СВО-нь Участниконь шись—Инсар ошса

Мордовиянь райоттнень эзга ётафневихть СВО-нь Участниконь шит. Тя мяльть кирдезь республикань Оцюнясь Артём Здунов, Стратегическяй инициативань агентствась, «Защитники Отечества» Государственнай фондть руководителец Анна Цивилёва.
11 ноябрьста Инсар ошса ётафтовсь СВО-нь Участниконь шись. Сонь главнай задачац—лездомс эстокиге, пингонь апак тарксек. Пшкядематнень ванондозь—МР-нь Правительствань социальнай блоксь, юристсь, врачень бригадась (реабилитологсь, психологсь, терапевтсь), региональнай сервиснай уполномоченнайсь, «Защитники Отечества» Фондть и Социальнай фондть руководительсна, военнай комиссариатонь представительхне.
Приёмть пингста кепсевсть СВО-нь участникнень мала ломаньцнонды казнетнень максомаснон колга кизефкссь. Фкясь эздост торжественнайста максови Отечествань Героень шити лемтьф мероприятиять пингста. Решандафтольхть боецнень семьянь членцнонды соцзащитань мератнень максомаснон, эряма вастонь получамать коряс пшкядематне.
«Минь тячи примаме и ваноме СВО-нь участникнень мала ломаньцнон эзда 12 пшкядема,—азозе васедемать пингста МР-нь Правительствать Председателенц васенце заместителец Галина Лотванова.—Кизефксне аф фкя лацоннет, и сембе сявфт контроль алу. Азса, што задачась, конань инголенк путнесы республикань Оцюнясь лезксть, консультациятнень и мобилизованнайхнень и доброволецнень семьяснон кизефксснон решандаманкса, пяшкотькшневи. Фкявок пшкядема, фкявок прябала аф ляды апак ватт. Пяк пара, што профильнай ведомстватне и службатне седи ваксста малаткшнихть СВО-нь зонаса участвовандайхнень мала ломаньцнонды».