Ванфтода пря мошенникта!

Кода пачфни «Стопмошенник13» телеграм-каналсь, октябрь ковста Мордовиянь внутренняй тевонь оргаттненди ярмакнень саламаснон коряс заявления мархта пшкядсь 130-да лама эряй, конат юмафтсть 28 миллионда лама цалковай.
Мошенникнень килькшс повондыхть сембе кизонь ломаттне—идьста сявомок эряфкшуфненди молемс. Аф фалу ломанть улихть ярмаконза, но сонь сембе сяка васькафнесазь мошенникне: сявфтихть кредитт, анафтыхть шумос радняснон, работас коре ялгаснон кядьста, сяс мес ломанць афкукс арьси, што сонь мархтонза лиссь самай ся, мезень колга телефонца корхтась аф содафсь.
Васькафтфнень нинге фкя категориясна—тя кит ёрайхть курокста и тёждяста добувамс ярмакт интернетть вельде. Ломаттне шарфнихть мяль инвестиционнай проекттнень эса участиянь примамать колга рекламать лангс. Псевдоспециалисттне-биржевикне арьсеф туфталхнень вельде салсесазь ломаттнень кочкаф сембе ярмакснон, кредитс сявф средстваснон, корхтамок, што эрь шиня проектть участниконц доходоц коль касы. Меколи синь аф макссихть лихтемс ярмакнень. Тяфта ломаттне юмафтыхть миллиотт…
Мордовия Республикать эзга МВД-нь сотрудникне эрь шиня ётафнихть трудовой коллектифнень мархта васедемат, рейдовай мероприятият.
Аф кунара ётафтсть профилактическяй корхнемат Саранск ошень Ленинскяй райононь эряйхнень мархта, явсть «Внимание мошенники» памяткат, конатнень эса азондови васькафтомань инь сидеста васьфневи спосопнень колга и максфт рекомендацият, мезе тиемс тяфтама случайхнень пингста. Тяда башка, акциянь организаторхне повфнезь синь кудонь подъезттнень маласа информационнай стенттнень лангс.
Ломаттнень мархта васедематнень пингста азондсть кепотькст служебнай практикаста, мзярда мошенникне васькафнезь эряфкшу ломаттнень. Нинге полицейскяйхне лятфтазь телефононь номерхнень, конатнень коряс ули кода пачфтемс лисьфть колга.
«СтопМошенник» акциять шумордамста региональнай МВД-ть общественнай порядкать ванфтоманц организациянц Управлениянц инспектороц полициянь лейтенантсь Сергей Яшин азозе, што тяфтама мероприятиятнень ётафтомасна пяк эряви преступлениятнень, конат тиф мошенничествать вельде, профилактикаснон, инголдамаснон, ломаттнень правовой содамошиснон касфтомаснон инкса.