Атюрьевскяй райононь Крхтаж велень средняй общеобразовательнай школань историко-краеведческяй музейса инь няевикс вастса ащи СВО-нь участникть Юрий Мурзайкинонь алянц, Василий Ивановичень, портретоц. Тылонь тружениксь, «Рассвет» колхозонь почётнай ломанць лац покодеманкса казьфоль Ленинонь орденца. Тянемс тя ломанть лемонц кунцесазь прянь шнафтозь.
Василий Иванович и Мария Васильевна Мурзайкиттне касфтсть вейхкса итть. Юрий семьяса ульсь мекольцесь. Кода и Крхтажень лия цёранятне, тонафнесь школаса, служась армияса. Кассь трудонь кельгикс. Нинге шабакс ушедсь трудендама колхозса. Ульсь комбайнёронь помощникокс. «Рассвет» колхозонь паксяса оцюфнень мархта ряцок нусь-тялясь сёра. Армияда меле лама пинге трудендась Крхтажень колхозса фермань заведующайкс, ульсь водителькс. Кефкие киза покодсь комбайнёркс, урядась сёра. А мекольдень ниле кизотнень вахтань методса якась Москуву добувама.
Эряфоц полафтсь эста, мзярда ушедсь специальнай военнай операциясь. Юрий Мурзайкин куватьс пингть тарксема ашезь карма, кочказень кагодонзон и эсь воля тусь СВО-нь ётафтома зонав. Тя ульсь 2023 кизонь 1 июльста. И вов ни пцтай киза кода сон СВО-са. Кле, сяськсаськ врагть, мрдатама шумбраста-тазаста куду. 16 майста Крхтажень од алясь омбоцеда сашендсь отпускс.
Кудса СВО-нь участникть фалу учсы кельгома рьвац, Татьяна Матвеевна. Ашезе юкста Юрий и родной школанц. Тяса лама киза покодсть кафта аканза Н.И.Сургаева и П.И.Дорожкина. Завучекс тянивок трудендай двоюроднай сазороц С.И.Чумарова. Цёрась васьфнесь оцю класса тонафнихнень мархта, азондсь СВО-ть колга. Эняльдсь, штоба синь кельголезь и афолезь юксне эсь шачема-касома уженяснон, странаснон. А кда эряви сонь араламс, тянкса мезевок аф ужяльдема. Тя васедемаса примасть участия школань директорсь Н.И.Бурнашкин, Крхтаж велень поселениянь оцюнясь В.И.Сунгаев. Юрий эняльдсь теестка, штоба афолезь юксне СВО-нь участникнень, сембодонга пяк сятнень, конат ашесть мрда куду.
Илья Вешкин.