Татьяна Сергеевна Буянова—Саранск ошень 26№ лицейса начальнай классонь тонафты. Старошайговскяй райононь Сире Шайгав велень мокшавась нинге школаса тонафнемста содазе, што эряфонц сотсы учителень профессиять мархта. Лиякс аш кода, кда инголет эряфоньберьф цебярь кепотькс—тядяце. Татьяна ёрась сонь лацонза работамс школаса, сяс поступась М.Е.Евсевьевонь лемса Мордовскяй государственнай педагогическяй институту «Дошкольное образование. Начальное образование» направленияти. Изь карма учендома, мзярда шумордасы институтть, нинге студенткакс ушедсь работама 23№ гимназияса. А институтть шумордамдонза меле ётась начальнай классонь учителькс 26№ лицейти.
Васенцеда од учительсь варжазень виензон уроконь вятемаса, мзярда сонць тонафнесь школаса. Самоуправлениянь шиста сявозе тядянц Галина Ивановна Парфёновать классонц. «Тянемс мяляфтса, конашкава мялезон тусь тя классь. Шабанятне ёнюнятольхть, оцю мяль вельде кулхцондсть. Тянкса нинге сядонга касондсь мялезе самс работама школав»,—лятфнесы Татьяна Сергеевна.
Од учительть 2Б классонза 40 ломань, вельф стакакс эсь тевонц аф лувондсы. «Ульсь аф ламода стака, мзярда сявине учениконень меля 1 класса. Ёмланятнень оцю мяльсна налхксемс. Сяс васенце тевсь мархтост—тонафтомс синь сетьмоста ащемс урокса, кулхцондомс, кепсемс кядьснон. Кизонь ётазь шарьхкодень, што путф вийне ульсть аф шавос. Полафтксне няевихть эрь шабать эса»,—мярьгсь Т.С.Буянова.
Татьяна Сергеевна урокта башка вяти занятият, кувалгофтф шинь группат, коза шабатне якайхть кепотьф мяльхть лувондома, налхксема, тонафнема, мультфильмань ванома. Кизоть ётафнесы стане жа иднятнень мархта кизонь лагерьса.
Тядде Татьяна Сергеевна «ветес» шумордазе магистратурать «Теории и технологии воспитательной деятельности педагогического работника» направленияс коре. Примась участия «Учитель года» оцю пялькстомаса. «Педагог-исследователь» ошень конкурсса сявозе омбоце вастть. Учениконц мархта примасть участия «Школьный патент—шаг в будущее» Международнай конкурсса. Проектснон инкса «Технические науки» номинацияса теест максфоль 2 вастсь.
«Сидеста эсь тевсон лятфнеса васенце учителезень Матрёна Николаевнать, кона тонафнезе нинге тядязень. Уроконь вятемста най лятфнеса кода сон вятезе прянц шабатнень мархта, кода отвечсесь кизефксснон лангс, кода аноклась урокненди. Сидеста пшкятькшнян тядязти, сонь оцю педагогическяй опытоц.
Тейне-арам, тяниень пингонь учительти эряви молемс фкя аськолксса пингть и шабатнень мархта. Эряви шарьхкодемс од технологияса, ваномс кулятнень мельге, штоба улемс ученикнень мархта, кода корхнихть, «фкя волнаса», марямс фкя-фкянь. Учительти эряви улемс кепотьксокс, маштомс ладяма стирнятнень-цёранятнень виде кис. Штоба эрь шабась, кона срхкай оцю эряфс, содалезе, кодама ломань мархта эряви ялгафтомс, кинди эряви лездомс»,—мярьгсь Т.С.Буянова.
Татьяна Сергеевна шачсь-кассь семьяса, коса кемоста кирдевихть фкя-фкянь ёткса сотксне, оцю мяль шарфневи койхнень лангс. Сидеста, аф аньцек иласта, пуромкшнихть марс, азонкшнесазь эсь пичефксснон и таколдомаснон. Шрать ваксса най мушендови васта моротивок. «Сембода лац семьясонк морсесь щавазе. А эздонза тонадоме минь тядязень мархта. Морсетяма и рузкс, и мокшекс. Щавазень эзда лядсь национальнай щамоцка. Тя питнишить минь карматама
макссемонза поколениста поколенияс, азонкшнема иденьконди коеньконь, культураньконь и народоньконь колга. Пяк оцю мялезе, штоба монь шабане содалезь эсь юрснон»,—азозе мокшавась Т.С.Буянова.
О.Белкина.