СВО-нь ветеранть историяц сувась Захар Прилепинонь сборникс

Москуса ульсь азксонь и стихонь омбоце сборникть презентацияц, конанди авторкс арасть СВО-нь участникне. Нолдаф сон «Защитники Отечества» фондть ширень кирдеманц вельде и лемоц «Нет уз святее товарищества».
Сборникти сувась 43 произведения, конатнень кочказень Захар Прилепин фондть марнек странаста филиалонзонды саф 750 историятнень эзда. Тяконь лувксса—Мордовияста СВО-нь ветеранть Сергей Пронькинонь азксоц. Земляконьке тусь фронту эсь мяльс коре. Тиендезень мотострелковай ротань командирть тевонзон, примась участия Мариуполь, Волноваха, Счастье и Кременная населённай пункттнень территорияснон лангса боевой действиятнень эса. Тюрематнень пингста повсь артобстрел алу и получась стака травма, конань сюнеда сяда тов служамс ашель кода.
«Поляки напали» лем ала азксоц—«Эрьзя» позывной мархта боецть историяц. «Эрьзясь» шобдаста эльбафтозе лиянь «Уралть» сонценнеть мархта и ушедсь Москуста военнослужащайть техникаста панемонза. Тияк сон кармась корхтама родной кяльса. Мархтонза служайсь, сргозембачк, эводсь аф шарьхкодеви кяльть эзда и сась мяльс, што врьгятсть полякне и тревогас коре кеподезе марнек взводть.
«Фронтовой сембе историятне важнайхть и эрявикст,—корхтай Прилепин.—Вельдест обществась сотци СВО-нь зонаса цёратнень квалма, конат кандыхть аф тёждя служба. «Защитники Отечества» фондти азан благодарностень валхт ветераноньконь ширеснон кирдеманкса и историческяй видешить ванфтоманкса! Историяньке эряви касы поколенияти, кона воспитандама Родинати кельгомань и патриотизмань кепотькснень лангса».
СВО-нь ветераттнень азксснон мархта васенце сборниксь лиссь февральста «Жизнь за други своя» лем ала. Эзонза стане жа сувась Мордовияста СВО-нь ветеранть Ренат Исмаиловонь историяц. Сон пачфтсь алянц, Миразымонь мархта службать колга.