СВО-нь ветеранць васетькшнесь студенттнень мархта

Саранскяень электромеханическяй колледжса ётась СВО-нь ветеранть Сергей Пронькинонь мархта студенттнень васедемасна. Мероприятияса ульсть МР-нь Оцюнять старшай советникоц Татьяна Алиходжина, «Торама» фольклорнай ансамбльть директороц Андрей Николаев, «Новые решения» ООО-ть директороц Михаил Иванов и Краснослободскяень аграрнай техникумть директороц Геннадий Ятайкин.
Сергей Пронькин азондсь эсь боевой кинц колга. Од территориятнень эса мольфтеви тефненди мяль кармась шарфнема 2014 кизоста сявомок. Мзярда 2022 кизонь февральста ушедсь специальнай военнай операциясь, арьсезевсь контрактть колга. Сяка кизонь августста Сергей кемокстась контракт Оборонань министерствать мархта. Васенда ульсь КамАЗ-онь водителькс, а меле—отрядонь командиронь тевонь тиендикс. «Тейть ульсь пелькс»?—кизефтезе студент-
тнень эзда фкясь. «Конешна. Тоса сембонди пелькс, минь вдь ломаттяма»,—отвечась ветеранць.
Сергей лятфтась история, мзярда ялганзон мархта ульсь велеса, коса мирнай эряйхне васьфтезь синь благодарностень вал мархта. Фкя авась кирдсь кядьсонза идь. Водительсь сявозе семботь, мезе ульсь танцтиняц, и тусь шабати. Мельганза—сонь землякоц Петруха коське пайёкнень эзда шоколадкатнень мархта.
«Семботь максоськ шабати. Сон люпштазень эстеенза и аварьгодсь. Эста шарьхкодень, мезе стамсь иттнень инкса, конат аф муворуфт тя войнаса, пелемась»,—сельмоведеньбачк виденцясь алясь.
Нинге лама кизефкс максфоль. Пуромфне ёрасть содамс, кода эряйхть-ащихть солдаттне, мезьса заняфт СВО-да меле, ветеранть боевой кинц колга и конашка васта «лентанять тона ширесонза» занцихть идень сёрматне. Кизефкснень лангс спикерхне макссть крхка и виде ответт.
Меле Сергей Пронькин и Татьяна Алиходжина казезь Благодарностьса и «За помощь и милосердие» медальса сятнень, кит заняфт доброволецонь тефнень мархта.
Казьфнень ёткса ульсть колма цёрат—Артемий Кузьмин, Владислав Шиндясов и Кирилл Варламов. Синь—омбоце курсонь студентт. Несколька ковда инголе мяльснон салазе ся, мезе тиенди преподавательсна колледжень гаражса. Эста Виталий Лапшов тись ремонт машинати, штоба максомс сонь СВО-нь зонав. Студенттне азсть мяль лездомс теенза, Виталий Юрьевич кенярдезь примазень синь. Васенце машинакс ульсь УАЗиксь, мастерхнень командасна петезе, архтозе и максозе сонь спецоперациянь боецненди. Ремонтонь тиемс автомобильхть студенттненди усксихть марнек Россияста.
«Ялгань келеса шарьхкодеськ, што тееньк ули кода лездомс мезьса машттама. Нинге шабакс лезнень алязти тиемс ремонт машинати, тя тевса шарьхкодян. Тяда башка, примсян участия маскировочнай сетень кодамаса и гуманитарнай лезксонь кочкамаса»,—азозе Артемий Кузьмин.
Васедемать шумордамста колледжень преподавательсь Светлана Родина лувозень эсь стихонзон.