13 сентябрьста Рузаевскяй райононь ниле школатнень эса панжевсть «Точка роста» естественно-научнай и технологическяй направленностень образованиянь центрат.
Фкясь эздост—Левжа мокшень велень школаса, коза сашендсть Мордовия Республикань Государственнай Собраниянь депутатсь, Рузаевкань 8№ школань историянь и обществознаниянь учительсь В.Д.Богдашкина, Рузаевскяй муниципальнай райононь оцюнясь А.Б.Юткин, Рузаевскяй муниципальнай райононь Образованиянь Управлениять начальникоц Л.Н.Ковырева, Левженскяй велень поселениянь оцюнясь, Рузаевскяй муниципальнай райононь депутаттнень Советснон депутатоц О.В.Сонаева.
Тя школаса тяни улихть физикань, химиянь и биологиянь тяниень пингонь оборудования мархта од класст. 69 тонафнити урокне кармайхть ётнема сядовок мялень салайста. Клас-
снень эса, коса тифоль ремонт, эвондасть биологиять, физикать, экологиять, физиологиять, робототехникать коряс лабораторият. Синь вельдест можна тиендемс экспериментт, конат кондястихть эряфса и мялень салайста содафтсазь тонафнихнень школьнай программать мархта, максыхть дополнительнай содамошит предметть коряс.
Рузаевскяй муниципальнай райононь оцюнясь А.Б.Юткин мярьгсь:
—«Точка роста»—тя аф аньцек мазы лем и эрявикс оборудования мархта кабинетт. Тя од содамошинтень, од сяськомантень, од мялентень вастсна. Пади, самай ня кабинеттнень эса касфтовихть тяниень пингонь Менделеефне, Эйнштейнтне, Дарвиттне. Тя тинь касомантень точкасна. Вельдест теенть ули кода кочкамс сай пингонь профессиять и тячи ни пуропнемс содамошит эрявикс направлениять коряс.
Мордовия Республикань Государственнай Собраниянь депутатсь В.Д.Богдашкина шарфтсь мяль, што Левжань школась фалу содафоль коензон мархта.
—Тя оцю и кеняртьфти события велень школати и сембе эряйхненди. Сяс мес панжевихть од возможностть касоманди-виияманди и од содамошинь получаманди. Арьсян, тонафниентень колга кармайхть содама районца и республикаса,—азозе сон.
Левжань школань директорть Л.А.Рузмановать валонзон коряс, «Образование» национальнай проектть вельде школав поступасть биологиять, химиять, физикать, а стане жа экологиять, физиологиять и робототехникать коряс цифровой лабораторият. Марстонь суммась—1 миллион 200 тёжянь цалковай федеральнай бюджетста. Муниципалитетть эзда 1 миллион цалковай ётафтфоль кабинеттненди ремонтонь тиемс.
Левженскяй школаса «Точка роста» естественно-научнай и технологическяй направленностень образованиянь центрати руководителькс путф начальнай классонь учительсь А.В.Дивеев.
Тя шиня «Образование» национальнай проектть «Тяниень пингонь школа» федеральнай проектонц вельде «Точка роста» центрат панжевсть Пайгарма велень школаса, Рузаевкань 4№ лицейса и 1№ гимназияса.