Торбеевскяй райононь Варжеляй велень школась—инь цебярьхнень эзда фкясь марнек республикаса. Тяса сембода лияда башка оцю мяль шарфневи национальнайти. Школаса лама тиендеви сянкса, штоба шабатне афолезь юксне сянь, коста молихть синь юрсна, кода эрясть синь атянь-атясна, кодамотольхть койсна-обуцясна. Тяфта ульсь школаса исяк, тячи и кармай вандывок.
—Школаньконь козя историяц, ламонц выпускниконьконь лемсна содафт марнек республикаса, конатнень ёткса улихть учёнайхть, инженерхт, искусствань и культурань работникт,—азонды Варжеляй велень общеобразовательнай школань директорсь, Мордовия Республикань образованиянь Заслуженнай работниксь Н.А.Маскаева.—Тячи минь школасонк тонафни 56 шаба. Синь ётксост мокшет, руст, таджикт, но сембе синь васенце вастса кирдьсазь фкя-фкянь шарьхкодемать, ялгаксшить. Мокшень цёранятне и стирнятне тонафнесазь лия нациянь шабатнень содамс минь кяленьконь. И ванат, аф лама пингонь ётазь пцтай аруста корхтайхть мокшень кяльса.
Тянкса оцю путксоц мокшень кялень и литературань тонафтыть Светлана Фёдоровна Тремаскинать, кона тя предметть школаса вятьсы вов ни колмогемонь нилие киза. Эсь кяльсонк урокне тяса ётафневихть 2-це класста сявомок 11-це классти молемс. И Светлана Фёдоровна стане латцесыне уроконзон, што шабатне пингонь ётазь аф аньцек лац корхтайхть эсь кяльсонк, сёрмадыхть диктантт и сочиненият, но сяда лама содайхть мокшэрзянь писательхнень и поэттнень творчестваснон колга. Аф кунара тяса ётафтовсь творческяй илядь, кона лемтьфоль Мордовиянь Народнай писательть Илья Девинонь шачема шинцты. Шабатне лувозь писательть стихонзон, «Нардише» романцтонза пакшт, латцесть сценкат, морасть мокшень морот. И тя иласа фкя лаца цебярьста няфтезь эсь пряснон, кода мокшень цёранятне-стирнятне, стане и лия национальностень шабатне.
—Тейнек сембе тонафнихне фкат, эрь учительсь старандай, путнесыне виензон, штоба иттне касольхть эсь родинань кельги ломанькс, афкуксонь патриотокс,—сяда тов азонды школань директорсь Н.А.Маскаева.—Шабатне кепотьф мяльса примсихть участия военнай темас лемтьф слёттнень эса, тяни сёрмадыхть сёрмат, марса школань коллективть мархта прважсихть аф оцю посылканят специальнай военнай операциянь участникнень лемс. И тя работать минь карматама вятемонза снярс, мзярс аф кармай мир Украинань модать лангса.
Школаса улихть ёмла музей лаца уженят, коса азондови народоньконь ингольдень эряфонц, сонь историянц колга. Шабатне эсь сельмосост няйсазь сяканятнень, шаванятнень, куцюфнень, конатнень мархта ярхцсесть минь атянь-атяньке, бабань-бабаньке, кодамотольхть синь щамсна, карьсембяльсна, мезьса муськондсть, гладендакшнесть, тиендсть лия тефт. Мяленьке нинге азондомс сянь колга, кода Варжеляень школаса ётафневи эряфс «Точка роста» Российскяй программась. Целец тя программать сянь эса, штоба велень шабатне афольхть ляда ширеса тячиень тонафнемань процессти однянь сувафтомаса. Клас-
снень эса латцефт тяниень пингонь программа мархта од компьютерхт, ётафневихть эрь кодама налхксемат, ули козя спортивнай инвентарь, иттне заняфт шахматса, шашкаса налхкомаса. Ня занятиятне ётнихть мялень салайста, иттне тяза сашендыхть оцю мяль вельде, эрь шиня. Аф эрь школась шнафты пря тяфтама класс мархта, Варжеляень шабатненди тянь ширде удалась. И синь сюконяйхть сембонди, кие лездсь тя классть панжемаса. Улель ба аф видекс, кда минь афолеме азонда школань директорть Нина Арсентьевна Маскаевать цебярь тевонзон колга. Тя эсь кялень кельги ломань, коллективонь цебярь вяти, пара вайме и лямбе седи мокшава. Сонь оцю авторитетоц аф аньцек велеса и районца, но и марнек республикаса. Нина Арсентьевна сидеста азонкшнесыне образованияти лемтьф кизефкснень коряс эсь мялензон эрь кодама конференциятнень, пуромкснень и семинархнень-педсоветтнень эса, примси участия мокшэрзянь народти лемтьф пуромкснень-илатнень эса. Аф весть эсь школасостка ётафневсть тяфтама оцю мероприятият, коза кочксевсть мокшень содаф писательхть, учёнайхть, республикань лия велень мокшень кялень и литературань учительхть, общественнай организациянь представительхть. И сембе, кие тяса улендсь, сюконяйхть Н.А.Маскаевати тиф оцю тевонзон инкса, путнезь сонь примеркс лиятненди, азондсть мяльхть самс тя школав нинге аф весть. Тяфтама мяльса явоме, туме кис и миньге, меколи арьсемок Нина Арсентьевнанди кеме шумбраши, оцю паваз и лама, лама кизонь эряф!
Н.Лобанов.