Мария Сараева (Шумкина)—ся ломаттнень эзда, конат гордостень марязь корхтайхть эсь национальностьснон колга, сембе вастова кандсазь и шнасазь эсь культураснон. Шачсь-кассь мокшавась Торбеевскяй райононь Мокшень Ювня велеса. Школать шумордамдонза меле тонафнесь Вирень Московскяй государственнай университетса ландшафтнай архитекторкс. Тяни работай Москуса заводса инженеркс. Аф ваномок сянь лангс, што эряй сон аф Мордовияса, минценнети—мокшеннети пинге сяка мушенды. Сон—Московскяй областень Мокшэрзянь землячествать видеса «Азорава» коллективть солисткац. Вов кода сонць Мария азонды землячествати и ансамбльти повоманц колга:
—«Азорава» ансамбльсь эвондась 2015 кизоста сявомок. Ули кода азомс, эста землячестваське ушедсь работама. Весть тердемазь лездомс илань ётафтомаса. Лиятнень мархта марса аноклань и мазоптонь залть эса. Кочкавсть мокшаватне, ушедсть морама, мархтост моразевонь. Самай эста марязь вайгялезень и тердемазь коллективозост. Тяни «Азоравась»—ламотненди содаф ансамбль. Лама коза тернесамазь, пара мяльса примсетяма участия. Аноклакшнетяма и ётафнетяма концертт Москуса мокшэрзянь землячествать видеса.
Мариять седиса мокшень моротненди кельгомась эвондась нинге идькс пингста. Мзярда аляц тарксезе гармониять, ёмла Машанясь ашезь кирне, ушеткшнесь морсема коряванза. Лездсь теенза и «Мокшаваня» Мокшень Ювня велень самодеятельнай ансамбльсь, конань вельде Мария Сараева васенцеда и кулезень мокшень мазы моротнень.
Мария Петровна Сараева машты аф аньцек мазыста морама. Сон сонць тиенди ожнаняста мокшень мазоптомат, стай, сюреса сёрмады, кодай, рисовандай. Тиенди крганят.
«Весть бабазень шкафста мунь панар, эхянь од, аньцек сюреса сёрмадома эсонза ульсь. Сань мяльс тиемс сонь педа-пес. Тяфта, бабазень ушетфонц эзда кочкань башка наряд»,—мярьгсь мокшавась. Сембе узорхнень Мария тиендьсыне сонць—«кода сельмоц няи». А ёмла пингстонза тя тевти тонафтозе Мокшень Ювня велень педагогсь Маргарита Геннадьевна Авдеева. Сон кафта кизот мельцек кучсезе Машать «Одарённые дети» Международнай конкурсс. Васенце кизоть Мария аноклась мазоптомбяль мархта эсь кядьса тиф мокшень панар. А омбоце кизоня кямот и кячкаскаса кодаф костюм. Кафцьке кизотнень стирсь сявондезе народнай творчествать коряс Гран-прить.
2018 кизоня Мария Сараева примась участия Московскяй областень Губернаторть эрь кизонь премиянц номинациясонза. «Минь марстонь кудоньке» проектть мархта, кона лемтьфоль национальнай культурать ванфтоманцты, Торбеевскяй районца шачф стирсь лиссь сяськикс.
«Ламоц костюпне, конатнень эса лисендян сценать лангс, стилизованнайхть. Но ламонцне мокшеннет, конатнень тиендьсайне монць. Тяни ни кивок эсон аф тонафты. Васендакиге рисовандан проект и сонь коряванза кочкан мазоптомбяльхть»,—азонды М.П.Сараева.
Аш ни кода ладяйхть Мария Сараевати сембе сонь панаронза. Аньцек лиси эсост мокшавась, сембе эстокиге тарксесазь телефонцнон, штоба снимандамс тя мазышить!
О.Белкина.