СВО-нь ветераттне ётафнихть патриотическяй васедемат

Мероприятиятне ётнихть республикань сембе райоттнень эса «Защитники Отечества» фондть филиалонц социальнай координаторонзон ширень кирдемаснон вельде.
16 октябрьста Кемлянскяй аграрнай колледжть ромодановскяй филиалсонза ётась «Важнайть колга корхнема» тонафнемань заведениять шумордаенц—специальнай военнай операциянь ветеранть Александр Бочковонь мархта.
Колледжса тонафнемста сон «Поиск» поисковай отрядонь активнай участниколь, заняфоль Великай Отечественнай войнань шавф участникнень колга мялямть сембе пингоннекс тиеманц мархта.
«Спасиба историянь преподавателезти и «Поискть» командиронцты Иван Алексеевич Селиверстовонди. Самай сонь вельденза сотыне эряфозень Отечествать араламанц мархта»,—мярьгсь ветеранць. Дипломть получамдонза меле Александр тусь армияв, меле тонафнесь Рязанскяй гвардейскяй высшай воздушно-десантнай команднай училищаса, получась механиконь профессия. Подписандась контракт РФ-нь Оборонань министерствать мархта. Васенце шиста сявомок старшай прапорщиксь Бочков ульсь СВО-са, казьф Жуковонь медаленц и «Боевой отличиятнень инкса» медальть мархта.
Луховскяй лицейса ётась СВО-нь ветеранть Павел Пронькинонь васедемац. Цёрась сашендсь инжикс 7Б классонь кадеттненди. Павел васенце шиста сявомок ульсь «лентанять» фтала, служась мотострелковай полконь ремонтнай ротаса Харьковскяй направленияса. Сон азондсь иттненди сянь колга, кодама стака-сталма мархта савсь васьфтемс СВО-са и кодама задачат пяшкотькшневсть, а нинге азсь благодарностень валхт сёрматнень инкса, конатнень стирнятне и цёранятне тяшнесазь фронту.
Кемлянскяй школаса ётась «Мужествань урок», коса примась участия спецоперациянь ветеранць Виктор Скузоватов. Несколька кизода инголе сон шумордазе тя школать, а тядде сонь цёрац сась васенце классу. Урокть пингста стирнятне и цёранятне макссесть аралайти кизефкст. Башка мяль шарфтфоль офицерть казнензонды. Васедемась ашезень када иттнень озадонь седихть ащема—ламоц цёранятне азсть мяль арамс военнайкс, штоба улемс аралайть Скузоватовонь лаца.