Велень XII Всероссийскяй Сабантуйсь ётафтовсь келиста и мяляфтовиста

Сабантуйсь ульсь и ляткшни стама праздникокс, кона пуропнесыне марс сембе национальностень, культурань и конфессиянь ломаттнень. Эрь кизонь народнай тя праздниксь лемтьф паксянь тундань тефнень шумордамаснонды. 2021 кизоня велень Всероссийскяй Сабантуйсь ульсь Татарстан Республикань Муслюмово велеса, а тядде сонь примазе мокшэрзянь масторсь.
Аксёново велеса Сабантуйса работась лама площадка. Эрсь эсь лацонза мялень салаель. Нинге шобдава ламонц инжихне пуромсть «Этновеле» площадкати, коса мольфтевсь Мордовия Республикань муниципальнай райоттнень и Саранск ошень округть пирьфснон презентациясна. Тяка площадкаса Мини-сценаса ётафтовсь «Шумбрат, Сабантуй!» Мордовиянь художественнай самодеятельностень коллектифнень концертсна. Кулевсть рузонь, мокшень, эрзянь, татаронь морот, сиде моронят… Кой-кит ушеткшнесть морама артисттнень мархта, тифнесть мархтост лятфнембяленди фотографият. И тя шарьхкотьф. Вдь артисттнень ламошкасна щафтольхть-каряфтольхть национальнай щамса-карямса, конат Мордовиянь эрь районца эсь лацоннекс мазыхть.
Кемонь частста ушедозь эсь работаснон «СПОРТиКО» площадкась, «Татаронь базар»—ярхцамбялень мишендемань и народнай художественнай промыслань и ремеслань выставкась, «ТРАКТОР-ШОУ-сь»—тракторть вятеманц коряс механизаторхнень пялькстомасна, велень хозяйствань техникать, ретро-автомобильхнень, велень хозяйствань жувататнень выставкасна-презентациясна, работась ипподромсь, мольфтевсь спортонь национальнай виттнень—армреслингть, гирянь спортть коряс республиканскяй спартакиадась, няфтьфоль мокшэрзянь национальнай бароцямась и финно-угорскяй пялькстомань койхнень реконструкциясна.
Площадкатнень эзда инь главнайть лемоцоль Майдан, тя сценать лангса и панжевсь велень XII Всероссийскяй Сабантуйсь, кона каннесь «Живи и здравствуй, Сабантуй!» лем.
Аш ни кода лац аноклафоль театрализованнай представлениясь, кона пачфнесь Россияса и Мордовияса татаронь народть историянц колга.
Тяда меле главнай сценати—Майданти—тертьфтольхть Сабантуень почётнай инжихне: Татарстан Республикань Президентсь Р.Н.Минниханов, Мордовия Республикань Оцюнясь А.А.Здунов, вице-губернаторсь, Астраханскяй областень губернаторть Администрациянц руководителец П.П.Паутов, Приволжскяй федеральнай округса Российскяй Федерациянь Президентть Полномочнай представителенц аппаратонц Мордовия Республикать эзга Главнай федеральнай инспекторсь М.С.Сезганов.
Морафтфоль Российскяй Федерациянь Правительствать Председателенц заместителенц М.Ш.Хуснуллинонь поздравительнай телеграммац, конань эса корхтавсь, што Сабантуйсь отмечсеви пяк кунардонь пингста сявомок и пачкодсь тячиень шити, ванфтомок эсь лацонь шинц-тюсонц. Тя праздникть вельде поколенияста поколенияс ётнихть культурнай койхне.
ПФО-са Россиянь Президентть Полномочнай Представителенц И.А.Комаровонь приветствиянц лувозе МР-ть эзга Главнай федеральнай инспекторсь М.С.Сезганов.
—Сабантуйсь аф аньцек няфнесы перьфпяльть эрекламанц, паксянь тундань тефнень шумордамаснон, тя и самобытнай коеньконь и обуцяньконь козяшиц. Тя ялгаксшинь и фкя-фкянь шарьхкодемань праздник, марстонь кенярдема и цебярьс надияма,—азозень сон И.А.Комаровонь валонзон.
Татарстан Республикань Президентсь Р.Н.Минниханов мярьгсь:
—Сабантуйсь—мазы праздник! Тячи сон праздновандакшневи 58 регионца, 35 странаса. Коса-бди сон ётни келиста, кода тиньцонт, кепотьксонди, и Казаньца. Азан седи ваксста благодарностень валхт Тейть, Артём Алексеевич, Тонь командацти, Татарстанцта коллегатненди. Сембонь поздравляндасайне праздникть мархта.
Мордовия Республикань Оцюнясь А.А.Здунов ответнай валса мярьгсь, што тячи эряфсонк инь павазу шитнень эзда фкясь.
—Россиянь Президентсь азозе 2022 кизоть Россиянь нароттнень народнай искусствань и аф материальнай культурнай наследиянь кизокс, и тядде минь праздновандасаськ Волжскяй Булгариять мархта исламть примаманц 1100 кизонь топодеманц—и самай тядде тейнек максф доверия ётафтомс велень Всероссийскяй Сабантуйть. Спасиба тя довериянкса,—мярьгсь республикань Оцюнясь.
Сай кизоть велень XIII Всероссийскяй Сабантуйсь ётафтови Астраханскяй областьса. Приветствиянь валхт азсь Астраханскяй областень губернаторть Администрациянц руководителец П.П.Паутов, кона оцю мяльса тердезень сембонь 2023 кизонь 20 майста Астрахани.
Тя шиня Майданца казьфтольхть федеральнай, Татарстан Республикань и Мордовия Республикань государственнай казнетне.
Панжемань торжественнай церемонияда меле Майданца ушедсь Татарстан Республикань и Мордовия Республикань искусствань мастерхнень Гала-концертсна.
«Эрзя-мокшонь пати», «Зуртатарпати» кштимань флешмопне, Мордовиянь инь цебярь гармонисттнень выступлениясна, «Авылым тавышлары» («Родные напевы») татаронь моронь I Межрегиональнай фестивальсь-конкурссь, идень вокальнай творчествань Межрегиональнай фестивальть Гала-концертоц и ламось лиясь—газетаньконь несколька страницац аф саты, штоба лац-ряц пачфтемс и лятфтамс семботь, мезе ульсь 2 июльста Аксёново велеса Плугонь праздникть—Сабантуйть пингста. Фотокорреспондентоньконь Олег Красильниковонь мархта якаме Сабантуень площадкатнень ланга, главнай сценать—Майданть малава и коль ванондоме, кулхцондоме, кизефнеме. Сембось тяса салсесь мяль, сельмованф.
Велень XII Всероссийскяй Сабантуйсь пуропнесь пяк и пяк лама инжи. Сон арась марстонь оцю праздникокс Мордовиянь и Россиянь ламоц нароттненди. Синь тяса няфтезь национальнай щамснон-карямснон, койснон-обуцяснон, фольклорснон.
Сабантуйса ётасть алашаса арнемань пялькстомат, конатнень ванома пуромкшнесь аф кржа ломань.
Алашатнень финальнай ласькомаса (пялькстомась ульсь Мордовия Республикань Оцюнять призонц инкса) примасть участия командат Мордовияста, Чувашияста, Пензенскяй областьста, Татарстанцта. Сяськсь Чувашияста участниксь И.Галимзянов. Теенза кубкать и призть—автомобильть казезь Мордовия Республикань Оцюнясь А.А.Здунов и Татарстан Республикань Президентсь Р.Н.Минниханов.
Ётасть корэш—карксса бароцямать коряс пялькстомат. Сяськикс арась Татарстанцта Р.Р.Нургалиев. Татарстан Республикань Президентть эзда теенза казьфоль автомобиль!
Июнть песта Саранскяйса ульсь «Морай шуфта» шуфтста керсихнень Межрегиональнай конкурссна. Тядде мастерхне работаснон тиезь нароттнень ялгаксшиснон мархта сотф темать мяльса кирдезь. Сяськихнень лемсна азфтольхть и синь казьфтольхть Сабантуйть пингста, а шуфтонь фигуратне, конатнень синь тиезь, Плугонь праздникста занясть башка васта—Этно-площадка Аксёново велеса.
Велень XII Всероссийскяй Сабантуйть колга эсь мялензон-арьсеманзон газетаньконди азозень Российскяй Федерациянь сенаторсь П.Н.Тултаев:
«Россиясь—лама нациянь страна. И эрь народть улихть эсь культурац, коенза—тя афкуксонь козяши, конань ванфтома.
Мезе ули кода азомс татаронь народть колга? Синь, татархне, ванфтсазь кяльснон, обуцяснон, культураснон и лама тиендихть сянкса, штоба тя сембось эряль-ащель. Аф аньцек Казаньца и Мордовиясовок.
Татаронь народсь аф пеняцяй сталмотнень лангс, корхтай эсь кяльсонза, пяк лац покоди, тиендьсы тянь виень аф ужяльдезь. И пяк уважандасыне лия нациянь ломаттнень.
Сабантуйсь—тя аф аньцек праздник, сон лезды народти марямс прянц кода нация, конань ули вандыень и вандыда мелень шиц. Сабантуйсь ванфтсыне кяльть и обуцятнень, кемокстасыне синь».
Т.АЛЬШИНА.