Ширезонк сашендсь Од кизонь инь учсеви инжись—якшама Атясь
22 октябрьста Од кизонь инь учсеви инжись, Якшама Атясь ушедозе поездса Россиять эзга путешествиянц—Великай Устюгста сявомок Владивостоку молемс и меки.
Якшама Атять вастста вастс ётафневи резиденцияц—тя мазоптф поезд, конань вагононзон эса ётафневихть шабатненди налхксемат и квестт, улихть салон-приёмнай, вагон-ресторан и стак тов. Билетт ульсь кода рамамс нинге ковда инголе «РЖД» ОАО-ть сайтса.
Мордовияда инголе ёфксонь поездсь ульсь Хабаровскяйса, Благовещенскяйса, Читаса, Иркутскяйса, Красноярскяйса и лия ошнень эса.
Мазыста архнеф, эрь кодама тюсса лампочка мархта поездсь пачкодсь Саранскяи машина кинь вокзалу 8 частса шобдава. 7 частста 40 минутаста сявомок шабатненди и синь тядяснонды-аляснонды васенце платформать эса аноклафоль праздничнай анимационнай программа. Ёфксонь персонашне весялгофнезь инжихнень мянь поездть тумс—12 частти.
Шумбракстомань валхт инжихненди азсть сонць Якшама Атясь, Ловонь стирнясь, а стане жа синь ялгасна нумолнятне. Куйбышевскяй машина кинь начальникть заместителец В.О.Викулин и Саранск ошень округонь оцюнясь И.Ю.Асабин поздравляндазь поездонь инжихнень малаткшни Од кизоть мархта. Игорь Юрьевич шарфтсь мяль сянь лангс, што тядде Якшама Атять поездоц пачкодсь Саранскяи васенцеда.
Шабатне кунара учсть Од кизонь инжить эса. Поездса синь примасть участия Якшама Атять «Ёфксонь веле» квестсонза, вагонца-буфетса симсть чайда, азондсть стихотвореният, кучсесть поздравительнай открыткат и казнет. Кой-кона ваготтненди ульсь кода сувамс билетфтома. Панжадотольхть фотокупе мархта ретровагонць, «Северть ламбамонза» сувенир мархта вагонць, вагонць-ресторанць, коса каванясть кельме ширдень эсь лацонь ярхцамбяльса, ульсь кода рамамс Якшама Атять эзда казнет, Великай Устюгста и Костромаста лятфнембяленди паршихть.
Од кизонь илань инжить, Якшама Атять, васьфтезь и Донецкяйста Мордовияв саф шабатне. Тяфтама казне теест тись Мордовиянь Оцюнясь А.А.Здунов.
4 часттнень пингста ёфксонь поездть ванозь 3000 малава ломань. Тяфтама путешествияс Якшама Атясь моли омбоцеда, Россиянь ошнень эса сон ётафты 85 ши. Саранскяйда меле поездсь тусь Пензав, шумордасы путешествиянц 15 январьста.
О.Белкина.