СВО-нь зонав прважаф тага фкя гуманитарнай груз

Миронь Российскяй фондть Мордовскяй отделенияц стаки кирнесы СВО-нь зонаса боецнень ширеснон. 3 майста республикаста прважаф тага фкя гуманитарнай груз.
«Прважаськ кафта направлениява. Васенце гуманитарнай лезкссь моли госпитали. Эсонза лекарстват и сярядихнень мельге якамань предметт, удома васта лангс ацамат, медицинскяй оборудования. Стане жа тоза пачфтевихть строительнай материалхт»,—азозе Миронь фондть Мордовскяй отделениянц председателец Ольга Филёткина.
СВО-нь омбоце направленияв прважафт тепловизорхт, квадрокоптерхт, дротт, дрононь и радиосигналонь глушительхть, специальнай сельмованомат, а стане жа автомобильнай техниканди запчастьть и расходнай материалхт, сварочнай аппарат, техникань петеманкса лия оборудования.
Гуманитарнай грузть мархта Родинань аралайхне получайхть Мордовиянь школьникнень эзда Сяськомань Шить мархта седи ваксстонь поздравленият.
Ольга Филёткина азсь благодарностень валхт сембонди, кие тячи кодай маскировочнай сетьть. «Синь фалу эрявкстыхть оцю лувксса. Мордовияса сетьтнень кодасазь доброволецне, аф коммерческяй волонтёрскяй организациятне. Сембось пачфневи минь цёраньконди,—мярьгсь Ольга Петровна.—Боецне азондыхть спасибамань валхт ширеснон кирдеманкса. Ёратама пяшкодемс аляньконь, атяньконь и сембонь, кие аралазе Родинаньконь, боевой коень сяда тов мольфтихнень эняльдемаснон».