Кода и мезьса лездомс специальнай военнай операциянь участникненди? Кда сонь ушедомстонза тя кизефкссь макссевсь сяда сидеста, то тяни, улема, эрсь эздонк содасы лангозонза ответть.
Лезксонь максомань «киняда-янняда» лама, аньцек улель мяль тянь тиемс. И кой-кит лезнихть боецоньконди вов ни колмоце кизось мельцек. Тиендьсазь тянь аф вихца, кошардозь, лиятнень лангс ванозь, а сяс, мес тянь вешсы ваймосна и сяс, мес шарьхкодьсазь—тя тевсь марстонь и вельденза сяда курок маласькофтови Сяськомась.
Святой праведнай Иоанн Кронштадскяень храмоц, кона Саранскяйса Солнечнай ульцяса, содаф аф аньцек кода васта, коза ломаттне сашендыхть Шкайти озондома, ваймоснон аруяфтома, но и уженя, коса ули кода лездомс специальнай военнай операцияса участиянь примай аляньконди-цёраньконди. И тиемс тянь можна фалу. Кода? Пяк тёждяста! Эрсь машты капстань, лия перень сёронь керсема. Вов и пара! Тяфтама лезкссь эрявксты коське шонгарямонь анокламста. Меле ня ярхцамбяльхне прважавихть боецоньконди. Теест ляды аньцек каямс пси ведь, учемс аф ламос, и пси шонгарямнясь анок!
Маскировочнай сетьть—кафта ня валхнень мекольдень кизотнень кулендьсаськ цють аф эрь шиня. Котцихть тяфтама сетьть и Иоанн Кронштадскяень храмсонза. И, кда мяленте тянь тиемс, учтядязь пара мяльса. Или окопонь штатолонь тиема сада.
Храмть настоятелец протоиерейсь Владимир Кугушев настоятель и Ромоданово посёлкань Казанскяй Божьей Матерть храмсонза. Кода удалась содамс, специальнай военнай операциянь участникненди лезкс макссеви и Ромодановскяй благочинияса. Тундань каникулатнень пингста Ромодановскяй 1№ средняй общеобразовательнай школаса тонафнихне и синь тядясна-алясна кочксесть ярхцамбяльхть и гигиенань средстват, конат меле прважафтольхть СВО-нь участникненди.
Средняй классонь тонафнихне класснай руководительснон мархта кодасть маскировочнай сетьть. Иттнень эзда фкясь мярьгсь: «Тя сетьти вийс коре араламс киньге эряфонц! Аф стак тянь семботь тисаськ…» Ня валхне пяк питнихть! Главнайсь ся, што шабатне шарьхкодьсазь тифть эрявиксшинц.
Мархтост корхнемста отец Владимир Кугушев нинге весть шарфтсь мяль, конашка васта занци эрть лезксоц оцю фкя тевса—государстваньконь нацизмать эзда сяськомаса.
А Саранскяйса Солнечнай ульцяса храму эрь шиня сашендыхть сят, кит заняфт эрявикс тефнень мархта.
Аф кунара Иоанн Кронштадскяень храму сашендсть Автомеханическяй техникумонь студенттне. Синь аф аньцек урядазь храмть перьфонц, но и кодасть маскировочнай сетьть, чистендасть и керсесть коське шонгарямонди перень сёрот, тисть окопонь штатолхт.
Цють тяда инголе храму сашендсть ёмла лездыхть—Саранск ошень 10№ школаса тонафнихне, синьге заняфтольхть маскировочнай сетень кодамаса.
Лездома сашендсть и Пролетарскяй районнай судонь сотрудникне. Самай ся шиня грузяфоль машинас гуманитарнай лезкс. Районнай судонь представительхне аф аньцек кодасть сетьть, керсесть коське шонгарямонди перень сёрот, но и аноклазь прважаманди гуманитарнай лезксть.
Мушендовихть и сят, кит лезнихть транспортса, конань вельде пачфневи гуманитарнай лезкссь, и сят, кит озсихть рульть ваксс, штоба сонь пачфтемс—стакада-сталмода аф пели водительхть.
Иоанн Кронштадскяень храмса тев мушендови сембонди, кинь мялец лездомс специальнай военнай операциянь участникненди.
Татьяна АЛЬШИНА.