Тяддень 13 январьста, Россиянь печатень шиня, Мордовиянь Оцюнясь Артём Здунов казезе «Мокша» журналть ответственнай секретаренц, мокшавать Татьяна Сенькинать. Лама киза седикс-ваймокс покодеманкса теенза максф «Мордовия Республикань массовай информациянь средствань Заслуженнай работник» почётнай лемсь. Татьяна Фёдоровнань лац содасазь сят, кит тяфта или лиякс сотфт мокшень литературать мархта. Нят: писательхне, поэттне, вузонь преподавательхне, школань учительхне, сят, кит сёрматфнесазь «Мокша» журналть и пара мяльса сонь лувондсазь. Т.Ф.Сенькинась макссь журналти 30-да лама киза.
Шачсь Татьяна Фёдоровна Рузаевка аймаконь Сузгярьге мокшень велеса Чегодаефнень семьяса 1965 кизонь 27 майста. А вов сёрматфтозь—5 июньцта. Тяфта эста улендсь сидеста. А сяс, кода рахсемга корхни Татьяна Фёдоровна, сонь шачема шидонза кафта. Семьясна оцюволь: тядянц мархта аляц касфтсть 6 стирьхть. Татьяна ётксост ветецесь. Аляц, Фёдор Михайлович, покотькшнесь машина кинь станцияса Рузаевкаса, а тядяц, Прасковья Михайловна, колхозса дояркакс.
Литературати кельгомац стирнять ушедовсь школаса. Мокшень кяльть Сузгярьгса иттненди эста тонафтозь Зоя Даниловна Саина и Полина Алексеевна Зуева. Синь уроксна фалу ульсть мялень салайхть. Учительхнень оцю мяльса кулхцонкшнезь сембе, синь предметснон коряс «кафтонь» сявондихть ашельхть. Татьяна Фёдоровна тячемс спасибакшни ня аватненди. Мокшень грамматикать коряс ся содамошитне, конатнень максозь учителенза, пяк эрявкстсть покодемстонза. Татьяна школаса тонафнемста пяк кельгозе лувоманц. Тя тевса теенза лезнесь щеняц, тядянц брадоц, Василий Михайлович Сурков. Сон покодсь главнай редакторкс «Мокшень правда» газетаса и «Мокша» журналса. И мзярда сашенкшнесь вели инжикс, усксезень мархтонза «Новый мир», «Современник», «Юность», «Мокша» журналхнень.
—Ванфневсь сембе тя козяшись кудбряса. Мон сидеста кяшендень тоса и коль лувондонь, лувондонь… Сембе ётка пингозень лемнине тя тевти. Минь сазорнень мархта кой-коста яксеме тядязень вастс колхозу траксонь потяма. Мяляфтса, мрдан шобдавань потямада меле, тядязе мярьги: «Матт, ваймак аф ламоняс». А мон удомать вастс тага куцян кудбряв, кельгома журналненди. Мокшень литературань инь содавикс произведениятнень, кепотьксонди, Илья Девинонь «Нардише» романонц, мон васенцеда эста и лувине,—лятфнесы Татьяна Фёдоровна.
Школать аделамдонза меле стирсь поступась тонафнема М.Е.Евсевьевонь лемса Мордовскяй педагогическяй институтонь (тяни университет) филологическяй факультету. Васенда—рузонь отделенияв. Тоса тонафнесь пяле киза, аньцек седиец фалу усксь минценнети, мокшеннети, и мокшэрзянь отделенияса тонафни стирнятнень мархтовок тиевсь пяк цебярь ялгакс. А сяс, ламос апак арьсек, ётась тоза. Мяленц кирдезе и эстонь деканць Михаил Александрович Келин.
—И школаса, и институтса тонафнемста фалу улень активисткакс. Примсень участия эрь кодама мероприятияса. Институтса ульсь мокшэрзянь стирнянь ансамбленьке. Морсекшнеме сире пингонь морот эрь кодама илатнень пингста, няфнеме пря «Студенческая весна» фестивальса. А нинге мон сидеста пялькснень эрь кодама олимпиадаса. Кафксть якань рузонь кяльть коряс Всесоюзнай олимпиадас, кона ётафневсь Казаньца. Весть ялгазень мархта нльне сатоськ омбоце вастть. Эх и пара мялезонк ульсь!—азозе Т.Ф.Сенькина.
Тонафнеманц аделамда меле Татьяна Фёдоровна направленияс коре прважафоль покодема эсь велень школазост. Работась тоса фкя киза, а сяльде лиссь рьвакс и ётась эряма Саранскяи, мирденц шири. Иван Сенькинонь мархта синь васедсть Атерьса, коста цёрась шачемас коре. А Татьяна якась тоза тонафнемстонза практикас. Саранскяйса савсь вешендемс од покодема васта. И тяса щеняц, Василий Сурков, кона эста нинге покодсь «Мокша» журналса, пачфтсь латта, што редакцияса ули секретарень-машинисткань васта. Татьяна Фёдоровна мольсь, кода тяни корхнихть «собеседованияс» главнай редакторти. Эста тя вастса покодсь Григорий Ильич Пинясов. Сон макссь стирти задания: ётафтомс сатомшка оцю текст рузонь кяльста мокшеннети. Тянь мархта ванозе маштомошинц и грамотнайкс улеманц. Няйфсь мялезонза тусь, и 1989 кизонь 1 декабрьста Татьяна Фёдоровна Сенькина сась «Мокша» журналть редакциязонза покодема.
—Машинкаса печатлама эста ашень машта, тонафнень тязк. Васенда, шарьхкотьф, аф сембось лисендсь. Эстонь машинкатне вдь аф тяниень клавиатуратнень лацотольхть. Пуняняснон ланга эрьхнемс эрявсь, коза сатыхть вийхне. Тянь эзда васенце пингть пяк сярядсть сур пене, нльне копорезевок. Авторда ламоль, сембе сёрматфснон каннезь эсь кядьсост тяштьфста. Тейне сашендовсь шарьхкотькшнемс почеркснон. И тя тевса пяк лезнесть редакторсь Григорий Пинясов, журналса эстонь покодихне Валентина Мишанина, Мария Малькина. Вестенге ашемазь сюцекшне, ашесть машне лангозон, валом-валом тонафтсть эсон редакторонь тевти.
Пингонь ётазь Т.Ф.Сенькина арась корректоркс-техредакторкс. 1999 кизоня путфоль журналти ответственнай секретарькс. Эстоньбере Татьяна Фёдоровна и покоди тя вастса.Тушендсь аньцек фкя кизос, мзярда 2020 кизоня апак учсек тусь эряфста журналть главнай редактороц В.М.Лобанов. Т.Ф.Сенькина, кода заместителец, путфоль редакторонь тевонь тиендикс. Но пингонь ётазь сон меки мрдась эсь кельгома тевонцты, конань пара мяльса тиендьсы тячемс.
—Мон сяшкава павазуван, мес Шкайсь сотозе эряфозень «Мокша» журналть мархта. Тя монь омбоце кудозе, тясот монь ялгане, тяза лажадан и кенордан. Мзяра содаф, мярьголень, легендарнай ломань мархта тейне савсь тяса васедемс! Нят: М.П.Девятаев, И.М.Девин, С.В.Кинякин, Ф.Ф.Пьянзин, А.П.Тяпаев, А.Ф.Ежов, Г.И.Сураев-Королёв и ламотне лиятне. Аф ваномок званияснон, содафшиснон лангс, синь фалу корхнесть кода ялга мархта, вестьке ашезь оцюлгофне пряснон,—азозе мокшавась.
Татьяна Фёдоровна виденцясь: тячи сонь таколфтсы фкясь—кизоста кизос коль кири и кири мокшекс сёрмадыхнень лувкссна.
—Мзярда аньцек сань покодема журналу, редакцияса ащесть пяшксе папкат авторхнень рукописьснон мархта. Печатлакшнеськ аньцек инь удалафнень, сяда лафченятнень прважсеськ архиву или мрдафнеськ сёрмадыхненди. Тяни мезеньге одня пцтай аш. И катк стихонь сёрмадыеньке нинге улихть, прозать мархта тефне ащихть ёфсикс кальдявста. Мон седи ваксста пичедян мокшень культураньконь и литератураньконь инкса. И надиян, тейнек нинге кандыхть мялень салай произведеният од автороньке,—панжезе седиенц Татьяна Сенькина.
И.ФАДЕЕВА.