Большеберезниковскяй районца ётафтовсь Сурскяй оборонительнай рубежть реконструкцияц. Мордовиянь сембе райоттнень эзда, а стане жа Чувашияста активисттне сявозь кядезост киркатнень и каймотнень, штоба историческяй вастса—тоса, коса мзярда-бди ётась тя рубежть фкя участкац,—няфтемс, кода 1941-1942 кизонь тялоть покодсть синь атянь-атясна и бабань-бабасна.
Мордовиянь Оцюнять Артём Здуновонь лемста реконструкциянь участникнень приветствовандазень Администрациянь Руководительть заместителец—МР-нь Оцюнять и МР-нь Правительствать Администрацияснон Управлениянц начальникоц Александр Ратников.
—Сурскяй рубежсь—тя ризфонь, но тяконь мархта Мордовиять историяса славнай страница,—мярьгсь сон.—Тя ащи республикань эряйхнень трудовой подвигснонды символкс. Ламонцненди Сурскяй рубежсь арась аф аньцек араламань, но и эсь эряфонь кинякс.
Рубежть строямаса участвовандась Мордовиянь пцтай 70 тёжянь эряй. Аватне, подросткатне и сиренятне тиезь семботь, штоба перямс фашисттнень киснон.
Старшай поколениясь мяляфтсы, кодама стака условияса мольфтевсь работась: 40 градусонь цят якшамсь, эрь шинь тевсь. Ломаттне тисть афкуксонь подвиг. Мордовиять территорияса оборонительнай рубежсь строяфоль 45 шиста.
—Эрь кизоня, апак содак солдатонь шиня, минь кочксефтяма тяса, сяс мес сай пингонь поколенияти эряви содамс историческяй тя вастть колга, тылонь труженикнень квалма,—мярьгсь реконструкциять организатороц Сергей Косынкин.—Пяк пара, мес реконструкцияса примасть участия Мордовиянь сембе райоттне и шабрань Чувашия Республикаста минь ялганьке. Оцю лезкс реконструкциянь тиемати макссихть Мордовиянь Оцюнясь Артём Здунов, Военно-историческяй обществась и ветеранонь организациятне.