Тядят-цёрат ётафтсть мошенникненди 400 тёжянь цалковай

Кода пачфни «Стопмошенник13» телеграм-каналсь, Саранск ошень 1№ полициянь отделу пшкядсть 41 кизоса авась и сонь 18 кизоса цёрац, конат пачфтсть сянь колга, што мошенникне салазь 78000 и 345000 цалковайснон.
10 мартста илять од цёрати гайфтсь аф содафсь, кона азозе прянц сотовай связень сотрудникокс. Пачфтсь сянь квалма, што курок шумордави сим-картать действиянь пингоц. Договорть сяда тов кемокстаманкса эняльдсь азомс паспортнай даннаензон. Пингонь ётазь студентти гайфтсь бта банкть безопасностень службанц сотрудникоц, кона пачфтсь, што цёрать личнай даннаенза тяни содафт мошенникненди, сяс кочкаф сембе ярмакне, конат улихть картасонза, ётафтомат аф пелькс счёттненди. Од цёрась мезеньге колга ашезь талакода, сяс тиезе семботь, мезе мярьгсь гайфтись. Тяда меле корхтамась шумордавсь.
Частта меле аф содафне гайфтсть студентть тядянцты, кона, финансовай учреждениянь представительть инструкциянц коряс, валхтозень эсь кочкаф ярмаконзон и прважазень аф пелькс ячейкатненди, конатнень азозь гайфтихне.
Тяда меле семботь колга азондсь раднянцты, кона мярьгсь тяниёк пшкядемс полицияв. Марстонь карьхцне—423 тёжятть цалковай.
Тяни полицейскяйхне ётафтыхть оперативно-розыскной мероприятият, конатнень вельде ёрайхть содамс сятнень лемснон, кит салазь студентть и сонь тядянц ярмакснон.
Мяляфтость! И тясть юксне! Финансовай аф шарьхкотьф кодама сообщениятнень пингста эстокиге лоткафтость корхтамать и тинць гайфтеда телефононь тя номерть коряс, кона азф банковскяй картать омбоце ширесонза. Мзярдовок тясть пачфне колмоце лицатненди салавань информациять, кона азф картантень омбоце ширесонза, а нинге тясть азонда коттнень, конат сашендыхть телефонозонт СМС-са, интернет-банкстонт личнай кабинетста логинть и парольть!