Тамара ОСИПОВА: «1945 кизонь 9 Майть мяляфтса бта исяк!»

Саранск ошень эряйсь Тамара Осипова сувси «войнань иттнень» ёткс. Шачсь сон Мордовиять столицаса 1937 кизоня Рожкофнень семьяса. Тядянза-алянза, Христиния Алексеевна и Михаил Павлович, оцю стирьснон Варварань мархта ётасть тяза эряма Скрябина велеста, кона тяни Лямбирскяй районца.

1955 кизоня 1№ авань средняй школать шумордамдонза меле Тамара Рожкова поступась Сурскяй молочнай техникуму. Аделамдонза меле— ушедсь работама Саранск ошень молзаводса васенда мастеронь помощникокс, меле мороженайть ноляманц коряс цехонь мастеркс. 1963 кизоня путфоль Саранск ошень молзаводть производственнай лабораториянцты заведующайкс, коса оцюняль 1972 кизоть самс.

1970 кизоня (работать мархта апак явонтт) шумордазе сиволень и лофцонь промышленностень Московскяй технологическяй институтть, получамок инженеронь-технологонь специальность. Кафта кизода меле путфоль Саранск ошень молзаводонь главнай инженеркс, 1976 кизоня февральста—главнай инженеркс Саранскяень од молзаводти. Главнай инженеркс работась 10,5, главнай технологокс—9 киза. Пенсияс лисемдонза меле 14 киза покодсь инженеркс-технологокс «Идень пищевой станцияса». Трудовой марстонь стажец—48,5 киза.
Тамара Михайловна—Мордовскяй АССР-нь промышленностень Заслуженнай работник, трудовой сатфксонкса казьф «Трудонь ветеран» медальса, Международнай молочнай конгрессть мяштьса каннема знаконц и медаленц мархта, ламоц Почётнай грамотаса, Благодарностьса.
Саранскяень молзаводсь ламотненди тяни содаф кода «Саранскяй» Молочнай комбинат». Ветеранскяй организацияти Тамара Осипова сувси кунара и вов ни колмогемонь киза сон—ветераттнень Советснон председателец. Сяс фалу заняф тевса. Ширезонза самстонк аноклась Саранскяень фкя школаса васедемати. Несколькаксть гайфнесь телефоноц. Шранц лангса ащесть фотография мархта альбопт, цють сяда ширеса—книгат…
Эняльдеме Тамара Осиповати аф ламос кадомс тевонзон и пачфтемс тейнек Великай Отечественнай войнаса шавф алянц, Михаил Павловичень, мирденц, Михаил Дмитриевичень—Великай Отечественнай войнань участникть, целайнек ся пингть и, конешна, 1945 кизонь 9 майть—Сяськомань шить колга лятфнеманзон.
Аф весть тушендсть сельмоведеньке, синь ашель кода кирдемс, вдь Тамара Михайловнань кой-кона лятфнеманза пяшксетольхть пичефкста.
Аляц, Михаил Павлович, финскяй войнань участниксь, тусь фронту Великай Отечественнай войнать ушедомдонза меле эстокиге.
«1942 кизонь августста ранендафоль. И вдь эрявсь тяфта лисемс, што пчксема повсь Саранскяень 4662№ эвакогоспитали. Эряме ошть центральнай пялькссонза ёмла комнатаса (сисем метрань). Лац мяляфтса, кода сашендсь куду. Васьфнине ульцяса. Мзярда пчкафтозь, колмоненк—тядязе, аказе и мон туме меки фронту прважамонза. Аськоляме Ленинскяй ульцява (тяни Лев Толстоень). И сон пяле киса мрдафтомань куду. Сяда тов, кле, Томочка, тят яка. Кеподемань вяри. Уле тюсонь сельмонза ванцть лангозон таколдозь. Пади, ваймоса марязе, што няйсамазь мекольцеда. Тядязе и аказе прважазь сонь вокзалу, коста боецне пачфтьфтольхть Рузаевкав».
Тяфта и лиссь. Михаил Рожков 1942 кизоня семьянц няезе мекольцеда. Сон мярьгсь рьванцты: «Пращан мархтонт. Улема, оду аф няйхтяма…»
Младшай сержантть Михаил Рожковонь эряфоц сязевсь тюремань паксятнень лангса 1943 кизонь 27 февральста Людинова ошть маласа. Тоста и сась семьянцты извещениясь.
Великай Отечественнай войнань участникокс ульсь и Тамара Осиповать мирдец—Михаил Дмитриевич, кона тусь эряфста 2013 кизоня. 1944 кизоня сявфоль РККА-в, прважафоль Черноморскяй флотскяй экипажу.
Войнать шумордамдонза меле работась Научно-исследовательскяй институтса. Примсесь активнай участия Саранскяйть общественнай эряфсонза. Казьф несколька медальса.
Ужяленди, эряфста рана тусь Осипофнень фкя-сяка цёрасна.
1945 кизонь 9 Майсь. Кодамкс сон мяляфтовсь Тамара Михайловнанди? Вов мезе отвечась тя кизефксоньконь лангс:
«Сяськомань Шить мяляфтса бта исяк! Ульцяста кулевсть вайгяльхть. Валхтоськ вальмятнень лангста маскировкать. Лисеме. Ошень Советть маласа пяк ламонь ломаньда. Сембе весялат, пеедихть, ашкоряйхть фкя-фкянь мархта. Кулеськ, што Сяськоме! Эстокиге ласьконь куду и ювадень тядязти: «тядяй, Сяськомась!» Сон сявсь кядезонза нардама, озась стул лангс и аварьгодсь. Ламос авардсь. Мзярда лоткась, нардамась сельмоветтнень эзда сяшкава начколь, хуш пувордак».
Тамара Осиповась тейнек азондсь пяк лама. Тячи оцю мяльса макссаськ лятфнеманзон аф оцю пяльксснон.
Татьяна АЛЬШИНА.
Фототне Николай КАРАНОВОНЬ.

Последние новости

В Мордовии растет количество госзакупок у самозанятых

Одно из ключевых направление национального проекта «Малое и среднее...

В Мордовии благоустраивают общественные территории 

В Рузаевке в рамках федерального проекта «Формирование комфортной городской...

Команда «Бизнес-десанта»проконсультировала предпринимателей Торбеевского района

Центр «Мой бизнес»проводит активную работу в районах Мордовии по...

В Мордовии ведется капитальный ремонт дороги до с. Новая Карьга

ВКраснослободском районе Мордовии приступили к капитальному ремонту автодороги «Подъезд...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Тройцясь—Малавса

Святой Тройцять келиста отмечсесазь пцтай эрь велеса. Цебярь тяфтама...

В Мордовии растет количество госзакупок у самозанятых

Одно из ключевых направление национального проекта «Малое и среднее предпринимательство» - это поддержка самозанятых.  Почти 4,5 млрд рублей по России составил общий объем закупок у...

В Мордовии благоустраивают общественные территории 

В Рузаевке в рамках федерального проекта «Формирование комфортной городской среды» национального проекта «Жилье и городская среда» идет благоустройство Аллеи Славы на улице Куйбышева. Эта...

Команда «Бизнес-десанта»проконсультировала предпринимателей Торбеевского района

Центр «Мой бизнес»проводит активную работу в районах Мордовии по информированию предпринимателей о возможностях государственной поддержки. На этой неделе специалисты провели встречу с представителями малого...