Ушедсь тундань призывной кампаниясь

4 апрельста Саранскяйса, Мордовия Республикань Пресс-центраса, ётафтовсь «Сёксень призывной кампаниять итогонзон и военнай службас граждаттнень анокламаснон колга. Мордовия Республикаса «Тунда-2025» призывной кампаниять ётафтоманц колга» темас коре брифинг.
Массовай информациянь средствань представительхнень мархта васьфнесь и кизефксснон лангс отвечась Мордовия Республикань военнай комиссарсь, полковниксь Игорь Тихомиров.
Игорь Валерьевичень валонзон коряс, мелянь октябрьста-декабрьста военнай службань ётама Мордовияста сявф 600-тнень малава ломань. Комозсь эздост прважафт спортивнай ротав и научнай ротатненди.
2024 кизоть итогонзон коряс, Мордовия Республикась занязе васенце вастть Россиянь 29 субъекттнень ёткста, конат сувсихть Центральнай военнай округти, кода регион, конань оцюфт военнай службас граждаттнень анокламаснон и призывть ётафтоманц коряс показателенза, мезсь ляткшни аф полафтовикс вов ни несколька киза.
1 апрельста ушедозь эсь работаснон призывной комиссиятне. Тяддень тундать военнай службань ётама арьсеви тердемс 1000-да лама ломань.
Тундань призывсь кодавок апак сотт специальнай военнай операциять ётафтоманц мархта, сяс мес эсонза участиянь примама кучсевихть аньцек офицерхне и контрактс коре военнослужащайхне. Призывс коре сембе военнослужащайхне, службань пингснон шумордамда меле, прважавихть куду.
Призывс коре службать срокоц аф полафты—12 ков. Военнай службас тертьфне специальнай военнай операцияса участиянь примама аф кармайхть.
Призывникнень ламошкасна кучевихть учебнай подразделениятненди, коса тонадсазь тяниень пингонь техникать и получайхть военно-учётнай специальность, а меле поладсазь службать получаф военнай подготовкать мяльса кирдезь.
Военнай комиссариатса 1 апрельста сявомок ушедсь работама призывной кампаниять ётафтоманц мархта сотф кизефкснень коряс «пси линия». Ули кода гайфтемс 8 (834) 2385514 телефононь номерть коряс.
Призывникненди повесткатне кармайхть кучсевома кода «кагод лангса»—заказной сёрмаса, стане и «Госуслуги» порталса гражданинть личнай кабинетозонза электроннай повестка лаца.
Татьяна Альшина.