Тифт васенце итокне

26 апрельста Саранскяйса, Мордовия Республикань Пресс-центраса, ётафтовсь республикань эряйхнень пенсионнай и социальнай обеспечендамаснонды лемтьф пресс-конференция, конань пингста массовай информациянь средствань представительхненди Мордовия Республикать эзга ОСФР-ть работанц колга пачфтсь сонь управляющаец Владимир Василькин.
Тяддень 1 январьста сявомок ушедозе эсь работанц Россиянь Социальнай фондсь, кона пуроптф Пенсионнай и Социальнай страхованиянь фонттнень эзда.
Владимир Ильичень валонзон коряс, Россиянь Социальнай фондть Мордовия Республикать эзга Отделениянц клиентонза—Мордовиянь эряйхне, ашесть маря оцю полафткст кафта фонттнень фкяс тиеманц эзда.
ПФР-ть и ФСС-ть марс шовордамаснон эзда ашесть полафта ломаттнень заявленияснон ваномаснон мархта сотф пингсь, пенсиятнень и пособиятнень ладямаснон и пандомаснон мархта сотф правилатне. Ванфтовсть примамань сембе васттне—республикаса работай клиенттнень обслуживандамаснон коряс 22 единай офис.
Социальнай фондсь сяда тов макссесыне сембе ся услугатнень, конатнень инголи тиендезь кафта фонттне. Россиянь Социальнай фондть 125 сервисоц работай госуслугатнень порталсост. Тяза сувсихть фондть работанц сембе ширенза—пенсиятне, больничнайхне, социальнай пандоматне и иттненди пособиятне.
Январьста 4,8 процентта тифоль аф работай пенсионерхнень страховой пенсияснонды индексация.
1 февральста сявомок 11,9 процентта ётафтф социальнай кой-кона пандоматнень индексациясна.
1 апрельста сявомок тиф 3,3 процентонь индексация социальнай пенсиятненди дополнениякс сянди, кона тифоль 2022 кизонь июньцта (10 процентта).
Пресс-конференцияса азфоль, што тяддеть ушетксста Социальнай фондсь ушедсь макссема од пандома—идть шачеманц и воспитандаманц мархта сотф эрь ковонь пособия. Корхтафоль и медицинскяй работникненди специальнай социальнай пандомать колга, кона тевс сувафтовсь февральста. Азфоль, кода ладяф инвалидность мархта ломаттнень реабилитациянь техническяй средстватнень мархта обеспечендамаснон коряс работась и стак тов.
Мяленьке пшкядемс эряфкшу ломаттненди: тяда веронда сятненди, кит сашендыхть ширезонт и азондсазь пряснон Социальнай фондонь работникокс и анцесазь персональнай даннаентень. Нят мошенникт! Тясть ноля аф содафнень ширезонт, тяда корхне мархтост телефонца!
Социальнай фондонь специалисттнень консультацияснон ули кода получамс 88002000188 телефонть коряс.
Татьяна Альшина.