Мекольдень колма кизотнень Саранск ошень Октябрьскяй райононь лама квартирань куттнень, конатнень обслуживандасыне 41№ Домоуправлениясь, эряйсна аф лотксихть кеняртькшнемда цебярь полафтксненди. Дворникне, кле, ушедсть сяда сидеста урятцемост куд пирьфнень, эрь шиня шташендовихть подъезттне, петневихть-тиендевихть кинятне, тялонда эсь пингстонза урятцеви ловсь и стак тов. Тяфта тефне ладявсть тяда меле, кода домоуправленияти директоркс арась од мокшалясь Евгений Шершенов. Евгений Владимирович вятьсы тевонц пяк лац, аф ваномок одксшинц лангс, сон смузю и грамотнай руководитель, конанди нюрьхкяня пингста удалась лихтемс домоуправлениять фталу лядондыхнень ёткста инголе молихнень лувксс.
Евгений Владимирович шачемас-касомас коре Ельниковскяй райононь Каньфкуж мокшень велеста. Школада меле тонафнесь Н.П.Огарёвонь лемса Мордовскяй госуниверситетса, коса получась экономическяй образования. Сяльде служась армияса Мурманскяй областьса. Мрдамда меле рьвяясь. Тяряфнесь мумс работа специальностьс коре, но ашельхть вакантнай вастт. Мзярда тердезь покодема полицияв, пара мяльса согласиндась. Аф лама пингта меле получась руководителень должность УФСИН-ца. Трудендась исправительнай колонияса Явасса. Мзярда шавовсь домоуправлениять ингольдень директороц Николай Сайгашкин (сон Евгениень рьванц аляц), од цёрась семьянек ётась Саранскяи и сявозе домоуправлениять вятеманц эсь кядезонза.
Евгений Владимирович виденцясь: васенце пингть ульсь аф тёждя. «Жилищно-коммунальнай хозяйствань сферась тяда инголе тейне пцтай аф содафоль, семботь савсь тонафнемс шава вастста,—азозе сон.—Лездсть лия домоуправлениятнень директорсна, домкопне. Сембода лияда башка савсь одкстоптомс коллективть. Од кизонь карша тусть сотрудникнень пцтай 80 процентсна. Улема, ашесть тонада работамс илештень кятть, а мон вешень эздост цебярь качествань работа. Ламотнень мяльс тя ашезь ту».
Мокшалять работаса оцю сатфксонза, кода корхнихть, аф кяшевихть, аф сёповихть, синь сельминголет. Мзярда Евгений Владимирович арась домоуправлениянь директоркс, организациять оцюволь шумоц «ресурсникнень» инголе—мянь 5 миллиотт цалковай. Од руководительти удалась мрдафтомс сонь фкя кизоста! Пцтай 80 процентта касфтовсь работникнень зарплатасна. Тяда инголе домоуправленияса покодихне получсесть 18-19 тёжянь цалковаень, тяни заработнай платась арась 30 тёжяньда лама цалковай!
—Жилищно-коммунальнай сфераса покодихнень трудсна стака и пяк эрявикс, эздост ащи ламось, сяс ширесна эряви фалу кирдемс,—мярьгсь Евгений Владимирович.
Зарплатада башка сотрудникненди сидеста макссевихть премият, мярьктяма, илатненди—Отечествань аралаень шити, Авань шити, Од кизоти… Башка мяль Евгений Шершенов шарфни участкасонза эряй специальнай военнай операциянь участникнень семьяснонды, вийс коре лезни теест. Меля, мзярда ушедсь СВО-сь, мокшалясь пачфнесь гуманитарнай лезкс Ульяновскяи, коса минь цёраньке ётнесть тонафнема СВО-нь зонав тумдост инголе.
Одкстоптовсть инженернай систематне—жилищнай фондть пцтай 85 процентсонза. Ушедсть путневома циркуляционнай линият.
Мекольдень кизотнень 41№ Домоуправлениясь примси участия региональнай и федеральнай пцтай сембе программатнень эса. «Формирование комфортной городской среды» программать мяльса кирдезь петневихть-мазопневихть куд пирьфне. Меля тифтольхть Октябрть 70 кизонц проспектса 101№ и 103№ куттнень территориясна, тядде петьф 95№ кудть пирьфоц, тяни мольфтеви 76№ кудть территорияста асфальто-бетоннай вельхксть полафтомац.
Тиендевихть полафткст куттнень потмосовок. Подъезттнень эса путневихть пластиковай вальмат, полафневихть кенкшне.
Евгений Владимировичень руководстванц ала ламода одкстоптовсь домоуправлениять материально-техническяй базац, сотрудникнень пачфнеманкса рамафоль од «ГАЗель», полафтовсть техникати комплектующайхне. Оцю мяль шарфневи идень площадкатненди: ташттне одкстопневихть, путневихть отт.
Азома сявок, што Октябрьскяй районца 41№ Домоуправлениясь фкя и тякось, конань ули сонцень аварийнай службац. Эряйхнень эзда заявкатне примсевихть шинек-венек.
Тяниень пингть домоуправлениясь обслуживандай лама квартирань 65 куд, коса эряй 8 тёжяньда лама ломань.
Евгений Шершенов сидеста васьфни домкопнень, участкасонза эряйхнень мархта, фалу сашенды ётафневи собраниязост, штоба сяда лац содамс, кодама прябаласна улихть ломаттнень, кодама кизефксне синь пичефтьсазь.
—Тейнек васенце вастса ащи ломанць, теест эряманди цебярь условиянь тиендемась,—азозе мокшалясь.
Евгений Шершеновонь инициативанц коряс 41№ Домоуправлениять эвондась сонцень коец—эрь кварталть тяса ётафневи «Куд пирьфонь» ила. Терневихть Культурань кудста артистт и эряйхне кеняртьфневихть мялень салай концертса.
—Пингсь тяни стака, аф сетьме, сяс минь старандатама, мезьса машттама, кеподемс ломаттнень мяльснон,—мярьгсь руководительсь.
Евгений Владимирович лама цебярь валда азсь коллективонц колга. Тяниень пингть домоуправленияса покоди 80-да лама ломань. Нят: слесарьхть, дворникт, уборщикт, электрикт, мастерхт, административнай работникт. Ламотнень стажсна кеветие, комсь и сяда лама киза. Лама пинге покодихть браттне Служаефне. Андрей—слесарь, Михаил—диспетчер. Кафцьке оцю профессионалхт, лиси авария, анокт работамс хуш шить, хуш веть, тевснон тиендьсазь пяк курокста. Козя опыт мархтот слесарьхне Александр Палаев, Александр Артемьев и лиятне.
Куд пирьфнень арушиса кирдьсазь дворникне Борис Ионкин, мирттне-рьвятне Владимир и Вера Каменефне, подъезттнень—уборщикне Светлана Кудаева, Валентина Журавлева. Лемозост мзярдовок аф кулят сюцемань-апрякамань валхт, тевснон най тиендьсазь «ветес».
Стака арьсемс домоуправлениять работанц электрикфтома. Вячеслав Чалов, Рафик Аксянов вестевок аф кадондсазь эряйхнень светфтома ламос ащема, семботь петьсазь-тисазь нюрьхкяня пингста.
Финансовай пяльксть вятьсы главнай бухгалтерсь Ольга Саушкина. Тя сон ламода лездсь Евгений Владимировиченди лихтемс организациять шумонь лоткста.
Аньцек шназь корхтась директорсь Шершенов главнай инженерть Виктор Видяшкинонь колга. Сон, кле, монь види кядезе. Тевонц содасы лац и лама мезьса лезни руководительти.
Аньцек фкясь пичефтьсы Шершенов ялгать, аш коллективса мокша ломатть, аш кинь мархта, кле, корхнемс тядянь-алянь кяльса. Эряскодоме сетьмофтемс сонь, надияфтоме сувсемс ширезонза сяда сиденяста и кеняртьфнемс сонь мокшень валса.
41№ Домоуправлениясь аськоляй касондомань-вииякшнемань киге. Тяса сембе вастова няеви руководительть азоронь кядец, коллективть трудонь кельгомац. Катк тяфта ули сяда товга!
Ольга Евдокимова.
Фототне Николай Карановонь.