Атюрьевскяй райононь Оброчнай велесь ащи Крхтажть и Вольно-Никольскяйть ёткса. Мзярда-бди сон лувондовсь рузонь велекс, а тяни эряйхнень вейхксогемоньда лама процентсна мокшет. Васенда ломаттне покодсть Крхтажень «Рассвет» колхозса, сяльде пуроптсть колхоз, конань лемдезь «Искракс».
Хозяйствать лама киза вятезе В.П.Яшкин. Аляц, Пётр Трофимович, Великай Отечественнай войнань ветераноль, покотькшнесь райононь хозяйстватнень эса председателькс. Василий Петровичень мархта «Искра» хозяйстваса трудендасть сазоронза Татьяна Петровна и Нина Петровна, рьвац, Татьяна Васильевна, стирец, Елена Васильевна, мирденц мархта. Аф лама пинге председателень тефнень вятезень Яшкинонь стирец, Елена Васильевна. Пингонь ётазь «Искра» колхозу кочкасть од председатель. В.П.Мелёшкин ульсь передовой механизаторкс «Рассвет» колхозса, машинно-тракторнай паркса заведующайкс. Трудонь оцю сатфксонкса аф весть казендевсь казнеса. Мархтонза главнай инженеркс покодсь брадоц Николай Петрович. Хозяйстваса гордостекс и прянь шнафтома вастокс ульсть Мордовия Республикань велень хозяйствань Заслуженнай работниксь С.П.Тимошкин, передовой механизаторсь В.П.Глазунов, стадань ванысь С.И.Ляхин, дояркась М.Ф.Нуриева, тинголангса покодись Т.В.Яшкина, главнай бухгалтерсь Т.П.Гусева и ламотне лиятне. «Искра» колхозть пингонь ётазь лемдезь «Оброчное» ООО-кс. Тяни Оброчнайса эрь кудса ведь, газ. Эряфсь аф ащи фкя вастса, аськоляй инголи. Велеса лама од семьяда.
Сембоса кепотьксокс ащи и Базаркиттнень семьясна. Наталья Михайловна и Виктор Викторович касфтыхть кота итть. Кудазорсь трудендай «Курташкинское» ООО-са. Шабасна тонафнихть Крхтажень школаса.
Аф аньцек Оброчнаень, но и Крхтажень эряйхне шнамань валса корхнихть Мелёшкиттнень семьяснон колга. Анна Никитична—педагогическяй трудонь ветеран, математикань тонафты. Покодсь Оброчнаень основной, меле Крхтажень средняй общеобразовательнай школатнень эса. Николай Петрович—велень хозяйствань ветеран.
Тядде шумордасы школанц и Анастасия Нуриева. Стирнясь эряй бабанц, Мария Фёдоровнань мархта. Родителенза покодихть Москуса.
Оброчнайса эряй лама тонафтыда, тонафтыень династияда. Марнек эряфснон школати максозь Людмила Викторовна и Николай Павлович Митяйкиттне. Тяса эряй Мордовия Республикань Заслуженнай учительсь Н.Н.Сиркина. Сонь учениконза предметнай олимпиадатнень, творческяй, исследовательскяй работань пялькстоматнень эса сявондсазь васенце васттнень. Сон Крхтажень школаса историко-краеведческяй музеень азорава.
Оброчнай велеса эряй и педагогическяй трудонь ветеранць Н.Я.Алёнина. Сон тонафты иттненди рузонь, мокшень кяль и литература. Школати макссь 35 киза. Аноклась республиканскяй олимпиадань сяськихть и призёрхт. Шнамань валхт азомат и Т.С.Ипполитовать лемс. Сон стане жа рузонь кялень и литературань тонафты. Сембе одонь кизонзон максозень Оброчнаень основной общеобразовательнай школати.
Оброчнай велеть пяк козя историяц. Тястонь шачфнень-касфнень лемсна содафт республикаса, странаса. Оброчнай велесь ушеткс сявонди кемготувоце векть кучкаста. 1807 кизоня велеса ушетфоль «Покрова Пресвятой Богородицы» храмть строямац. Сонь строямстонза лездсть помещикне Хрущёфне. Оцю лезкс макссесть велеряйхне. 1864 кизоти Оброчнайса лувондовсь 173 хозяйства и 1212 эряй.
Аф фкя лаца велеса васьфтезь революциять, од эряфть, колхозонь пуроптомать. Ётай веконь колмогемонце кизотнень ушетксста Оброчнайса пуроптфоль «Од эряф» лем ала васенце колхозсь. Эзонза сувась колмогемоньшка хозяйства. Васенцекс колхозу сувасть Г.И.Махров, Н.П.Денисов, М.Д.Бранивскяй, И.И.Логинов и лиятне.
1931 кизоня одукс пуроптфоль «Оброчнай» колхозсь. И 1935 кизоть самс эзонза сувасть сембе велеряйхне. Председателькс ульсть В.М.Андрогонин, Т.Д.Савочкин, Я.С.Денисов. 1938 кизоня колхозса эвондась васенце машинась, конанди озафтозь А.И.Дергуновонь. Войнать пингста колхозонь председателькс ульсь Г.И.Махров. Великай Отечественнай войнада меле «Од эряфть» и «Якстерь Знамять» пуроптозь марс и лемдезь «Рассветокс». Кемоньда лама киза вятезе сонь войнань ветеранць А.А.Шульгин. Андрей Антонович казьфоль «За отвагу», «За взятие Берлина» медальхнень, Славань омбоце и колмоце степенень ордеттнень мархта.
260 велеряй тюрсь фашисттнень каршес. 145-сь эздост ашезь мрда куду. Великай Отечественнай войнань ветераттнень ёткса ульсть аф аньцек алят, но и аватка. Нят: А.Ф.Турлаева, М.Н.Шибайкина и лиятне. А.Г.Махров арась Советскяй Союзонь Геройкс. Аф сяда тёждя ульсь и тылса. Алятнень полафтозь аватне. Тянемс велеса ашезь юкста тылонь труженикнень В.П.Митяйкинать, А.Г.Савочкинать, В.Т.Брыхляевать, Г.И.Махровонь и лиятнень.
Гордостекс и прянь шнафтома вастокс Оброчнайса ащесь школась, конань аделазе Советскяй Союзонь Геройсь А.Г.Махров.
Ульсь Оброчнайса и участковай больниця. Сон строяфоль 1912 кизоня. Эсонза кемонь койкатольхть. Штатса ульсь медицинскяй колма работникт—Е.Ф.Матвеев, М.А.Матвеева, Н.Н.Ильишева. Революцияда меле тяса трудендасть А.А.Фадеева, Б.К.Рахманин, В.К.Законов и лиятне.
Лама киза покодсь здравоохранениянь отличниксь В.С.Пустырнакова. Сембе одонь кизонзон тя больницяти максозень А.Г.Мечтаева.
Оброчнайса ульсь и ветеринарнай станция. Сонь панжемстонза аф кржа вий путсь Анна Фёдоровна Гуськова.
Эрь велеть улихть содаф ломаненза, конатнень мархта шнафтыхть пря. Аф кржа синь эздост и Оброчнайса. Тяса шачсть и кассть Советскяй Союзонь Геройсь А.Г.Махров, генерал-майорсь Н.П.Мельников, кона казьф Мужествань, Якстерь Тяштень, «За службу родине в Вооружённых силах СССР» ордеттнень мархта. 1986 кизоня ульсь Чернобыльскяй АЭС-са. Аляц, Павел Алексеевич, шавовсь войнаса 1941 кизоня. Рьвац, Пелагея Дмитриевна, покодсь завучекс Оброченскяй школаса.
Велеряйхне маряйхть гордость А.В.Тюринонь инкса, кона ульсь Монгольскяй народнай республикань советскяй посольстваса секретарькс. Тяса шачсть, кассть и покодсть Мордовскяй АССР-нь Заслуженнай учительсь Н.Н.Боронин, Мордовскяй АССР-нь велень хозяйствань ветеранць Н.Я.Карсонов, передовой дояркась М.А.Благушина и лиятне. Тянивок Оброчнайса ули кинь мархта шнафтомс пря.
Илья Вешкин.