29 июнць—партизаттнень и подпольщикнень, конат тюрсть фашисттнень каршес Великай Отечественнай войнань кизотнень, шисна.
1941-1945 кизотнень Великай Отечественнай войнать пингста немецонь войскатнень тылса, оккупацияса пуроптовсь и мольфтевсь партизанскяй и подпольнай движения лаца народнай война.
1941 кизонь 3 июльста И.В.Сталинонь корхтамаса, кона кайгсь радиоса, азфтольхть врагть тылса партизанскяй и диверсионнай тефнень пуроптомаснон колга валхт.
Партизаттнень тевсна фатнезь ламоц ширетнень. Синь колсезь противникть коммуникациянзон, тиендсть рейтт тылозонза, пачфнесть советскяй командованияти разведывательнай питни сведеният и стак тов. 1943 кизоня партизаттне ётафтозь инь оцю операциятнень эзда фкять, кона каннесь «Рельсовая война» лем и ульсь Курск ошть ала тюремань пяльксокс. Аньцек Белоруссияса панда алу нолдафтольхть 836 эшелон и 3 бронепоезтт. Машина кинь кой-кона магистральхне лихтьфтольхть стройста, мезсь лездсь Якстерь Армиять наступлениянцты.
1941-1944 кизотнень врагть тылса сембоц ульсь 6200 партизанскяй отряд, конатненди сувсихнень марстонь лувкссноль 1 миллион ломань. 1942 кизоста сявомок противникть тылса пуроптовсть «партизанонь крайхть», конатнень эса эвондакшнесь советскяй властсь. Башка васта синь занясть тылонь коммуникациятнень тапамаса. Войнань кизотнень синь тисть 20 тёжяньда лама поездонь крушения, машфтсть 2500 паровоз, сязсть машина кинь, шоссень и грунтовой китнень лангса 12 тёжянь седь, 42 тёжянь автомашина, 350 тёжянь вагон, цистерна и платформа, лихтсть стройста 6 тёжятть танка и бронемашина, кожфса прафтсть и аэродропнень эса сязсть 1100 самолёт, машфтсть 600 тёжянь и сявсть пленц 50 тёжяньда лама противниконь солдат и офицер.
300 тёжяньда лама партизанць казьфоль орденца и медальса. 249-ти максфоль Советскяй Союзонь Героень лемсь, а партизанскяй движениянь кафта вятихне, С.А.Ковпак и А.Ф.Фёдоров, сатозь сонь кафксть.