Ванондовсть ломаттнень эняльдемань кизефкссна

20 июньцта РФ-нь Президентть Владимир Путинонь кошардоманц коряс, Мордовиянь Оцюнясь, «Единая Россия» партиять региональнай отделениянц секретарец Артём Здунов примазень ломаттнень. Кизефкснень, конатнень кепсезь республикань райононь эряйхне, видеста сотфтольхть марнек районть или кодамовок велеть эряфонц мархта.
Торбеевскяй РДК-ть методистоц Юлия Швецова, кона эряй районнай центраса, азондсь Культурань кудть капитальнайста петеманц колга.
«Райононь эряйхне аф весть пшкятькшнесть эняльдема мархта минь клубоньконь петеманц коряс, и работатне ушедовсть. Ремонтонь ётафтомань пингть клубонь коллективса—15 ломань, явондомазь разнай площадкава. Ужяленди, тянкса ламоц тядятненди-алятненди арась стака вятнемс идьснон секциятненди и кружокненди, тяниень пингть эсост заняф иттнень лувкссна няевиста кирсь. Артём Алексеевич, эняльттяма эряскофтомс ремонтнай работатнень ётафтомаснон»,—мярьгсь Торбеевань эряйхнень лемста Юлия Швецова.
«Тяфтама оцю объекттнень эса, тяконди тяза нолдафт федеральнай ярмакт «Культура» нацпроектть коряс, работатне мольфтевихть кафта кизот. Синь марстонь питнесна—125 миллион цалковай. Карматама старандама ётафтомс синь сяда курокста, аф учсемок 2023 кизоть пенц»,—мярьгсь Артём Здунов.
Атяшевскяй 1№ идень садонь воспитательницась Татьяна Живаева анась лезкс Атяшево рабочай посёлкаса водоснабжениянь системать реконструкциянц коряс.
«Посёлкань сембе эряйхнень таколфтсыне симомань ведть качествац. Минь содасаськ, што водоводть полафтоманц коряс работатне мольфтевихть сяда тов. Мяленьколь ба содамс, мзярда минь кудозонк кармай пачкотькшнема ару, цебярь качествань ведсь?»
«Контрактонь марстонь суммась аф ёмла—166 миллион цалковай. Минь пшкядеме РФ-нь Строительствань министерствати эняльдема мархта финансированиять ётафтомс 2023 кизоть вастс 2022 кизонди. Арьсян, эняльдеманьконь ширенц кирдьсазь»,—мярьгсь региононь Оцюнясь.
Ковылкинскяй райононь эряйсь Татьяна Артемьева пшкядсь республикань руководительти Волгапино велень эряйхнень кить петеманц колга эняльдемаснон коряс. Сон анась лезкс тястонь храмть перьфке дренажнай системать работанц мархта прябалатнень машфтомаса.
Мордовиянь Оцюнясь макссь эрявикс порученият МР-нь Правительствати сембе кизефкснень решандаманкса.