Велет, велет. Эрть эздост сонцень козя историяц. Тянь ули кода азомс и мокшень велетнень колга. Пцтай сембонь эздонк бокононьке ёрдафт тя или тона вели, коса шачеме-касоме, васенцеда кулеськ мокшень кяльса азф валть. Ужяль, кой-кона велетне—ёмла родинаньке—пцтай юмсихть. Но, павазонди, улихть мокшень велет, конат эряйхть вандыень шить лангс надиязь и кеняртьфнихть эсь сатфксснон мархта. Фкясь эздост—Рузаевскяй муниципальнай райононь Сузгярьге мокшень велесь, кона аф кунара васьфтезе эсь Шачема шинц и пуропнесь пяк лама ломань, конатнень эзда ламотне—тяса шачфт-касфт.
Кода Сузгярьгсь васьфтезе эсь 360 кизонц—азонттама тячи газетаса.
Августть ушетксста Сузгярьге мокшень велесь васьфтезе эсь Шачема шинц. Тя велеть пяк козят историяц, коенза, но инь питнись—ломаттне: пара ваймотне, трудонь кельгихне, инжиень васьфтихне. Синь аф аньцек кородозь ванфтсазь койхнень-обуцятнень, но и «макссесазь» синь од ломаттненди.
Велень клубть ваксса площадкась пяшксель ломаньда. Велеряйхне илати анокласть инголенди, тиезь тянь седикс-ваймокс, марстонь вийса.
Башка васта занцесь ярхцамбяль мархта площадкась. Сонь аноклазь Сузгярьгонь эрь ульцянь эряйхне. Инжихненди ульсь кода питнефтома варжамс национальнай ярхцамбяльхнень и кудонь пидефть-паньфть.
Велеряйхне, тяконь лувксса и шабатне, национальнай щамсотольхть и гордостень марязь пачфнесть содаф землякснон и тястонь койснон-обуцяснон колга. Эрь ульцясь няфтезе эсь прянц сембе ширде.
Велеть 360 кизонь топодеманцты лемтьф илась мялень салаель и арьсефоль. Оцюфненди работасть мишендемань ряттне, иттненди—налхксемань зонатне, мазоптфтольхть декоративно-прикладной искусствань мазыдонга мазы выставкатне, аф фкя лацонь фотозонатне, тифтольхть шабатненди налхксемань площадкат.
Илати тертьфтольхть Рузаевкань Центральнай модельнай библиотекань сотрудникне, конат пуроптозь библиоплощадкать работанц, коса тифоль «Сузгарье: время, книги, люди» книгань выставкась. Сузгярьге велень библиотекань заведующайсь Нина Зуева аноклась «Сузгарье в объективе» фотовыставка, коса няфтьфтольхть мокшень велеть колга фотографият.
Сценаста кулевсть поздравленият велень поселениять и сонь эряензон лемс. Сузгярьгонь эряйхненди приветствиянь валхт азсть Рузаевскяй муниципальнай райононь оцюнясь Александр Юткин, Рузаевкань Почётнай гражданинць, Агро «К-С» ООО-ть директороц Николай Амбаев, Мордовскяй народть Межрегиональнай общественнай организациянц председателец, филологическяй наукань докторсь, профессорсь Юрий Мишанин, Войнань, трудонь, Вооруженнай виень и правоохранительнай органонь ветеранонь Советть председателец Николай Мальченков, Сузгярьге велень поселениянь оцюнясь Геннадий Кажаев и лия оцю инжихне.
—360 кизось—тя аф аньцек цифра, а тёжятть ломанень судьба. Сузгярьгсь содаф эсь ёню, асу, инжиень кельги и пара вайме ломанензон мархта. Атянте и атянтень алясна честь и достоинства мархта аралакшнезь Родинаньконь Великай Отечественнай войнань кизотнень.
Тяниень пингть ламоц земляконьте передовойсот, специальнай военнай операциянь ётафтома вастсот,—мярьгсь пуромфненди Александр Юткин.—Мялезе азомс спасиба трудонтень, великай Россияти патриотическяйста малаткшнемантень инкса. Эрь кизоня велесь панчфокс панжи, келеми, строявихть од кутт, сембе вастова аруши и порядка. Тяза сашендыхть эряма и работама од семьят. Сузгярьгсь—райононь инь мазы велень поселениятнень эзда фкясь. Кеман, што сонь оцю вандыень шиц.
—Аш сяда мазы и мала шачема масторозень коряс! Сузгярьгсь—модань пяк мазы уженясь. Шачень и кондястень тяса! Эрямс велеса—оцю паваз. Марян гордость земляконень инкса, конат тиендьсазь содафокс краеньконь,—азозе Николай Амбаев.—Тядде кеняртьфтихть показательхне касыксонь и жуватань касфнемаса. Тяниень пингть одкстопнесаськ Святительть Николай Чудотворецонь храмонц, конанди 200 киза. Курок педа-пес петеви тястонь школась. Марстонь вийса, фкя оцю и ладяй командакс работамста тейнек сембось сатови.
Тя шиня максфтольхть грамотат и Благодарностть Сузгярьгонь инь активнай и аф озадонь седихть ащи эряйхненди, конат эсь тевснон и путксснон мархта лездсть ёмла родинаснон виияфтоманцты и панчфокс панжеманцты. Ашезь юкста и велень эряфкшу ломаттнень.
Илась поладовсь концертнай козя программаса. Рузаевскяй райононь велень поселениятнень эзда творческяй коллектифне, А.В.Ухтомскяень лемса Культурань центрань артисттне и «Казачья вольница» казачьяй моронь ансамбльсь кеняртьфтезь ваныхнень творческяй номерса. Шабатне лувсть стихт, морасть морот.
Велеть шиц, кона ульсь 2 августста, аделавсь эсь лацоннекс: сембе пуромфне ётафтовсть рушникнень алга павазонди и ламос эряманди, а меле марса фкя-фкянь мархта, моразь, якасть хороводса.
Сузгярьги сашендсть аф аньцек шабрань велетнень эзда, Рузаевкаста, Саранскяйста и Мордовиянь райононь эряйхне, но и сят, кит эряйхть Москуса и лия ошнень эса. Аф ваномок вайгяльбетнень лангс, ванфтсазь сотксть ёмла родинаснон мархта. Ламотне илас сашендсть семьянь келеса.
Илять тястонь Культурань кудса ётафтовсь ретродискотека.
Материалть аноклазе
Татьяна Владимирова.