СВО-нь ветеранць азондсь кадеттненди мужествать колга

Спецоперациянь ветеранць Андрей Елькин васетькшнесь Саранск ошень 40-це школань кадеттнень мархта. Тя школаса тонафнихть и сонцень шабанза. Мероприятиять арьсезе ётафтомс «Защитники Отечества» фондть филиалоц «Служан Отечествати» патриотическяй проектть мяльса кирдезь.
Васедемаса примасть участия 9-це классонь тонафнихне. Андрей Елькин азондсь теест Сирияв и Ливияв командировканзон колга. Стане жа корхтась спецоперациять квалма. Алясь ульсь СВО-са доброволецокс 2022 кизонь июльста сявомок, сапёроль. Кизоста машфтсь сядот вражескяй мина, мезть мархта ванфтозе кода личнай составть, стане и мирнай эряйхнень шумбрашиснон и эряфснон. Боевой задачатнень лац пяшкодеманкса Андрей казьф Мужествань орденца и «Отечествать инголе заслуганкса» II степенень орденонь медальса.
«СВО-нь зонаса службать пингста ушеткшнят макссема оцю питне анцяйнятненди,—азозе ветеранць шабатненди.—Мирнай эряфса аф шарфнят оцю мяль ярхцамбяльти, ведти, щапненди—тя сембось тонь ули. А фронтса сидеста сашендови явондомс мекольцеть боевой ялгатнень мархта, лезнемс мирнай эряйхненди, конат повсть эряфонь палас. Минь сявондеме шефства лама идень семьять лангса, коса касфтовсть колма шабат. Пачфнеме теест ярхцамбяльхть и инь эрявикс паршихть, лезнеме решандакшнемс бытовой и личнай кизефксснон».
Ветеранць спасибась шабатненди сёрмаснон инкса, конатнень синь тяшнесазь фронту, и арьсесь, штоба мала ломаньцна, конат тяни пяшкотькшнихть воинонь долг СВО-нь зонаса, мрдальхть куду шумбраста-тазаста. «Кирнесть тинценнетнень ширеснон—тя теест афкукс пяк эряви»,—поладозе Андрей.