Рузаевка аймаконь Болду велеса шачф-касф мокшень алясь Василий Илькинов ся ломаттнень эзда, конат стак вестевок аф ащекшнихть. Кядьсонза эрь тевсь лаказь-лакай. Мезти афоль кярьмоде—сембось лисенди, сембе вастса теенза сафтови. Но башка оцю васта эряфсонза занци мешень кирдемась.
Алять валонзон коряс, тя тевти сонь кивок ашезе тонафта, семботь сатозе сонць. Мешсна улендсть нинге атянзон-щятянзон. Но сон эста нинге ёфси ёмланяль, сяс мялямозонза кржа мезе лядсь. Да и тя тевса тяниень пингти эвондась лама одня. Полафтсть технологиятне-материалхне. Эвондасть мешень од породат. Василий Александрович тянь колга лувондсь эрявикс литература. Тись аф фкя эльбятькс, штоба кочкамс сембе смузть и маштомошить. Мзярда-бди ушеткшнесь фкя нешкста. Улендсть кизот, мзярда нешкопересонза 100 лама меш кудняль. Тяни эздост 50. Ужяленди, ётай кизоть пцтай сембе мешенза урадсть. Туфталсь—рапсонь паксятнень удобренияса валондомасна. Тя зиянць сидеста сатнесыне мешень кирдихнень. Аньцек В.А.Илькинов кядензон аф нолясыне. Рамась од семьят. А нинге сон путни «кундаманят» (афтомат) мала вирьхнень эса. Тяфта тядде теенза удалась сатомс нинге кеветие пувоз.
Василий Александрович эсь нешкоперенц колга азонкшнель да азонкшнель. А кода мле лиякс. Тяса эрь нешконясь, эрь рамканясь кельгозь тифт эсь кядьсонза. Материалонди кочксесы аньцек пяшеть.
—Ломатть апак содак сидеста рамсихть пичень рамкат. Синь эздост лиси пичевай. А мешненди тя аф пара. Синь кельгсазь арушить. Рамкань тиемста пяк лац сембось ункстама и ванома. Кепотьксонди, кда фаскась ули пяк шуваня—мешненди кармай кржа вастта, сяконь пельхть кудняса эвондай си (моль). Кда фаскась вельф кели—мешне сембе лишнай вастть тавадсазь штаса. Сяшкава, мянь рамкась нешкста таргамстонза синневи,—азонды нешкоперень азорсь.—Ня унжанятне, кода и ломаттне, эряйхть семьянь. Синьге улихть покодисна, нолапарьсна, салайсна, аралайсна, иднянь ваннисна. Тейне-арам, ломаттненди ули мезти тонадомс мешнень эзда. Васендакиге, трудонь кельгомати.
Сонць В.А.Илькинов тевфтома мзярдонга аф ащекшни. Трудонь кельгомати тонафтозень идензонга, а тяни тякоти водендакшнесыне уноконзон. Алять кафта стиренза, 4 уноктонза. Сембе шарыхть мешнень перьф. Кизонда полас-полас сявондихть отпуск. Вдь сембе синь ошень эряйхть, тоса и покодема вастсновок. Василий Александрович покоди «Станкостроитель» заводса. Ошса квартирац. Велеса озафни перень сёрот. Ули теплицац, садоц. Оцю стиренц сонцень кудоц шабра велеса. Ёмлась аньцек строяй Саранскяйть маласа. Сембонди алясь кенерькшни лездомс и валса, и тевса.
—Мешне сявондихть пяк лама пингта. Аф ваномок тянь лангс, мархтост покодемста ваймат. Ошса сембось лиякс. заводса сменацень аделасак и куду саят пульзяфста. А нешкопереса и ши, и ве шарат и тага шаролеть. Мешне макссесазь ломанти эсь эрьгаснон, эряфонь вийснон. Эздост моли аньцек цебярь. Нльне пупамасновок паронди. Уленди, шити пупасамазь афи кемоньксть, афи комозьксть, а сяда ламоксть. Мон тянь эзда аф пелян. Аньцек сюконян мешененди шумбрашинкса.
Ламоц мешень кирдихне надияйхть перьфпялень касыкснень лангс. Кле, мешсь кумбаравстонга медь канды. И учендсазь сонь панжеманц. Василий Александрович лия азорхнень эзда. Сон сонць тиенди мешензонды медень кочксема вастт. Алять ули мода пакшец, сон рамась трактор, сокамат-инзамат и витцесы эсь уманц шинжаромаса, фацелияса, донникса, горчицаса и лия медень канды тишеса. В.А.Илькинов ароптозе аф эрявикс шуфттнень эзда ляй трвать, машфтозень сембе кальхнень. Озафтсь нешкоперенц ваксс 500 малава пяшеня и пиченя. Мешензонды аф сашендови лиендемс пяк ичкози медень кочксема.
Василий Илькинов аф аньцек мешень кирди, сонь ули кода лемдемс и дизайнеркс, и архитекторкс, и строителькс. Навлей велень калмолангть ваксса эсь кядьсонза путсь часовня, конань лемдезе рьванцты, Вера Алексеевнанди (сон, ужяленди, аш ни шиса). Тяни эрь велеряйти ули кода сувамс тяза и путомс штатолня кулоф радняснон инкса. Стане жа мокшалясь шачема-касома Болду велесонза тиезень церькавонь колокольняти крёзть и калмолангонь ортатнень. И семботь питнефтома.
—Тяса калмафт тядязе-алязе, радня и мала ломанне. Кода аф лездомс, кда лездомшказе ули,—мярьгсь Василий Александрович.
Тяниень пингть мокшалясь покоди од «проект» лангса—Навлейса тии купель мархта часовня, нешкоперенц маласа. Часовнять пряса стяфтовихть вете крёст. Тясонга ули кода крьвястемс штатолнят. Эшинять ваксса машты кядь алясь тии беседка—ломаттненди ваймама васта. Сон косьфтазе ни тяса шяйть, тракторонц мархта такоргофтозе кить.
—мешнень мархта пяк лама тевда. Аньцек мзярда няйсак, кода шуди зрня лаца медсь, марясак танцти шиненянц—семботь юкстасак. Тя ёткть марясак пряцень инь павазукс. Мешень кирдемать мон работакс аф лувондса. Тя мезе-бди лия—ваймонь сетьмофтема, седиень озафтома васта. Тя монь эряфозе,—азозе Василий Илькинов.
И.ФАДЕЕВА.