В.И.Мишанинать 75 кизонь топодеманцты
Мокшень содаф писательсь, драматургсь В.И.Мишанинась шачсь 1950 кизонь 20 ноябрьста Адаж велеса, кона тяни сувси Кадошкинскяй районти.
Сёрмадома ушедсь кафксоце класса школаса тонафнемста. Кафта стихонза печатлафтольхть «Якстерь тяштеня» идень журналса. Сяльде варжазень виензон азксонь сёрмадомаса.
Школать аделамда меле поступась тонафнема А.М.Горькаень лемса Литературнай институту. Тя кизотнень колга Валентина Ивановна лятфни тяфта:
—Лама макссь тейне тя институтсь вете кизоста, кода сёрмады ломаненди. Корхтайхть, сёрмадома кивок аф тонафттанза, эряви, штоба эсот улель «Шкаень цятконя». Тя виде. Но эряфонь смузть шарьхкодемаса, содамошинь касфтомаса институтсь анок максомс пяк лама, аньцек маштт тянь сявомс.
Институтса тонафнемста Мишанинась нолдазе прозань васенце сборниконц—«Кить ушетксоц». Омбоце книгацка «Сиянь ракакудня» лемтьфоль иттненди.
Сяльде В.И.Мишанинась ушеды тяштема оцю лувиенди: «Качаму шобдава», «Вальмафтома куд», «Ки лангса ломатть» и ламоц лият. Тяшти и драматургиянь жанраса: «Куйгорож», «Тят шава, тят сала», «Эх, ломатть, ломатть». Сонь пьесанзон коряс путневихть спектакльхть Мордовскяй национальнай драмань театрать сценанц лангса.
Произведениянза лисендсть Москуса, «Идень литература» издательстваса, конатнень эзда ламоцне сувафтфт школань тонафнемань программань учебникненди и хрестоматиятненди.
Валентина Ивановна Мишанинась—СССР-нь Писателень союзонь член, Мордовия Республикань заслуженнай писатель, Мордовия Республикань народнай писатель, Мордовиянь Комсомолонь премиянь лауреат.
Тядде В.И.Мишанинати Москуса Нациянь театрать сценанц лангса максфоль «Признание» Российскяй театральнай премиясь, кона ладяфоль «Артист» благотворительнай фондть мархта искусствань деятельхненди лезксонди.
Ня шитнень Валентина Ивановна отмечазе эсь юбилейнай шачема шинц. Арьсетяма теенза кеме шумбраши, творческяй сатфкст, сяда товга кеняртьфнемс лувить од произведениязон мархта.
Любовь МАРКИНА.
СЁКСЕНЬ КИГЕ
Тракторонь шарыхнень алда лийсть рдаз пакшт. Кись лотку, валазя. «Беларусть» мельге тележкась яфиевсь кафта пяли, лонтиесь. Моторсь кяжиста рнась. Тяфтама киге эрявсь ётамс котошка вайгяльбе.
Максим эрязста шарфнезе рульть, сяка тев варжакснесь фталдонь вальмянява—тележкаса ломатть. Теенза инксост отвечама.
Сон усксыне шоссейнай кити колхозонь инженерть Николай Андреевичень стирензон. Хуш и кальдяфт ушесь и кись, но сон ашезь атказав. Мес? Ашель мялец азомс туркс вал инженерти и нинге… Нинге ульсь мезенкса.
Максим эсь пачканза сюцесы марнек перьфпяльть, коса тняра рдазда.
А тележкаса уски кафта мазы стирьхть. Синь тонафнихть Саранскяйса университетса. Сятка сюцесазь ушеть, кяшендьсазь шамаснон рдаснень эзда.
Максим няйсыне шамаснон и эсь пачканза пееди: «Поводе! Содалесте, кода тейне эрь шиня сатни! А тячи вов инксонт повонь. Шабатне, кит сашендсть праздникс, тусть шобдавакиге ялга. Марнек рдазть кялезь. А мес? Синь тиндедонт кальдяфт, што ли?»—Максим полафтозе скоростть.
Инженерть оцю стирец, Нинась, кяшезе няренц лямбе руцянц потмос, няевсть аньцек оржа шалхкоц и оцю сельмонза, конатнень тюсснон ёрась содамс Максим.
Цёрась аф ламода таколдсь лангозонза ваномста и кизефнезе эсь прянц: «Мезе ся илядня мушендонь эсонза?»
Мезе лиссь эста мархтонза? Ся ульсь бта аф кунара, тундань мяляфтови илядня.
…Ушесь лямбе, уфай ляпе варманя, пачфни иретьфти шиненя. Таргасак ваймоцень, и шаракоды пряце. Максим озадоль вальмала. Седиец комболдсь, ков-бди тердсь, а ков—ашезе сода. Сась Миша ялгац, и синь тусть клубу. Тоса кайгсь музыка. Стирьхне-цёратне танцевандасть. Тянемс сон ашезень кельге танцевандайхнень, а тячи пчкясь сонцьке шароль и шароль вальсть коряс, кда маштоль. Ялгац тердезе шахматса налхкома. Максим атказась. Озась ужеса ащи скомняти и пара мяльса ванць танцевандайхнень лангс. Тя вальсть фалу морсекшнезе кунардонь баянистсь Вася. Вальссь аделавсь. Сямольде кармасть танцевандама пластинкань коряс. А Максимонь пилеса сембе кайгсь ляпе, сетьме вальссь. Ванфоц курькснесь шамаста шамас. Стирьхть, цёрат. Ванондозень стирьхнень. Синь шамасна илять аф стапт, кодапт шиньгучкать. Вов Микиш Ольгань афи шарьхкодьсак, прясонза кудрятне, мярьгат, артисткань, а шить руцянянцка аф валхнесы.
Сон ванондсь снярс, мзярс ашезень няе сянгяря сельмотнень. Шарьхкодсь, синь ульсть сембода мазыхне, пиндолдсть пяк весяласта, бта корхтасть: тячи минне праздниксь. Пидевсь Максимонь седиец ня сельмотнень лангс ваномста. Меле сон няезе стирть шаманц, ронгонц, пильгонзон. Да сонцьке ульсь инь мазысь. Акша платьянц эшксса тюжялготкшнесть шинь пидеф кяденза, ронгоц тёждяняста шерьхкондсь музыкать коряс. Кда маштоль Максим танцевандама, сон токафтолезень кядензон сондейнза. «Тяни ва ащек офтокс»,—кяжиясь эсь лангозонза, нолдазень алу сельмонзон. Сельмопрязонза поветь пулю ботинканза, эстокиге эцезень пильгонзон скомнять алу. Мзярда кеподезень сельмонзон, няезе: сянгяря сельме стирть ронгс кярьмотьфоль Михалнянь Пашась. Максим эстокиге псилгодсь. Конашкава аерксоннекс тяни няевсь Пашань стирькс мазы шамац. «Месть мон, ёньда, што ли, лисень?»—визделгофтозе эсь прянц Максим.
Сяльде клубсь шамсь, и сонь пякстазь. Од ломаттне лисендсть ульцяв. Эстокиге кайгозевсь кафта-колма гармония. Кода мле, эрь ульцять сонцень гармонистоц. Кштида, стирьхть! Кштида, цёрат! А илядьсь, кодама мазы илядьсь! Сетьме варманясь шерьфтезень шуфта лопатнень. Менельсь шобда, но тявок пароль, аф няеви, кода ктморяйхть оттне.
Максимонь кудоц аф ся пяле, коза тяни аськоляй. Моли ширенява стирьхнень эзда. Арьсесь, шобдась кяшезе соньге.
—Максимня, коза шта эрьгаскодоть?—кульсы сон кинь-бди шуваня вайгяленц. Максим абонгодсь, таяскодсь. Ватта, сембе няйсазь! Пади, няезь сяньге, кода иляденьберьф тетьксезень сельмонзон Сонь лангозонза?
Стирьхне мезень-бди кувалма потмараста корхнесть. Васенда рахазевсь Сон, мельганза лядыхневок.
Стирть рахамац пандозень Максимонь пилензон. Сязевсь илядень музыкась. Рахсихть сонь лангсонза! Максим шуфтомсь. Стирьхне юмафтсть шобдать потмос.
Аф ламос ащезь ваксканза ласькозь ётась Михалнянь Пашась. Максим серьгядезе, курмоштазень клоконзон. Паша нажядсь малазонза, пшкядсь:
—Мезе эряви? Куроконе азк.
Максим апак учсек тескафтозе сонь пилети. Паша прась, но эстокиге стясь пильге лангс и сяшкава каясь Максимонди бока пяльти, тона пулфокс ляцсь модать лангс. Паша сереска, кизоска Максимонь коряс оцюволь.
—Дурак!—сельгсь Паша.—Мон тейть няфтелине, аш мзярда!—и тусь ласькозь.
Максим коварясь модать лангса. Визькссь порезь порсь эсонза. Мезенкса эрьхтезе Пашань?
Ся веня сон ламос ашезь матодов.
Омбоце шиня од ломаттне, конат сашендсть маень праздникс, тусть меки Саранскяи, а Максим илядсь, илядсь вели тракторонц мархта. Но мезе ульсь ся илядня, ашезь юкстав. Ульсть лия илятть, но ашель Сон.
Эста тундаль, а тяни сёксе. Сяда меле ётасть кизот. Нинась тядде аделасы ни тонафнеманц. Тяфта Максим лятфтазе аф кунардонь, афи маластонь… мезенц? Кельгоманц? Мярьктяма, тунданц…
Сяда мелевок сон ламоксть ёрась нажядемс Теенза. Максим учсезе Сонь перяфкаснон маласа, а Сон ётай ваксканза и афи варжаксты лангозонза, бта аф ломань вакска ётась, а перяфкс пяльнянь. «Кали ломанькска аф лувондсамань?—арьсесь эста Максим.—Весть хуш кяждонза пшкядель».
Тячивок тележкав озамста Сон ашезь варжакста лан¬гозонза, бта кшнинь тракторти озафоль кшнинь цёра.
Максим ваноманява няезе рдазу шаманц, конязонза педьф ливозю шяярензон. «Синь тонафнефт и ёнюфт, а мон, трактордон башка, мезевок аф содан»,—арьси цёрась.
Аф лама пингта меле тракторсь пушкстсь и лоткась. Максим лиссь кабинаста и ушедсь моторса капшама. Пингсь мольсь. Максим ашезь эряскода.
—Мезе лиссь?—кульсь стирень вайгяль. Кизефтись Нинась.
Максим кеподезе прянц, вешезень сянгяря сельмотнень, ашезень му, мторгодсь:
—Карбюраторса мезе-бди…
Максим няезе Нинать дасадяф шаманц.
—И ламос карбюраторсь кармай кирнемонк?
Сянгяря сельмот стирть шамаса ашельхть, ульсть тюжат. Но вдь тяни сёксе, а эста тундаль. Да, муворусь карбюраторсь и нинге сёксень рдазсь. Максим кяжиякшнесь. Кали сянгяря сельмотне юмасть? Пади, тундась эста макссезе Теенза кельгома тюсонц? Лятфтазень мялезонза туф стихнень:
Сянгяря илядня
Сянгяря ульсь онць.
Сянгярялень эста
Сядонга пяк монць.
Ня строчкатнень лятфтамста сон пеедезевсь.
—Курок, што ли?—кулевсь сяка вайгяльсь.
—Пади, вандыс,—Максим кирендезень лафтувонзон.
—Тон, цёра, тяфтама шуткатнень зепозт кяшелить вандыс.—Нинась шарфтозе копоренц.
Токавсь Максимонь седиец. «Сон аф содасы лемозеньге, шарфтсь, аф ёрай ваномс рдазу шамазон. Кда улелень налхкшекс ащи студент, тейньге пеедель, кода эста Пашанди».
—Тейне эряви лезды,—мярьгсь Максим. Сазорхне варжакстсть фкя-фкянь лангс. Лездома срхкась ёмлась, Ритась.
Максимонь аф мялезонза тя лездысь.
Ритась комотсь тележкаста, шонгара рдазсь валозе пильгста пряс.
Максимонь ашезь кирдев пеедемац. Кепотьф мяльхт пшкядсь:
—Лезкс аф эряви ни. Монць петине.
Ритась пялезе ванфса Максимонь.
Максим марязе, кода потмозонза сувай кати-мезень кяж. Трактороц аф туй сяда тов, и сембе. Синневсь, хуш месть тят тиенде. Полафтыхть ли Сонь сельмонза?
Максимонь коняц вельхтявсь ливозьса. Сон сувась кабинав. Моторсь рназевсь, сяльде стакаста куфкстась, кода куломдонза инголе, и ляпиясь.
—Эй, тракторсь тапавсь!—пешкодсь сон кабинаста.
—Петьк куроконе,—дивандазь мярьгсь Ритась.
—Сон аф петеви.
Вов и учсеф ванфсь. Лангозонза варжакстсь сонць Нинась. И кода варжакстсь! Тяфтама ванфсь плхтатанза. Максим аф палы, теенза тяни сембе сяка. Сонь трвазонза таяскодсь пеедемась.
Максим кеподезе прянц. Инголе кяльсть рдазга кафта стирьхть. Ёмлась лотксесь и варжакснесь фталу тракторть лангс. Оцюсь усксезе сонь ожада. Тонац шарфтсь нинге весть.
—Ожу, алязти сёрмадса, кармат содамонза!
Максим валгсь, шарсь тракторть перьфке и меки куцсь кабинав, цяткофтозе кенкшкять, путозе прянц рульть лангс. Вдруг марязе, бта кургсонза рдаз пакш, сельгсь панжада вальмянява.
«Ёньфтома!—сюцезе эсь прянц Максим.—Тянь мархта мезе азоть?»
Сон кармась срхкафнемонза моторть, но ся ашезь срхкафнев, бта видекс шуфтомсь.
Валентина МИШАНИНА.