Вете браттне Ивашкиттне тюрсть фашисттнень каршес

Мордовия Республикань Оцюнясь Артём Здунов эсь Посланиясонза Государственнай Собраниянь депутаттненди оцю мяль шарфтсь Родинаньконь аралаензонды. Аш стама семья Мордовия Республикаса, конань ба афолезе тока Великай Отечественнай войнась. Аф сембе мрдасть куду тя войнаста. Ламотне ульсть ёфси однят. Но синь ашезь ужяльде эсь эряфснон Родинаньконь инкса.
Войнада инголе Атюрьевскяй райононь Кяшал велеса эрясь Ивашкиттнень семьясна. Сон пяк оцюволь. Ушедсь Великай Отечественнай войнась. Вете браттне тусть фашисттнень каршес тюрема, Родинаньконь аралама. Но аф сембе синь мрдасть куду.
Ф.Ф.Ивашкин шачсь 1913 кизонь 2 мартста Кяшал велеса. 1935-1936 кизотнень служась Якстерь Армияса. Великай Отечественнай войнав сявозь 1941 кизонь декабрьста Атерень военкоматста. Ульсь отделениянь командиркс. Ульсь военнопленнаень лагерьса. Прважафоль Германияв, Бельгияв. 1944 кизонь августста ворьгодсь пленцта и сувась «За Родину» Рузонь партизанскяй бригадав. Кеветиеце штурмовой сапёрнай бригадаса ульсь рядовойкс. Тя бригадась сувсесь Бельгийскяй партизанонь армияти и тюрсь немецнень каршес Лимбург провинцияса. 1945 кизонь майста ёрдазь советскяй войскатнень расположенияс. Войнада меле мрдась куду. Эрясь и покодсь Зубово-Полянскяй райононь Явас посёлкаса. Кулось 1984 кизонь 6 октябрьста. Калмаф Федот Фёдорович Явас посёлкав.
Рядовойсь Ф.Ф.Ивашкин шачсь 1915 кизоня. 1941 кизонь сисемце апрельста Атерень военкоматсь прважазе фронту. Фёдор Фёдорович юмась куляфтома 1941 кизонь октябрьста.
Н.Ф.Ивашкин шачсь 1920 кизоня Кяшал велеса. Якстерь Армияв сявозь 1940 кизоня. Ведьгемонце СЗФ-нь башка батальононь красноармеец. Кулось ранениятнень эзда 1941 кизонь омбоце июльста. Калмаф Новгородскяй областень Новгородскяй райононь Ожогова вели.
Нилеце брадсь, Тимофей Фёдорович, шачсь 1922 кизоня. Войнаса — 1941 кизоня. Гвардиянь сержантсь казьф Славань колмоце степенень, Отечественнай войнань омбоце степенень ордеттнень мархта, «За отвагу», «За победу над Германией» медальхнень мархта. Кулось 1985 кизонь котоце февральста. Калмаф Кяшалу. Браттнень эзда инь ёмлась, Дмитрий Фёдорович, шачсь 1926 кизоня. Мзярда ушедсь войнась, теенза ульсь 15 киза. Шала велень «Красная Заря» колхозса трудендась трактористокс. Сокась, видесь, урядась сёра, шужярь, керсь и усксесь вирь. А мзярда топодсь 18 киза, тя ульсь 1944 кизонь омбоце ноябрьста, кандсть Атерень военкоматста повестка, сявозь войнав. Ульсь Западнай фронтса. Тюрсь немецнень каршес Севернай Китайть-Маньчжуриять инкса Япониянь Квантунскяй армиять каршес. Ульсь армияса сисем кизот и мрдась куду аньцек 1950 кизоня. Кулось 1981 кизонь 31 мартста. Калмаф Кяшалу. Дмитрий Фёдорович кадсь эсь мельганза оцю наследства. Сонь оцюволь семьяц. Лама уноктонза и уноконь идьтонза.
—Тя монь алязе,—корхтай трудонь ветеранць Фёдор Дмитриевич Ивашкин. — Сон сембоса тейнек ульсь кепотьксокс. Лама азонкшнесь войнать, фронтовик ялганзон квалма, конатнень ёткс сувсесть Атерьста—Никифор Ильич Сяткин, Шяйгужеста—Василий Иванович Жаткин, лиятне. Ниле оцянень эзда кафттне ашесть са войнаста. Кафттнень мархта сидеста васьфнень, кизефнень войнать колга.
Тяни Фёдор Дмитриевич сонцьке ни почётнай пенсионер. Вяти райононь ветеранонь организацияса оцю общественнай работа. Уленди школатнень эзга, азонкшни шабатненди сянь колга, кода тюрсть фашистскяй Германиять каршес вете браттне Ивашкиттне. Фёдор Дмитриевич кочкси колгаст материалхт, макссесыне школань музейхненди. Пяк козя сонценьге семейнай архивоц.
—Тя тевсь пяк эрявикс и сон тейне тиема,—корхтай трудонь ветеранць.
Илья ВЕШКИН.
СНИМКАСА: Войнань ветеранць Д.Ф.Ивашкин семьянц мархта.