Тевсь тиеви сафтозь, сядонга пяк—маштозь

Модань сокайхть и видихть, трактористт и комбайнёрхт… Сембе пинкнень ня ломаттне лувондовихть и тячемс афкуксонь геройкс. А кода ина лиякс. Вдь синь касфнихть кши. Аф максыхть кабаконашка странань эряйхненди ащемс вачеда. Тяни модань сокаень-видиень профессиятне «престижнайхнень» ёткс аф сувсихть. Аньцек сят, кит афкукс, седи ваксста кельгсазь шачема масторснон, паксяснон и лугаснон, аф ваныхть сянь лангс, кодама «питнет» повфнихть лиятне профессияснон лангс, синь кельгсазь эсь тевснон и лац шарьхкодьсазь: и 21-це векстонга кшись—семботи пря. А сяс кизоть оцюшканц ня ломаттне ётафнесазь паксяса. Сокайхть, инзайхть, видихть, тяляйхть, и тага сокайхть и видихть…
Вов тага сась сёронь урядама пингсь. Тядде Мордовиянь паксятнень лангста арьсекшневи кочкамс фкя пяле мархта миллион тонна сёра. Тяляма лиси 1175 комбайна. Аф кальдяв урожай учихть и Инсар аймаконь «Верхисское» ООО-са. Тяса касфнихть тозер, шуж, иляназ, кукуруза, шинжарома. Паксядонза хозяйствать лама. Синь венемсть тяфтама велетнень перьф кода Исса велесь, Исса прясь, Навлейсь, Яндовищась, Усыскинась. И сембе ня паксятнень, кода эсь перенц, содасыне Исса велень эряйсь, механизаторсь Александр Москалёв.
Александр Николаевич покоди «Верхисское» ООО-са вов ни лама киза. Сон и тракторист, а сёронь урядама пингть озси комбайнас. Тя профессияса 1994 кизоста сявомок. Аньцек тя стажсь, кода корхнихть, «официальнай». Афкукс техникать мархта цёрась кармась ладяма нинге школаса тонафнемста, мзярда ульсь комбайнёронди помощникокс. Да и алянц мархта щятяцка тонафтозь. Синьге эряфоньберьф покодсть колхозса, техникать мархта. Нинге тонафнесь водителькс ДОСААФ-са. Мрдамок армияста, од цёрась озась тракторс и тячемс аф кадондсы кельгома тевонц.
—Ошу тумать колга вестевок ашень арьсекшне. Аф монне тя. Тоса сембе, тейне-арам, коза-бди най ласькихть, фалу эряскодыхть, пяк лама ломаньда, шинек-венек шум. Велень эряфсь сяда сетьме. Хуш и лама тевда-заботада, но сембось мала седити. Тяса шачень-касонь, содаса эрь уженять. А паксянь тефнень содасайне идькс пингстокиге—цебярь и пяк эрявикс тев тиян. Кшинь касфтомась—тя паваз,—азондсыне мялензон-арьсеманзон механизаторсь.—Инголи, конешна, покодемс сяда стакаль. Куду илять мртцекшнелеме рдазботмоса, аньцек сельмотне и пейхне няевихть, шамаце—бта шахтёронь. Тяни ни сембось полафтсь цебярь шири. Од комбайнатне и тракторхне кондиционер мархтот. Озат, бта баяр. Сёронь урядама и паксянь сокама хуш акша панарса якак, сон аф рдаскоды. Тракторхнень эса ули автопилотка. Нолдайть и тракторце сонць сокасы боразнать. Аньцек паксять песа шарфнема эстейть. Тянди электроникась нинге ашезь пачкоде. Но, арьсян, аф ичкозе ся шиське, мзярда тракторть или комбайнать кабинаса ащекшнемска аф эрявксты. Компьютерсь сонць кармай вятема машинать эса. Но тя ули нинге аф курок, а сяс минь, трактористтне и комбайнёрхне, нинге эряфтама.
А.Н.Москалёв аф аньцек содаф механизатор, но и цебярь мирде и аля. Рьванц, Татьяна Фёдоровнань, мархта касфтыхть колма цёрат. Оцюсь, Владислав, аделазе ни техникумть и тяни покоди Москуса. Но сонга алянц лаца школаса тонафнемста яксесь комбайнёронди помощникокс, а меле покодсь тяка хозяйстваса. Омбоце цёраснонды, Никитанди, кеветие, сон тонафни школаса. А сембодонга пяк, улема, техникать кельгсы ёмланясь—Матвей. Теенза курок топоди 4 кизот. И сондедонза павазу ломаньга аш, кда аляц арфтсы комбайнаса или тракторса, макссы кирдемс рульть. И налхкшензовок коль аньцек тракторнят и машинанят. Александр Николаевич шарьхкодьсы, улема, цёранза аф лядыхть вели эряма. Салсесыне мяльснон ошень эряфсь. Мезевок аф тият, тяни тяфтамот пинкне. Шамондыхть велетне. И од ломаттнень аш мяльсна тяса эрямс. Но сон сякокс тонафтсыне цёранзон кельгома шачема масторть, ся модать, конань соксезь и витцезь сонь атянь-атянза, а тяни покоди ня паксятнень лангса и сонцьке.
Велень хозяйстваса лама киза цебярьста покодеманкса А.Н.Москалёвонди максфоль «Трудонь ветеран» лем. Нинге сонь улихть благодарностенза и грамотанза Мордовиянь Оцюнять, республикань Правительствать и Россиянь и МР-нь Велень хозяйствань министерстватнень эзда.
И. ФАДЕЕВА.