Кяшал велень поселениясь ульсь инь оцюкс Атюрьевскяй районца. Аньцек Алдонь Кяшалть кувалмоц ветешка вайгяльбе. Лама ломаньда эрясь Вярдень Кяшалса и Молодёжнай посёлкаса. Тяни велеса сембоц лувондови 365 ломань.
Кяшал велеста лиссть содаф ломаттне: А.А.Аверясов, Ф.П.Девятаев, А.И.Карьгин, Н.Н.Балашов, Мордовскяй АССР-нь Заслуженнай учительсь, Великай Отечественнай войнань ветеранць И.Ф.Алямкин, Мордовскяй АССР-нь и РСФСР-нь Заслуженнай учительсь В.С.Богданов и лиятне.
Кяшалть лемнесазь поэтонь уженякс. Тяса шачсть мокшень содаф поэттне А.С.Малькин, Ф.М.Костяйкин, И.В.Надёжкин, И.И.Поршин. Кяшал велеса шачсть и кассть «Мокшень правдать» главнай редактороц О.В.Евдокимова, «Мокша» журналть главнай редактороц М.В.Аникина.
Эрь кизоня майть песта велеса ётафневихть Малькинскяй лувомат, конат лемневихть СССР-нь Писателень союзонь членти, войнань ветеранти, мокшэрзянь литературань классикти А.С.Малькинонди. Тядде ня лувоматне ётафтовихть 32-цеда.
Кяшалонь модась касфтсь Великай Отечественнай войнань лама герой. Нят: А.С.Малькин, Т.И.Алямкин, И.Ф.Алямкин, Н.П.Чепайкин, Г.И.Сятишев, М.Г.Зеленов, Я.И.Зеленов и лиятне.
Тяни Кяшалса аш войнань фкявок ветеран, фронтовиконь рьвя. Кржа лядсь и тылонь труженикта. Фкясь синь эздост И.А.Алямкина. Теенза вейхксогемоньда лама киза. Аф кунара Ирина Алексеевнань шири инжикс сашендсть райононь оцюнять тевонзон тиендисна Е.В.Круглова, Мордовия Республикань Госсобраниянь депутатсь Т.М.Волкова, Кяшалонь поселениянь оцюнясь П.Н.Лёвин.
Велеса эряйхть войнань пингонь итть: Прасковья Киреевна Сиркина, Анна Михайловна Балашова и лиятне. Синь казьфт «Дети войны» медальса.
Кяшалонь кемонь од ломаттне примасть участия СВО-са. Колмотне шавовсть. Россиянь Президентть В.В.Путинонь Указонц мархта синь казьфт Мужествань орденца (куломдост меле). Сисепне тянивок СВО-сот.
Аф кунара Кяшал велень администрациясь, клубсь и школась ётафтсть ила, кона лемтьфоль СВО-ти. Илас тернезь спецоперациянь участникнень тядяснон-аляснон, радняснон. Лемозост лямбе валхт азсть поселениянь оцюнясь П.Н.Лёвин, клубонь заведующайсь М.Н.Алямкина, школань аф класснай работать коряс завучсь В.А.Сятишева.
Ётай веконь 60-90-це кизотнень ёмла семьят Кяшалса ашельхть. Кепотьксонди, Пелагея Романовна и Андрей Иванович Алямкиттне касфтсть кефкие идь. Вейхкса итть касфтсть и Аверясофне. Пётр Амплеевич и Анна Григорьевна эряфоньберьф трудендакшнесть васенда «Партизанский», меле—«Кишалинский» совхоснень эса. Пётр Амплеевич—Трудовой Якстерь Знамянь орденонь кавалер, Атюрьевскяй райононь Почётнай гражданин.
Кяшал велеса прянь шнафтома вастокс ащи и Колединофнень семьясна. Мария Васильевна сембе одонь кизонзон лемдезень культурати. Трудонь кельги мокшавась работась велень библиотекаса. Лама тись мокшень койхнень-обуцятнень ванфтомаснон инкса. Лац покодеманкса казьф аф кржа казнеса. Василий Алексеевич—передовой водителель «Кишалинский» совхозса. Мирт-
тне-рвятне касфтсть колма стирьхть. Тяни синь вете уноксна.
Кепотьксокс лия велеряйхненди ащи Четыркиттнень семьясна. Василий Фёдорович и Любовь Сергеевна васенда трудендакшнесть «Кишалинский» совхозса, меле—велень администрацияса. Касфтсть колма итть.
Кяшалса улихть и од семьят, конат аньцек ушеткшнесазь эсь эряфснон. Вели од кутт строясть Пётр Петрович и Анастасия Алексеевна Шабайкиттне, Наталья Петровна и Алексей Алексеевич Федькиттне.
Колма итть касфтыхть Вера Васильевна и Виктор Максимович Агутиттне.
Москуста Кяшалу эряма мрдась Лебиттнень семьясна. Синь касфтыхть ниле итть.
Нинге аф кунара «Кишалинский» совхозть колга цебярь славась мольсь аф аньцек Атюрьевскяй районца. Тяса касфнесть сёронь оцю урожай, мишендсть государствати лама лофца, сиволь. Вятезь хозяйствать Ф.Д.Ивашкин, Е.М.Чепайкин, В.И.Повернов, В.Ф.Четыркин.
Культурань тефнень инкса велеса отвечай М.Н.Алямкина.
Прянь шнафтома вастокс ульсь Кяшалонь средняй общеобразовательнай школась. Ужяленди, тяни тяса тонафни аньцек 23 шаба. Школаса трудендась лама учитель, педагогическяй трудонь ветеран. Тяни тяса покодихть трудонь кельги, сталмода аф пели учительхне Л.С.Кяльгина, В.А.Сятишева, Т.М.Атяшкина, Е.М.Асессорова, Г.Р.Автайкина, Л.П.Зеленова и лиятне.
Аф ваномок сембе прябалатнень лангс, Кяшалсь аськоляй инголи пингть вешфксонзон коряс. Тефне, конат ащихть поселениять инголе, пяшкотькшневихть аф кальдявста. И тянкса шнамань валхт азомат поселениянь оцюняти П.Н.Лёвинонди, конань сембе виенза водендафт сянкса, штоба цебярьста ётафтомс Великай Сяськомать 80 кизонь юбилеенц и Малькинскяй лувоматнень.
Илья Вешкин.