Ётай недялять, 23-24 августста, республикасонк ётафтфоль «Мы вместе!» национальнай творческяй коллективонь од ломанень Всероссийскяй марафонць, коза сашендсь лама оцю инжи. Синь лувкссост Российскяй Федерациянь Федеральнай Собраниянь Государственнай Думань Национальносттнень тевснон коряс комитетть председателенц васенце заместителец Ильдар Гильмутдинов и Россиянь Общественнай палатань членць, Межэтническяй журналистикань Гильдиять президентоц Маргарита Лянге. Синь ванозь творческяй марафонть площадканзон, а стане жа васьфнесть Мордовиянь Общественнай палатань члеттнень и национальнай организациятнень представительснон мархта. Васедемась ульсь А.С.Пушкинонь лемса национальнай библиотекаса. Тяза стане жа сашендсть Россиянь эрь-кодама региононь мокшэрзянь национально-культурнай центратнень и автономиятнень руководительсна.
Кода азозе Ильдар Гильмутдинов, тяниень пингть национальнай кяльхнень ванфтомаснонды и тонафнемаснонды шарфневи мяль инь оцю сереса—государственнай уровеньца, а кизоть песта ули тиф и примаф тянь коряс дорожнай карта.
Инжись башка мяль шарфтсь межнациональнай соткснень маштозь латцемаснон эрявиксшинц лангс, тянь эзда, кле, ламода ащи культурать, экономикать, образованиять виияфнемасна и обществаса ладязь эрямась. Сон азозе, што странаньке ульсь и лядонды лама национальностеннекс, и пяк важна ванфнемс нароттнень ёткса ялгаксшить.
—Тячи мархтонк аф ялгафты государстватне тяряфнихть коламс Россиянь нароттнень ёткса ладямать, кяжияфтомс синь фкя-фкянь лангс, и тянди эряви кемоста ащемс каршек,—мярьгсь Ильдар Ирекович.—Тянкса региоттнень эса ётафнема грамотнай политика, штоба афольхть эвондакшне аф шарьхкодемат.
Госдумань депутатсь стане жа китькстазе, што межнациональнай согласиять виияфнемаса оцю васта занци общественнай организациятнень активнай работасна.
Маргарита Лянге кошардсь башка оцю мяль шарфнемс од ломаттнень лангс, вдь синь сяда тёждя «саламс» аф виде ки лангс. Арьсекшнемс мялень салай од проектт, водендакшнемс эряфс ётафтомаснонды од стирьхнень-цёратнень.
Пяк пароль кулемс Маргарита Арвитовнань эзда республиканьконь колга лямбе валхнень.
—Мордовияв сашендан комозьшка киза ни. Тяса уникальнай, самобытнай этническяй культурась, конань колга нинге аф кунара кржа мезе сотцесть эздонза ширеса. Мекольдень пингть Мордовиять лемоц ушедсь кайгома сяда кайгиста. Тяса эвондась туристическяй инфраструктура, мялень салай сувенирнай продукция. Тяса ётафневихть всероссийскяй оцю пуромкст, илат, кода тячиень «Мы вместе!» марафонць. Няеви, што республикань руководствась лама тиенди тя ширеса,—мярьгсь сон.
Васедемать пингста корхтафоль и внутренняй миграциянь прябалатнень колга. Тя кизефксть коряс эсь мялензон-арьсеманзон азозень МР-нь Государственнай Собраниянь депутатсь Евгений Ледяйкин.
Пуромксса примасть участия МР-нь Госсобраниять Председателенц заместителец Сергей Вдовин, МР-нь культурань, национальнай политикань и архивнай тевонь министрть васенце заместителец Александр Карьгин, Мордовиянь Общественнай палатать председателец Олег Каштанов, Мордовскяй (мокшень и эрзянь) народть Межрегиональнай общественнай организациянц председателец Юрий Мишанин.
Ольга ЕВДОКИМОВА.