Мордовия Республикань Писателень союзти тядде топодсь 90 киза. Пуроптфоль сон 1934 кизоня—Москуса СССР-нь писательхнень Васенце съездснон ётамдонза меле. Тяниень пингть Мордовиянь Писателень союзсь—«Россиянь Писателень союз» Общероссийскяй общественнай организациять региональнай отделенияц, конань председателец Мордовия Республикань Оцюнять од авторхненди литературнай премиять Лауреатоц, кяльста кяльс ётафтысь, поэтессась Татьяна Швецова. Ламотненди сон содаф Татьяна Мокшанова творческяй псевдонимонц коряс. Ня шитнень Татьяна Петровнань мархта васьфнесь газетаньконь корреспондентоц, конань кизефксонзон лангс сон отвечась оцю мяльса.
—Татьяна Петровна, азонтт, пожалуйста, союзть историянц колга.
—Мордовиянь Писателень союзсь ушедозе эсь кинц 1934 кизоня. Москуса эста ётафтовсь СССР-нь писательхнень Васенце съездсна. Тя или тона кизотнень союзти председателькс ульсть К.А.Нуянзин, А.Я.Дорогойченко, Н.И.Филиппов, А.Д.Куторкин, И.Д.Воронин, С.Е.Вечканов, А.К.Мартынов, И.М.Девин, И.А.Калинкин, А.М.Доронин, Н.И.Ишуткин, А.А.Громыхин.
—Мзяра ломань организацияти сувси тяни?
—Эздонк ведьгемонь ломань. Сембе—Россиянь Писателень союзонь члетт. Инь эряфкшусь ёткстонк М.В.Маторкин, конанди тядде топодсь 87 киза. Инь одти, Татьяна Маланьчевати, 30 киза. Писательхнень ламошкасна эряйхть Саранскяйса, но улихть Мордовиянь ошнень и ламоц райоттнень эса: Темникавса, Краснослободск ошса, Ичалковскяй, Дубёнскяй, Ковылкинскяй, Атюрьевскяй, Кочкуровскяй, Теньгушевскяй райоттнень эса и Мордовиять эзда ширеса—Москуса. Шарфтан башка мяль сянь лангс, што странаньконь кой-кона региононзон эса фкя пингть работайхть писателень несколька организацият, но минь марсотама, хуш республиканьке национальнай.
—Писателень союзть эрь шинь васенце тевонзон ёткс сувси…
—Од ломаттнень мархта работамась. Тянкса кеме соткст кирттяма «Пегас» литературнай студиять мархта. Тяда башка, мон и Россиянь Писателень союзонь несколька членць сувсетяма «Вал» литературнай объединенияти. Эрь кизоня ётафнесаськ Мордовиянь од писательхнень семинарснон, касфнемок тянь мархта авторхнень писателень маштомошиснон. Работать вятьсаськ башка секциява: эрзянь прозась и поэзиясь, мокшень прозась и поэзиясь, рузонь прозась и поэзиясь. Инь асуфнень лемснон азондсаськ Мордовия Республикань Оцюнять од авторхненди Литературнай премиянц получамс. И нинге. Эрь кизоня макссеви МР-нь Оцюнять премиянц Лауреатоц лемсь и Мордовия Республикань Государственнай премиянь Лауреатонь лемсь литератураса. Инь достойнай кандидатуратнень тянди азондсаськ минь.
—Тя сембось кепси мяль. Но, кода содаф, эрь тевса сашендови васьфнемс прябала мархта. Мезе азат тянь колга?
—Кда корхтамс национальнай литературать квалма, Россиянь ламоц этноснень ассимиляциясна пачкодсь ичкози. Сяс башка мяль шарфнема национальнай самосознаниять виияфтоманцты. И тянь лангса работама, мзярда ломанць нинге ёмла. Тиендема семботь, штоба иденьке кельголезь эсь юрснон, тядянь кяльть, литературать.
Кда корхтамс мокшень кяльса и эрзянь кяльса сёрмадыхнень квалма, ёткозост сувсихть сят, кит содасазь ня кяльхнень, кинь ули литературнай асувоц и кие маряй оцю ответственность инксонза. Сяс тяфтама ломаттне и азондсазь эсь мяльснон художественнай формаса—эстеест и лиятненди. Мокшень и эрзянь тяниень пингонь поэттне и писательхне пяк кельгсазь эсь ёмла родинаснон и эсь оцю странаснон, ванфтсазь атяснон аляснон колга мялямть и койхнень, синь ваймосна «сяряди» эсь народснон тяниень и сай пингонц инкса. Тяфтама авторхне няйсазь перьфпяльть мазышинц и виенц, маштыхть кельгома и шарьхкодьсазь лиять ризфонзон-пичефксонзон.
—Мордовиянь Писателень союзсь кирди кеме соткст лия республикань Писателень союснень мархта? Тянь квалма пара улель содамс сяда лама.
—Кирди. Кепотьксонди, периодикасонк лисендихть радня нароттнень авторснон произведениясна, конатнень ётафнесаськ минь. 2016 кизоста сявомок работатама Россиянь нароттнень литератураснон ширеснон кирдемаснон мархта сотф программать мархта. Вельденза Объединённай гуманитарнай издательстваса нолдаф Россиянь нароттнень тяниень пингонь литератураснон кота антологиясна. Эзост сувафтфт мокшень и эрзянь кяльса тяшти авторхнень произведениясна. Кда корхтамс прябалатнень колга, азан вов мезе: национальнай кяльса ноляви аф пяк лама книга.
—Кода ащи тевсь Писателень союзу члеттнень примамаснон мархта?
—Мекольдень пингть Россиянь Писателень союзу примафт рузонь кяльса сёрмадысь Сергей Вишняков и эрзянь кяльса сёрмадысь Светлана Фадейкина. Достойнай кандидатт улихть нинге. Маластонь пингть азсаськ лемснон Москуву приёмнай комиссияв.
—Татьяна Петровна, республикань Писателень союзсь писателеньконди лезни кода машты и мезьса машты. Азонтт тянь колга.
—Лезнетяма авторхненди примсемс участия Всероссийскяй литературнай конкурснень эса, организацияньконь лемста пачфнетяма колгаст. Кой-коста минць арьсекшнетяма и ётафнетяма конкурст, казендьсаськ эсост сяськихнень.
Аф ащетяма ширеса ся писательхнень и поэттнень, конат лама тисть регионть литературанц и литературать целайнек виияфтоманц инкса, колга мялямть сембе пингоннекс кемокстаманц мархта сотф тефнень эзда.
Ётафнетяма литературнай пуромкст, творческяй васедемат автороньконь мархта, книгань презентацият.
Азондсаськ авторхнень кандидатураснон Мордовия Республикань Заслуженнай поэт/писатель, Мордовия Республикань Народнай поэт/писатель почётнай лемонь получамс. Кода ни азыне, ламотнень мяльсна сувамс республикань Писателень союзу. Тяза примафокс улемась няфнесы профессиональнай писательскяй маштомошити российскяй серьса питнень максомать.
Мяль шарфнетяма эрь писательть лангс. Улема, аф семботь кенерькшнетяма тиемс, мезть ёрасаськ, но фалу работатама арьсефть сатоманц инкса!
—Спасиба, Татьяна Петровна, мялень салай корхнеманкса.
Татьяна АЛЬШИНА.