17 январсь Россиять военнай историясонза мяляфтови дата. Тя шиня 1945 кизоня советскяй войскатне воляс нолдазь Варшавать немецко-фашистскяй войскатнень эзда.
Висло-Одерскяй операциять ветеце шистонза, 1945 кизонь 17 январьста, советскяй войскатне Польскяй войскань 10-це армиять мархта аралазь Варшавать. Васенцекс Польшать столицазонза максфоль правась сувамс полякненди. Москусь макссь 24 артиллерийскяй залп мархта салют Варшавать аралаензонды—1-це Белорусскяй фронтонь войскатненди, тяконь лувксса и 1-це Польскяй армиять честьс.
Варшавать араламац ащи кафта пяльксста.
1-це пялькссь—1944 кизось
1944 кизонь 31 июльста Белорусскяй наступательнай операциять пингста 1-це Белорусскяй фронтонь (армиянь генералсь К.К.Рокоссовский) види ширдень войскатне маладсть Варшавати. 1 августста Крайовой Армиять (генералсь Т.Бур-Коморовский) вятеманц ала ошса кеподсь восстания, кона шарфтфоль странаса политическяй властть сявоманцты и народнай правительствать, Польскяй рабочай партиять и Людовой Армиять государствать лангса азорондама аф нолдаманцты. Патриотонь вийсь фатязень ошень эряйхнень. Ошса повстанецнень и немецонь войскатнень ёткса вишкоптевсь тюремась (восстаниять пингста шавовсь пцтай 200 тёжянь ломань). Штоба лездомс тюрема кеподихненди, 1-це Белорусскяй фронтти сувси Польскяй войскань подразделениятне Советскяй войскатнень лезксснон вельде 15 сентябрьста форсировандазь Вислать и фатясть сонь кержи ширестонза кой-мзяра плацдарма. Но кирдемс синь ашезь удала—генералсь Бур-Коморовский атказась кирдемс соткст соотечественниконзон мархта, а 2 октябрьста повстанецне капитулировандасть. Восстаниясь лоткафтовсь.
2-це пялькссь—1945 кизось
Варшавско-Познанскяй операциять пингста, конань ётафтозь 1-це Белорусскяй фронтонь (маршалсь Г.К.Жуков) войскатне, Польскяй войскань 1-це армиясь, мярькфоль операциянь 4-це шиня врьгятемс фронтонь 47, 61 и 2 гвардейскяй танковай армиянь войскатнень мархта. Советскяй 47 армиясь, ушедомок наступлениять 16 январьста, ёрдазень немецко-фашистскяй войскатнень Вислать омбокс, эстокиге форсировандазе Варшавать якшама ширеста. Тяка шиня 5-це ударнай армиянь полосаса тюрема кармась 2-це гвардейскяй танковай армиясь.
Боевой задачань пяшкодеманкса ламоц соединениятне и фронтонь пяльксне казьфтольхть орденца и получасть почётнай лепт: «Варшавскяйхть», «Бранденбургскяйхть», «Лодзинскяйхть», «Померанскяйхть» и лият.