ВЕНАТЬ ШТУРМОЦ

Венать штурмоц—Великай Отечественнай войнань шумордай наступательнай операциятнень ззда фкясь. Сон ульсь 1945 кизонь Венскяй наступательнай операцияти пяльксокс, конань пингста советскяй войскатне сявозь Австриять столицанц, машфтомок зздонза гитлеровскяй войскатнень. Операциясь мольфтевсь 1945 кизонь 5 апрельста сявомок 13 апрельти молемс.
Венать оборонаса ульсть 8 танковай, 1 пехотнай дивизият и 15 пехотань башка батальотт.
6 апрельста шобдава 4-це и 9-це гвардейскяй армиятне шинь стяма ширде и югста ушедозь Венать штурмонц. Тяка пингть 6-це гвардейскяй танковай армиять соединениянза ётазь ошть шинь мадома ширде, тиемок семботь, штоба гитлеровецнень Венскяй группировкасна афоль пота шинь мадома шири. Танковай войскатне ётнезь Венскяй вирьхнень. Но, аф ваномок ся вастть стака ширензон и немецнень каршек ащемаснон лангс, танкатне ётазь Венать и 7 апрельста лиссть Дунайти, перямок нацисттненди потамань кить. Ошсь кружафоль колма ширде.
3-це Украинскяй фронтонь войскатне мольфтсть вишке тюремат ошть эрь кварталонц инкса и вии опорнай пунктокс тиф куттнень каршеса. Разведчикнень группасна, аф ваномок пельксть лангс, вии толть ала разминировандазь Райхсбрюкеть. Тя подвигть инкса сембонди теест максфоль Советскяй Союзонь Героень лем. Советскяй войскатне керсезь гитлеровецнень Венскяй гарнизонцнон башка группава и ушедсть машфтомост. 10 апрельти советскяй войскатне, конат врьгятсть южнай и шинь стяма ширетнень эзда, шовордавсть ся пялькснень мархта, конат мольфтезь ошть штурмонц. Немецкяй гарнизонць люпштафоль югста и шинь стяма ширде 4-це армиять, а юго-западста—9-це и 6-це гвардейскяй танковай армиятнень мархта. Но гитлеровецнень ашель мяльсна максомс пря. 10-11 апрельста веть 4-це гвардейскяй армиясь ушедозе Дунайскяй каналть форсировандаманц. 13 апрельста нацисттне сяськфтольхть.
Венать штурмонц пингста советскяй войскатне машфтозь эздонза сембе нацисттнень, лиссть Санкт-Пёльтен рубежти и кемокставсть южнай ширеса. 3-це Украинскяй фронтть кержи ширдень войсканза стаки мольсть инголи Грацть ширес.