Саранскяень машина кинь вокзалу сась вастста вастс «якай» «Сяськомань поезд» музейсь. Выставочнай проектсь лемтьф Великай Отечественнай войнаса сяськомати. «Защитники Отечества» фондть филиалонц лезксонц вельде сонь ванозь СВО-нь ветераттнень семьясна.
«Сяськомань поездсь»—мирса фкя сяка иммерсивнай инсталляциясь. Сонь основазонза путф войнать колга документальнай историясь, конань азондозе ветеранць-железнодорожниксь. Экспозициясь тиф 9 ваготтнень эса, эрсь эздост лемтьф Великай Отечественнай войнать тя или тона пяльксонцты. Выставкати сувсихть военнай пингонь тя или тона предметтне и паршихне, а нинге ломанень серьса скульптуратне, конатнень шамасост няфтьфт сярятьфсь, пелемась и Сяськомати кенярдемась. Тя сембось тиендьсы выставкать афкуксоннекс и бта ванысь сонць тоса.
«Пяк цебярь экспозициясь,—мярьгсь спецоперациянь фкя ветеранть тядяц Елена Дудорова.—Молень поездть эзга, кулхцондыне экскурсоводть азксонц и бта повонь войнань пингти. Арьсень аньцек сянь колга, штоба тя оцю пелькссь мзярдовок афоль лисе тага. Поездса няйфсь нинге весть лятфтась сянь колга, кодама питнеса атяньконди сатовсь Сяськомась, и што тейнек ванфтома синь великай подвигснон колга мялямть».