Мордовиянь Оцюнясь Артём Здунов 25 мартста Казаньца примась участия ПФО-са Россиянь Президентть полномочнай представителенц видеса Советть заседаниясонза. Пуромкссь лемтьфоль Приволжскяй федеральнай округонь региоттнень эса государственнай миграционнай политикать эряфс ётафтоманц и мигранттнень социально-культурнай адаптацияснон мархта сотф кизефксненди.
ПФО-са Россиянь Президентть полномочнай представителец Игорь Комаров, Советть заседаниянц панжемста, шарфтсь мяль сянди, што ПФО-нь региоттнень общественнай, демографическяй и социально-экономическяй касондомасост-вииякшнемасост мигранттнень вастсна коль касонды. Полпредсь лятфтазе, што март ковть ушетксста МВД-нь коллегиять расширеннай заседаниясонза Россиянь Президентсь Владимир Путин макссь поручения анокламс миграционнай политикань од концепция 2025 кизоня ни. Фкя инь васенце ширетне—обществать и граждаттнень аралафшисна, российскяй культурнай идентичностть, межнациональнай и межрелигиознай мирть и согласиять ванфтомасна. «Приволжскяй федеральнай округть лангс лиятнень коряс сяда сидеста шарфнихть мяль мигранттне, конат сашендыхть ширезонк добувама, тонафнема, эряфснон латцема. Пцтай сембе региоттненди эрь кизоня сашенды мигранттнень лувкссна лувондови кемотть тёжянь ломаньца. Тячи ПФО-ть территорияса эряй омба масторонь 500 тёжяньда лама гражданин»,—азозе Игорь Комаров.
Тянкса башка мяль шарфтфоль миграциять мархта сотф пельксненди. 2024 кизоня трудовой тевонди максф патенттнень лувксснон коряс васенце васттненди лиссть Татарстанць (пцтай 50 тёжянь), Нижегородскяй (31 тёжянть малава) и Самарскяй (28 тёжяньда лама) областтне, а стане жа Башкортостан Республикась (22 тёжяньда лама). Мордовия Республикась канневи ся региоттнень лувксс, коса омба масторонь рабочай вийда водендаф аф сяшкава лама, трудовой ресурснень марстонь лувкссост омба масторонь трудовой мигранттнень талекасна 1 процент.
Миграционнай процесснень регулированияснон коряс опытснон колга азондсть округонь региоттнень губернаторсна. Тя или тона регионть эряфс миграттнень сувафтомаснон коряс активнай работа ётафневи образовательнай организациятнень эса. Полпредть валонзон коряс, Россияса тонафни омба масторонь 389 тёжянь студент, ёткстост 82 тёжянць (21 процентсь) пуропнихть содамошит ПФО-нь вуснень эса. Мордовияса высшай и средняй профессиональнай образованиянь образовательнай организациятнень эса тонафни 3600-та лама студент ичкоздень и маластонь омба масторонь странатнень эзда.