УЛЕМС УЧИТЕЛЬКС—ТЯ АСУШИ,КОНА МАКССЕВИ ШАЧЕМСТА

Татьяна Каргина шачсь и кассь Ковылкинскяй райононь Рыбкина велеса. Нинге шабакс ёрась сотомс эсь эряфонц учителень тевть мархта и вов ни кемгафксува киза сон работай Рыбкинань школаса. Шумордамок М.Е.Евсевьевонь лемса МГПИ-ть, ламос апак арьсек, сась покодема родной школазонза.
Татьяна Сергеевна вяти мокшень кялень и мокшэрзянь литературань урокт. Тяда башка, сидеста ётафни аф класснай мероприятият и конкурст, конатнень пингста азонкшни школаса тонафнихненди мокшень культурать, поэттнень и писательхнень колга. Эрь урокть Татьяна Каргина вятьсы налхксема лаца, тяфта шабатне сяда лац кемокстасазь материалть. Тонафнихне пяк кельгсазь уроконзон, сяс мес синь мялень салайхть.
Татьяна Сергеевна корхни: «Кяльсь—тя инь оцю казнесь, козяшись, конань максозе эряфсь. Сон ванфтсы сянь, мезе ульсь народть эряфса, азондсы сонь ётаф кинц-янонц. Родной кялень учительхнень васенце тевсна: максомс тонафнихненди крхка содамошит, кельгомс мокшень кяльть и мокшэрзянь литературать, историять, культурать и штоба синь улельхть родной масторонь афкуксонь патриотокс. Вов мес эряви содамс и ванфтомс шачема кяльть».
Татьяна Сергеевнань учениконза мокшень кяльть коряс олимпиадатнень и конкурснень эса занцесазь васенце васттнень, сяс мес учительсь инь стака темать азондсы стане, што сон тёждяста примави.
Мокшавась сонцьке фалу касфнесыне содамошинзон. Эрь кизоня сувси жюрити Ковылкинскяй районца мокшень кяльть коряс олимпиадатнень эса. Татьяна Сергеевна морси «Ляйня» фольклорнай ансамбльса.
Сон пяк кельгсы эсь работанц и пара мяльса сашенды покодема, сяс мес содасы, што тоса учсазь шабатне.
Педагогонь профессиясь стака, но пяк эрявикс, вдь учительхнень эзда ащи пяк ламось.
Дарья Шиндяйкина.