Республикань Кудса ётафтовсь Отечествань Героень шити лемтьф пуромкс
Честсь, мужествась и Родинати преданнайкс улемась—Россиянь Геройхнень фкя инь васенце качествасна. Отечествань Героень шиня тянь колга корхтась Мордовиянь Оцюнясь Артём Здунов. 9 декабрьста Республикань Кудть Оцю залозонза торжественнай собранияс тертьфтольхть сят, кит аралакшнесазь странаньконь, кирнесазь специальнай военнай операциянь боецнень ширеснон и лезнихть теест тевса, а главнайсь—синць военнайхне.
Видеосвязть вельде Мордовиянь эряйхнень илать мархта поздравляндазень ПФО-са Россиянь Президентть полномочнай представителец Игорь Комаров.
—Тя шиня минь лятфнесаськ эрь-кодама пингонь и судьбань ломаттнень. Сятнень, кит сембе пингс тяштезь эсь лемснон странаньконь историяс, аф пели и мужественнай ломаттнень, конат тисть оцю тефт Отечестваньконь инкса, штоба мастороньконь лангса улель мир и благополучия. Лятфнесаськ атяньконь-бабаньконь, конат тиезь Великай Россиять. Аляньконь, атяньконь, атянь атяньконь подвигсна фалу кармайхть улема Родинати афкуксонь кельгомань кепотьксокс. И тячи минь аф потатама фталу неофашизмать каршес тюремаса. Минь марятама гордость солдаттнень, офицерхнень и доброволецнень инкса,—мярьгсь Игорь Комаров.
Полпредть валонзон коряс, тячи сембонди тейнек пяк важна лядондомс фкя народкс, кирнемс фкя-фкянь шире и марса работамс марстонь тевонкса. Приволжскяй федеральнай округонь сембе эряйхненди Игорь Комаров арьсесь кеме шумбраши и цебярь эряф.
Сяда тов кайгсь Российскяй Федерациять Гимнац.
—Мокшэрзянь крайсь фалу марясь гордость мужественнай воинонзон инкса. И тячиень илать эса минь няйхтяма крхка смузь: аньцек историяти, сонь героензонды кородозь малаткшнезь, кемамать и патриотизмать вельде тейнек удалай кемокстамс государстваньконь виенц,—ушедозе эсь выступлениянц Артём Здунов.
Мордовиянь лидерсь лятфтась братскяй Беларусьса аф кунардонь улеманц колга, коса советскяй геройхненди малаткшнихть тяфта жа кородозь. Цебярь кепотьксокс тянди арасть Беларусень Президентть Александр Лукашенконь валонза, конатнень сон азозень Артём Здуновонь мархта васедемать пингста, мзярда сон лятфтась Великай Отечественнай войнать пингста Мордовиянь Оцюнять атянц брадонц подвигонц колга.
—Беларуссь мяляфты старшай сержантть Василий Фёдорович Здуновонь—Советскяй Союзонь Геройть подвигонц колга,—мярьгсь Александр Лукашенко и кирдезе Мордовиянь Оцюнять инициативанц ширенц ладямс побратимскяй соткст Минскяй областень Червенскяй районть и Мордовиянь Атяшевскяй районть ёткса.
Республикань Оцюнясь башка мяль шарфтсь сянь лангс, што Россияса нацизмати аш и мзярдовок аф кармай васта.
—Аф сембонь мяльсна, штоба россияниттне эряльхть мирса. Западть аф мялезонза ся, што минь ванфнесаськ традиционнай питнишиньконь. Теест аф кельгови межнациональнай ялгаксшиньке, сяс мес сембось тя тиендьсамазь виикс. Минь задачаньке семботь тянь ванфтомс и ламолгофтомс,—мярьгсь региононь лидерсь.
Артём Здуновонь валонзон коряс, Отечествати кельгомань кепотькс од поколенияти няфнихть специальнай военнай операциянь участникне. Мордовиянь од ломаттне анокт лезнемс, улемс сятнень маласа, кинди тя эряви. Лездыень кядьснон венепнесазь волонтёрхне, кадеттне, поисковай движениянь участникне. Республикань Оцюнясь спасибась сембонди активнай гражданскяй позициянкса и патриотизманкса.
Мордовиянь Оцюнясь шарфтсь мяль, што ламоц инициативатнень, тяконь лувксса конат сотфт од ломаттнень грантовай ширень кирдемаснон мархта, азозень Президентоньке Владимир Владимирович Путин.
—Исяк Государствань лидерсь пачфтсь решениянц колга примамс участия кочкаматнень эса. Эрьда кирдьсаськ Президентоньконь ширенц тевса, эрь-кодама проектса участвовандаманьконь мархта. Кда нолясаськ тевс ширень кирдемань механизматнень, эста эрьда ответственностевок сяфтяма эсь лангозонк. Владимир Владимирович—минь Президентоньке! Сембода пяк врагоньке пелихть именна сонь эздонза. Пяк ни аф кельгови сон теест, сяс мес маштсь пуроптомост перьфканза рузонь масторхнень, сембе конфессиятнень, марстоптомс перьфканза цебярь ломаттнень. Конешна, эздонза пелихть, а тейнек эряви ащемс инксонза, кода сталь,—мярьгсь Артём Здунов.
Залсь васьфтезень ня валхнень кядень кайги цяпамаса.
Мордовиянь воинствать, Донбассонь аралайхнень лемста Мордовиянь руководствати и озадонь седихть аф ащекшни сембе земляконьконди благодарностень валхт азсь специальнай военнай операциянь участниксь Олег Рукавишкин.
—Сюкпря тядятненди-алятненди сянкса, мес касфтсть тяфтама ляпе седи шабат. Тейнек ули кинь инкса тюремс! Тейнек эряви сатомс иденьконди сетьме эряф. Тя ёфси аф героизма, тя рузонь ломанть долгоц,—мярьгсь Олег Рукавишкин.
Отечествань Героень шиня максфтольхть государственнай казнет.