Эрь районть сонцень газетац. Сонь вельденза ломаттне сотцесазь ся кулятнень, конат лисендихть районть эрь шинь эряфсонза, мезе однясь тя или тона велеса, кодама полафткст образованияса, медицинаса, культураса. Кадошкинскяй районнай газетать историяц ушедсь 1935 кизоста сявомок.
«Сталинец»—тяфтамоль изданиять васенце лемоц. Газетать эряфоц ульсь аф кувака, кемоньшка киза. Туфталкс арась районть шовордамац шабрань Инсарскяй районть мархта. Эста кармась лисендема марстонь «Коммунист» районнай изданиясь, конанди лама киза ульсь редакторкс Н.И.Сыгонин. 1991 кизоня ня кафта райоттне меки явсть и ся пингста сявомок Кадошкинаса ушедсь лисендема «Возрождение» од газетась. Комсь колмува киза тя изданияса главнай редакторкс покоди Т.С.Румянцева.
—Территорияс коре райононьке аф оцюфнень эзда,—азонды Татьяна Степановна.—Но тейнек ули мезень колга сёрмадомс, азондомс эсь лувиеньконди. Кадошкино посёлкаса пяле век ноляй продукция «Кадошкинский электротехнический завод» АО-сь. Тя фкя инь оцю светотехническяй промышленностень предприятиясь минь республикасонк. Номерста номерс минь азонкшнетяма тя предприятиять сатфксонзон, сонь ломанензон колга. Оцю васта изданиясонк занци велень темась. Минь корреспондентоньке сёрмадыхть сянь колга, кодама работат мольфтевихть велеса цебярь урожаень сявоманкса, кода ладяфт тефне ферматнень эса, мезе касфнихть ломаттне эсь пересост, кирдихть кардсост и коза мишендьсазь эсь продукцияснон.
Лама материалда газетаса лемневи эряфкшу ломаттненди, сятненди, конат войнань стака кизотнень виень аф ужяльдезь покодсть фермаса, паксятнень лангса. Газетаса аф весть сёрматкшневсь Пою велеса шачф трактористкать Агрофена Шичкинать колга, кона войнань кизотнень соксесь-витцесь паксят, ферматненди усксесь кормат, тиендсь лия работат. Тяфтама ломаттне ульсть примеркс оттненди, кеподсть велень хозяйствать эса.
—Аф юкснесаськ минь и национальнай тематикать,— сяда тов азонды Татьяна Румянцевась.—Сембось, мезе сотф мокшэрзянь народть мархта, тянь колга азонкшнетяма газетаньконь страницаса. Минь сёрматкшнетяма Адаж, Глушкова, Пою мокшень велетнень эряфснон, койснон-обуцяснон, национальнай щамснон колга. Анокламе материал Пою велеста Тройцять колга. Тя шиня велеса кайгсть рузонь, мокшень морот и сиде моронят, ётафтовсть налхксемат, спортса пялькстомат, велеряйхнень и инжихнень каванязь мокшень пачаса, позаса.
«Возрождение» Кадошкинскяй районнай газетась малаткшни эсь колмогемонь кизонь юбилеенцты цебярь материал мархта, коса васенце вастса ащи ломанць, сонь тевонза. Сяда лама луви и оцю тирашт, сёрмады ялганьке!
Н.Лобанов.