас велень администрациянь оцюнясь В.К.Исаев.—Эрь кизоня велесонк стройсеви вете-кота од куд, ламотне одкстопневихть.
Тядде «Безопасные и качественные дороги» национальнай проектть мяльс сявозь, велеса кись ацаф асфальтса. Кить строяманц мельге ванць райононь оцюнясь И.Н.Бутяйкин. Сон шназень строительхнень цебярь работаснон инкса, арьсесь теест шумбраши и тевса оцю сатфкст.
—Мон арьсян, маластонь пингть веленьке кармай фкясь инь цебярьхнень ёткса аф аньцек районца, но и марнек республикаса,—мярьгсь велень администрациянь оцюнясь Виктор Исаев.—Кеняртьфти и ся, мес вели ушедсть мртцема ся велеряйхне, конат инголи тушендсть ошу эряма. Минь лезттама теест куттнень и модать лангс документонь оформляндамаса, кудснонды ведень, газонь нолдамаса. Оттненди мушендови работа велень хозяйствань предприятияса. Финцне покодихть фермаса, лиятне соксихть-витцихть паксят, касфнихть сёра. Кинь ули мялец, сада эряма ширезонк, учтядязь.
Мокшень Коламас велеса шачсь лама содаф ломань. Синь ётксост Российскяй Армиянь генералсь-лейтенантсь, Оборонань министерствать артиллерийскяй управлениянц начальникоц Николай Михайлович Паршин, Мордовиянь Верховнай Советть ингольдень Председателец Николай Васильевич Бирюков, содаф предпринимательхть, искусствань и культурань работникт. Велеса эрясь и тязк калмаф Советскяй Союзонь Геройсь М.Т.Антясов, конань портретоц мазопнесы велень мемориальнай комплексть. Войнаса шавфнень лемсна апак юкстакт, синь эрь эряйть седисот, маряйхть инксост гордость.
Н.Лобанов.
Фототне авторть.